Yudite 5 - MUKANDA WA MYIDI MUKULU（TSH96）

Oloferne udi ulombola tshipangu

1Oloferne, mfumu udi ku mutu kua biluilu bia bena Ashure, kumvuaye lumu ne: bana ba Izrayele badi badilongolola bua kuluangana myita, bajika njila ya mu mikuna. Mbakoleshe ku nsongu ya mikuna, bateya kabidi ne mateyi mu mpata.

2Ke Oloferne kupeta tshiji tshikole ne lonji, kubikidisha bamfumu bonsu ba bena Mowabe, ne balombodi ba myita ba bena Mowabe bavua ku mutu kua balombodi bakuabu, ne balombodi bonsu ba bitupa bia buloba bavua ku muelelu wa Mayi manene a pankatshi.

3Kubambilaye ne:

— Nuenu bena Kenaane, ngambilayi bantu badi mu buloba bua ku mikuna ebu mbanganyi? Bimenga bidibu basombe mbia mushindu kaayi? Tshiluilu tshiabu tshidi ne mushinga ku tshinyi? Bukole buabu ne dimanya diabu bidi mua kubambuluisha mua kutua nkanana ku tshinyi? Udi ulombola bena myita babu mmukalenga kaayi?

4Amu bobu bantu abu ba kudi diba dibuelela bavua babenga mua kumonangana nanyi bua tshinyi?

Akiyore udi uyukila ne bantu

5Akiyore, mfumu wa bena Amone, udi utangila bamfumu bakuabu, kumuandamunaye ne:

— Mfumuanyi wa bena myita, udi ku mutu kua bakuabu, anyisha bua muena mudimu webe akule. Ndi musue kukuambila bulelela mudi bantu badi base pa mikuna idi pabuipi ne mutanda webe. Tshiena nkushima to.

6Bantu aba badi ndelanganyi ya bena Babilone.

7Kabavua banyishe mua kukuatshila mvidi ya bankambua babu mudimu. Bankambua babu bavua basombele mu Babilone.

8Kubengabu mua kulonda mu dikasa dia bankambua babu bavua basombe mu Babilone. Bavua basue kunemeka Mvidi Mukulu wa mulu, ukavuabu bamanye ne: udi amu umue. Kubipatabu mu ditunga diabu, mu buloba bua nwidie yabu ya kale. Ke bobu kuanji kuya kusomba mu ditunga dia Mezopotamiya wa ku mutu. Kushalabu matuku mulongulongu.

9Mvidi Mukulu wabu kubambila bua bumuka mu ditunga adi, baya kuasa mu ditunga dia Kenaane. Bobu kuasamu, kuvudijabu mpawungi, ne nkanu ya tshiamu tshitoke tshia mushinga mukole, kupetabu bimuna bivule.

10Pashishe, tshiyole tshia nzala kubuela mu ditunga dijima dia Kenaane. Bobu kuya mu Ejipitu. Muaba uvuabu mua kupeta tshidi mua kudisha mubidi.

11Kadi mukalenga wa bena Ejipitu kutuadija kubabenga, uvua ukeba ne budimu mua kubabutula pavuaye ubenzeja midimu mikole ya dikuma tushole. Bantu bakubafuisha bundu, kubamonabu bu bapika.

12Bobu kutendekena Mvidi Mukulu wabu. Yeye kutumina ditunga dijima dia Ejipitu bipupu kabiyi ne mushindu wa kubiondapa. Ke bena Ejipitu kubipata mu ditunga diabu.

13Mvidi Mukulu kuumisha Mayi manene makunze avua kumpala kuabu,

14kubalombolaye mu njila wa ku mukuna wa Sinayi ne ku Kadeshe-Barneya. Kuipatabu bantu bonsu bavua badianza kuasa mu tshipela,

15kuasabu mu ditunga dia bena Amone, kubutulabu bena Eshebone, kubapitabu bukole. Pashishe kusabukabu Yardene.

16Kukuatabu buloba bua mikuna yonsu, kuipatabu bavua miaba ayi, ke bena Kenaane, bena Perizi, bena Yebusa, bena Shekeme ne bena Ngirgashi bonsu. Bobu kushalamu matuku mavule.

17Pavuabu kabayi benza bivua bibi ku mesu a Mvidi Mukulu wabu, bavua basombe mu diakalenga. Kadi Mvidi Mukulu udi ubalama, mmubenge nsombelu mubi.

18Kadi diba divuabu kabayi balonda meyi avuaye mubambile, bavua babutuke bikole mu myita mivule. Ndekelu bavua baye nabu mu bupika mu matunga a bantu benyi. Bavua bupula nzubu wa Mvidi Mukulu wabu, bakuata bimenga biabu kudi baluishi.

19Pavuabu balamata kabidi Mvidi Mukulu wabu, bavua bumuke mu matunga avuabu babatangalaje. Bavua basombe mu Yerushalayime muaba udi nzubu wabu wa Mvidi Mukulu. Bavua base tshiakabidi mu mikuna muvua kamuyi bantu.

20Mpindiewu, mulombodi wanyi udi ku mutu kua bakuabu, pikala bantu aba kabayi batumikila mikenji, kabayi bamanye Mvidi Mukulu wabu, kabidi patuikale bajadikilemu ne bavua benza malu mabi, nanku netubaluishe, netubatshimune.

21Kadi pikala bantu aba kabayi ne bubi ku mesu kua Mvidi Mukulu wabu, mulombodi wanyi wa bena myita udi ku mutu kua bakuabu, ubalekele mu ditalala. Maweja-Nangila Mvidi Mukulu wabu udi mua kubalama, nenku bantu bonsu kutuseka.

Badi bafundila Akiyore tshibawu, bamufila kudi bena Izrayele

22Amu Akiyore ujikija kuakula, bantu bonsu bavua banyungulukila ntenta, kutuadijabu kutontolola bivuaye wamba. Balombodi ba bena nwita ba Oloferne ba tshisumbu tshia ku mutu ne ba mienampala ba ku muelelu wa Mayi manene a pankatshi ne bena Mowabe, kuelabu meji a kumushipa.

23Bavua bamba ne:

— Katuena mua kutshina bena Izrayele nansha. Tshisamba etshi, katshiena ne bukole nansha ne mushindu wa kulongolola tshiluilu tshikole.

24Oloferne, mulombodi wa bena mvita udi ku mutu kua bakuabu, tuluishayi bantu aba, tshiluilu tshiebe netshibabutule.