Siraku 26 - Interconfessional Albanian Bible – 2020 (with DC)（AL1）

Gruaja e mbarë

1Lum burri i gruas së mbarë,

dyfish i shtohet jeta.

2Gruaja burrneshë e gëzon të shoqin,

ia mbyll vitet në paqe.

3Gruaja e mbarë është hise e mirë,

u bie për hise atyre që druajnë Zotin.

4Në kamje e në skamje është zemërmirë,

gjithmonë fytyrëqeshur.

5Nga tri gjëra më trembet zemra,

por e katërta ma zbeh fytyrën:

shpifja nëpër qytet, tubimi i turmës

dhe padia e stisur janë më zi se vdekja.

6Sëmbim zemre e vajtim,

gruaja që smiron gruan.

Fshikull e ka gjuhën me mbarë njerëzinë.

7Zgjedhë e vënë keq gruaja e ligë,

po ta zësh, si të shtrëngosh akrepin.

8Trazim i madh gruaja e dehur,

turpin nuk e fsheh dot.

9Kurvëria e gruas shihet te shkelja e syrit,

dallohet nga qepallat.

10Vajzën kryeneçe mbaje nën vëzhgim,

që të mos shfrytëzojë rastin.

11Ruaju syrit që nuk dridhet

e mos u habit po të mashtroi.

12Si udhëtari i etur që hap gojën

e pi çdo lloj uji që i qaset,

edhe ajo ulet mbi çdo kunj

e ia hap kukurën shigjetës.

Lavdërimi i gruas së mbarë

13Hiret e gruas e kënaqin burrin,

ia këndell kockat mjeshtëria e saj.

14Gruaja e heshtur dhuratë e Zotit,

s'i ka të paguar shpirti i vetëpërmbajtur.

15Gruaja e përkorë hir mbi hir,

vlerë që nuk peshohet shpirti i tërhequr.

16Diell i ngritur në lartësitë e Zotit,

bukuria e gruas në shtëpinë e saj të rregullt.

17Si llamba vezulluese në shandanin e shenjtë

fytyra e bukur në moshë të pjekur.

18Si shtylla të arta mbi mbajtëse argjendi

këmbët e bukura mbi shputat e forta.

19[Biri im, kujdesu për lulen e rinisë,

mos ua jep të huajve fuqinë.

20Kërko një arë pjellore në mbarë fushën,

mbille me farën tënde e mbështetu në tëmotjet e tua.

21Frytet e begata që do të lësh

do të mburren me vlerën e vet.

22Gruaja që shitet vlen sa një pështymë,

në është e martuar, kullë vdekjeprurëse për sa i vardisen.

23Gruaja e pafe i bie për hise burrit të paudhë,

gruaja besimtare, atij që druan Zotin.

24Gruaja e pacipë bën turp gjithmonë,

gruaja e turpshme përmbahet edhe me të shoqin.

25Gruaja e pafytyrë vlen sa një qen,

gruaja e turpshme druan Zotin.

26Gruaja që nderon burrin

u duket të gjithëve e urtë,

por ajo që krekoset dhe e poshtëron,

u duket të gjithëve e pafe.

Lum burri i gruas së mbarë,

i dyfishohet jeta.

27Gruaja gojëzgjidhur e zhurmëmadhe

është si boria që bie për sulm.

Kush jeton ashtu,

jeton në rrëmujë lufte.]

28Dy gjëra ma trishtojnë zemrën,

por një e tretë ma ndez zemërimin:

luftëtari i mjeruar,

i mençuri i përqeshur

dhe i rëni nga drejtësia në mëkat.

Zoti ia bën gati shpatën.

29Vështirë t'i shmanget tregtari gabimit,

shitësi nuk i shpëton mëkatit.