Misambu Diumvuija - MUKANDA WA MYIDI MUKULU（TSH96）
Diumvuija— Mukanda ewu udi ne tusala 150, tuvua bena Izrayele bimba ne bisanji ku kale, nangananga diba divuabu batendelela Mvidi Mukulu mu nzubu wende. Bishiferi bidi mu tuboku bidi bileja numero wa misambu mushindu uvua bena Ngreke bayandamuna kale.Badi babuluja mukanda wa misambu mu mikanda itanu: (1-41; 42-72; 73-89; 90-106; 107-150). Mudi kabidi bisumbu bishilangane bia misambu, mushindu uvuabu bayisangisha kale: misambu ya Davide (51-65; 67-71; a.n.), ya bena Kora (42-49; 84-88), ya Ashafe (73-83), misambu ya bumfumu (93-99), misambu ya bena luendu lua tshijila (120-134), a.n.Tusala 116 tudi ne Diumvuija, didi dileja nansha mfuki wa musambu, kasumbu kawu, biombelu bivuabu ne bua kuwimba nabi, nansha meyi a kuimba nawu musambu awu, nansha mushindu uvuabu ne bua kutendelela nawu, nansha tshikondu tshivuabu basaka kasala aka, a.n.Tusala tua bungi tudi mua kutukeba mu tusumbu tushilangane, bualu tudi ne midimu mishilangane. Kadi misangu mivule badi basunguluja tusumbu nenku:1. Misambu ya kutumbisha nayi Mvidi Mukulu, bualu udi munene, kabidi udi utunanga: (8; 19; 33; 100; 103-105; 111; 113; 114; 117; 135; 136; 145-149).2. Misambu ya bumfumu, idi ijadikila bantu ne: “Maweja-Nangila udi mukalenga:” 47; 93; 96-99.3. Misambu ya mukalenga, nansha idi mukalenga wa ditunga utendelela nayi Mvidi Mukulu, nansha idi bantu balomba nayi Mvidi Mukulu bua ele mukalenga lupemba: 2; 18; 20; 21; 45; 72; 89; 101; 110; 144.4. Misambu ya kubuela nayi mu nzubu wa Mvidi Mukulu: 15; 24.5. Misambu ya bena luendu lua tshijila, ivua bena Izrayele bimba pasuabu baye ku bibilu binene (Dipita dia Maweja-Nangila; tshibilu tshia mbingu ne tshia tuzubu tua Bisasa:) 84; 91; 121; 122.6. Misambu ya Siyone, idi itumbisha muaba udi Mvidi Mukulu mudisunguile, bua base nzubu wende mu Yerushalayime: 46; 48; 76; 87; 132.7. Misambu idi ne malongesha: muambi nansha mutuangaji udi umanyisha bantu majinga nansha mibelu bia kudi Mvidi Mukulu: 14; 50; 53; 75; 81; 95.8. Misambu ya kulongesha nayi bena ditaba malu makuabu: 37; 49; 73; 78; 112; 127; 133; tudi mua kusakidila ku yoyi ayi 1 ne 119.9. Misambu ya bena ditaba badi mu dikenga, balomba Mvidi Mukulu bua avue kubambuluisha: 12; 44; 58; 60; 74; 79; 80; 83; 85; 90; 94; 106; 108; 123; 126; 137.10. Misambu ya makenga adi muntu nawu (baluishi badi bamukengesha, udi usama, badi bamujana, baya nende kule mu bupika…) ke kasumbu kadi ne tusala tuvule: 5-7; 13; 17; 22; 25; 26; 28; 31; 35; 38; 39; 41-43; 51; 54; 57; 59; 61; 63; 64; 69-71; 86; 88; 102; 109; 120; 130; 140-143.11. Misambu ya kuela tuasakidila, bualu Mvidi Mukulu uvua musungidile muena ditaba ku njiwu, nansha mumufuile luse bua mibi yende: 9-10; 30; 32; 34; 40.1-12; 92; 107; 116; 118.12. Misambu ya ditekemena didi muena ditaba nadi kudi Mvidi Mukulu, dimupetesha disanka ne bupole munda: 3; 4; 11; 16; 23; 62; 131; 139.Yezu uvua muimbe misambu (Mar 14.26). Misangu mivule uvua muangate miaku ya mu misambu eyi, bua kulongesha nayi bantu (Mar 12.10; 12.36, tangila Mis 118 ne 110), nansha bua kutendelela nayi (Mar 15.34; Luk 23.46; tangila Mis 22 ne 31).Mu mukanda wa Misambu, kabidi bafundi ba mikanda ya mu tshiovu tshipiatshipia mbasangane malu avua adianjila kutela malu a Kristu, bisama biende (Mis 22 ne Mis 69, tshilejilu tangila Mat 27.34-48), dibika diende ne dipeta diende dia butumbi (Mis 16; 110; 118, tangila malongesha a Petro mu MM 2 ne 4). Mu mikanda ya tshiovu tshipiatshipia badi batela misambu misangu mipite pa lukama.Misambu eyi ke ivua bena Izrayele, Yezu, ne bena Kristu ba kumpala batendelela nayi (MM 4.24-26). Misambu eyi nansha lelu itshidi mpokolu udi bonsu badi bakeba Mvidi Mukulu mua kusuina miaku mene ya Mvidi Mukulu bua kumutendelela nayi.
