Didimanyisha 21 - MUKANDA WA MYIDI MUKULU（TSH96）

Diulu dipiadipia ne buloba bupiabupia

1Pashishe meme kumona diulu dipiadipia ne buloba bupiabupia. Diulu dia kumpala ne buloba bua kumpala bikavua bijimine. Mayi manene kaatshivuaku to.

2Ke meme kumona tshimenga tshia tshijila, Yerushalayime mupiamupia, utuluka mu diulu, ufuma kudi Mvidi Mukulu. Uvua muvuale bilenga biende bia tshibilu, muindile bayende bua kubuela mu dibaka.

3Ke meme kumvua diyi dikole difumina ku nkuasa wa butumbi, diamba ne: “Mpindiewu Mvidi Mukulu udi usomba pamue ne bantu! Neashale nabu. Bobu nebikale tshisamba tshiende. Mvidi Mukulu mene neashale nabu; neikale Mvidi Mukulu wabu.

4Neabakuupule binsonji bionsu ku mesu. Lufu kaluakuikalaku kabidi, nansha madilu, nansha miadi, nansha dikenga. Bikulukulu nebishile bipiabipia muaba.’’

5Diba adi uvua musombe mu nkuasa wa butumbi kuambaye ne: “Mpindiewu ndi ngenzulula bionsu, bishale bipiabipia.” Pashishe kungambilaye ne:

— Funda miaku yanyi eyi, bualu idi milelela. Udi mua kuyitaba.

6Kuambaye kabidi ne:

— Miaku yanyi mmimane kukumbana! Ndi Alfa ne Omega, ntuadijilu ne ndekelu. Udi ne nyota, nemmupeshe tshiakunua, kayi ufuta. Nemmupeshe mayi a ku mpokolu wa mayi a muoyi.

7Tshidi muntu mua kupeta kundi padiye utshimuna ntshietshi: Nengikale Mvidi Mukulu wende, yeye neikale muananyi.

8Kadi bena bukata, bantu badi bavila Mvidi Mukulu, bamutombokela, bashipianganyi, benji ba malu a bundu, benji ba malu a majimbu, batendeledi ba nwidie, ne bena dishima bonsu, nebabele mu mayi manene atema kapia ka mvuanda. Mayi manene aa ke lufu luibidi.

Yerushalayime mupiamupia

9Umue wa ku batumibue muanda mutekete bavua ne makopu muanda mutekete muwule ne bipupu muanda mutekete bia ndekelu, kufikaye kundi, ungambila ne:

— Luaku! Nenkuleje mukaji udi ubuela mu dibaka ne Muana wa mukoku.

10Mueyelu wa Mvidi Mukulu kumvulula. Mutumibue wa Mvidi Mukulu kungambula, kumfikisha ku lusongu lua mukuna mupite bule. Kundejaye Yerushalayime, tshimenga tshia tshijila, tshivua Mvidi Mukulu mutulule mu diulu.

11Tshimenga tshivua tshiwule ne butumbi bua Mvidi Mukulu, tshibalakana bu dibue dia mushinga mukole, bu dibue dia yaspise, dimueneka munda ne panyima bu lusoka lua kristale.

12Tshimana tshipite bule tshivua tshinyungulukile tshimenga. Ku tshimana aku kuvua biibi dikumi ne bibidi. Ku tshiibi tshionsu kuvua mutumibue uvua utshilama. Bavua bafunde pa biibi mena a bisamba dikumi ne bibidi bia bena Izrayele.

13Ku luseke luonsu, ne ndua kudi diba dipatukila, ne ndua ku mutu, ne ndua kuinshi, ne ndua kudi diba dibuelela, kuvua biibi bisatu.

14Bavua bashikike tshimana tshia tshimenga pa mabue dikumi ne abidi. Bavua bafunde pa mabue apu mena a bapostolu dikumi ne babidi ba Muana wa mukoku.

15Mutumibue uvua uyukila nanyi, uvua ne dikombu dia mpawungi, bua kupima nadi tshimenga, biibi biatshi, ne tshimana tshiatshia.

16Nseke yonsu inayi ya tshimenga ivua mushindu umue. Nenku bule buvua momumue ne butshiama. Mutumibue uvua upima tshimenga ne dikombu, kupetaye kilometre binunu bibidi ne nkama ibidi mu bule, mu butshiama, ne mu butumbuke.

17Kupimaye kabidi tshimana, kupeta metre makumi asambombu ne atanu mulu, bilondeshile tshipimu tshia tshibidilu tshivuaye natshi.

18Bavua bibake tshimana ne mabue a yaspise, base tshimenga ne mpawungi muimpe mutambe, umueneka munda ne panyima, bu talatala kayi katoba.

19Bavua balengeje mabue a tshitaku tshia tshimana tshia tshimenga ne mabue a mushinga mukole a mishindu yonsu: dibue dia kumpala dia tshitaku divua dia yaspise, dibidi dia safire, disatu dia agate, dinayi dia emerode,

20ditanu dia onikse, disambombu dia sarduwane, dia muanda mutekete dia krizolite, dia muanda mukulu dia berile, dia tshitema dia topaze, dia dikumi dia krizopraze, dia dikumi ne dimue dia turkuwaze, ne dia dikumi ne dibidi dia ametiste.

21Biibi dikumi ne bibidi bivua mabue a busanga dikumi ne abidi. Bavua benze tshiibi tshionsu amu ne dibue dinene dimue dia busanga. Bavua benze musesu munene wa mu tshimenga ne mpawungi menemene, umueneka munda ne panyima bu talatala.

22Tshivua mumone nzubu wa Mvidi Mukulu mu tshimenga etshi to. Bualu Maweja-Nangila wa bukole buonsu, pamue ne Muana wa mukoku, badi nzubu watshi.

23Tshimenga katshiena tshikengela butoke bua diba, nansha bua ngondu, bualu butumbi bua Mvidi Mukulu budi butshitokesha; kabidi Muana wa mukoku ke muendu watshi.

24Bisamba bia bantu nebiende mu butoke bua tshimenga atshi. Bakalenga ba matunga nebafikemu ne bubanji buabu.

25Biibi bia tshimenga nebishale buashi dituku dijima. Kashidi kabakubinjila to. Bualu butuku kabuakuikala mu tshimenga etshi.

26Bisamba nebifikemu ne bilenga biabi, kabidi ne bubanji buabi.

27Kadi tshintu nansha tshimue tshidi ne mikiya, katshiakubuela mu tshimenga etshi. Muntu udi wenza malu mabi, ushima, kakubuelamu. Amu badi ne mena abu mu mukanda wa muoyi, mukanda wa Muana wa mukoku, ke badi mua kubuelamu.