1Pas këtyre ngjarjeve, pasi mbretit Kserks i kishte kaluar zemërimi, i ra ndër mend për Vashtin, si kishte vepruar ajo e ç'vendim ishte marrë kundër saj.
2Atëherë shërbëtorët e mbretit, që kujdeseshin për të, thanë: «Të kërkohen për mbretin vasha me pamje të hijshme
3e të caktojë mbreti porositës në të gjitha krahinat e mbretërisë së vet, për t'i mbledhur të gjitha vashat me pamje të hijshme në kështjellën e Shushanit, në shtëpinë e grave, nën mbikëqyrjen e Hegait, eunukut të mbretit, që kujdeset për gratë, e ai do t'u japë të lahen.
4Ajo vajzë, që do t'i pëlqejë mbretit, do të mbretërojë në vend të Vashtit». Kjo gjë i pëlqeu mbretit dhe ashtu veproi.
5Në kështjellën e Shushanit ishte një jude me emrin Mordaka, që ishte biri i Jairit, të birit të Shimeit, të birit të Kishit, nga fisi i Benjaminit.
6Ai ishte larguar nga Jerusalemi me ata që ishin dëbuar me Jehoninë, mbretin e Judesë, nga Nabukodonosori, mbreti i Babilonisë.
7Kishte rritur Hadasanë, domethënë Esterën, bijën e të ungjit, që kishte mbetur pa të atin e pa të ëmën. Vajza kishte tipare të bukura dhe ishte e hijshme për t'u parë. Mordakai e kishte marrë për bijë, pasi asaj i kishin vdekur i ati dhe e ëma.
8Kur doli urdhri i mbretit dhe vendimi i tij e kur në kështjellën e Shushanit u mblodhën shumë vajza nën mbikëqyrjen e Hegait, sollën edhe Esterën në shtëpinë e mbretit, nën mbikëqyrjen e Hegait, kujdestarit të grave.
9Vajza i pëlqeu e iu duk e këndshme, prandaj shpejtoi t'i jepte për t'u larë e për të ngrënë. I dha edhe shtatë vajza të zgjedhura nga shtëpia e mbretit dhe e vendosi me vajzat në pjesën më të mirë të shtëpisë së grave.
10Estera nuk kishte treguar as për popullin, as për fisin e vet, se Mordakai e kishte urdhëruar të mos tregonte.
11Mordakai bënte ecejake çdo ditë kundruall tremes së shtëpisë së grave, për të marrë vesh si ishte Estera e çfarë do të bënin me të.
12Erdhi radha që secila vajzë të paraqitej te mbreti Kserks, pasi i kishte mbushur dymbëdhjetë muajt e rregullores për gratë, kohë gjatë së cilës duhej të laheshin për gjashtë muaj me mirrë e gjashtë muaj me vajra erëmirë e me zbukurues për gratë.
13Kur vajza shkonte te mbreti, i jepnin gjithçka kërkonte të merrte me vete nga shtëpia e grave te shtëpia e mbretit.
14Mbrëmjeve hynte brenda e në mëngjes kthehej në shtëpinë tjetër të grave, që ishte nën mbikëqyrjen e Shashgazit, eunukut të mbretit, kujdestar për shemrat. Ajo nuk kthehej më te mbreti, përveç në rast se i kishte pëlqyer mbretit e ai e thërriste me emër.
15Kur Esterës, së bijës së Abihajlës, të ungjit të Mordakait, që ky e kishte marrë si bijë, i erdhi radha të shkonte te mbreti, ajo nuk kërkoi asgjë përveç çfarë i tha Hegai, eunuku i mbretit, kujdestari i grave. Estera u pëlqente të gjithë atyre që e shikonin.
16Ajo u paraqit te mbreti Kserks, në shtëpinë mbretërore, në muajin e dhjetë, domethënë në muajin Tebet, në vitin e shtatë të mbretërimit të tij,
17dhe mbreti e deshi Esterën mbi të gjitha gratë. Ajo fitoi pëlqimin e përkrahjen e tij më shumë se të gjitha vashat e tjera, prandaj ai i vuri mbi kokë kurorën mbretërore dhe e shpalli mbretëreshë në vend të Vashtit.
18Atëherë mbreti shtroi një gosti të madhe për të gjithë prijësit e shërbëtorët e tij, gostinë e Esterës, caktoi një festë për krahinat dhe shpërndau dhurata, siç i ka hije mbretit.
Mordakai shpëton mbretin19Kur vashat u mblodhën sërish, Mordakai u gjend pranë portës së mbretit.
20Estera nuk kishte treguar cilit komb e popull i përkiste, siç e kishte urdhëruar Mordakai, se ajo e zbatonte urdhrin e Mordakait, siç kishte vepruar kur ishte rritur tek ai.
21Gjatë atyre ditëve, kur Mordakai rrinte te porta e mbretit, Bigtani e Tereshi, dy nga eunukët e mbretit, që ruanin pragun, u zemëruan dhe vendosën të vinin dorë mbi mbretin Kserks,
22por Mordakai e mori vesh këtë gjë e ia tregoi mbretëreshës Ester. Ajo ia tregoi mbretit, në emër të Mordakait.
23Mbreti e hetoi këtë çështje, që doli e vërtetë, e ata të dy u varën në pemë. Kjo gjë u shkrua në librin e Kronikave, në praninë e mbretit.
Who We AreWhat We EelieveWhat We Do
2025 by iamachristian.org,Inc All rights reserved.
