2 Samuwele 13 - MUKANDA WA MYIDI MUKULU（TSH96）

Amnone ne Tamare

1Malu makuabu avua menzeka pashishe. Absalome, muana wa Davide, uvua ne muanabu wa bakaji muimpe mutambe, dina diende Tamare. Amnone, muana mukuabu wa Davide, kunanga Tamare bikole.

2Nanku, Amnone kutuadija kusama, bualu kavua ne dikisha bua Tamare, muana mukuabu wa tatuende uvuaye ujinga. Amnone kavua ne mushindu wa kubuelela Tamare mu nzubu, bualu Tamare kavua muanji kumanya balume.

3Kadi Amnone uvua ne mulunda wende mudimuke bikole, Yonadabe, muana wa Shama. Shama uvua muanabu ne Davide.

4Yonadabe kukonka Amnone ne:

— Muana wa mukalenga, udi uleja mpala mubi ku dituku dionsu nunku bua tshinyi? Kuena mua kungambilaku tshidi tshikutonda anyi?

Amnone kuandamuna ne:

— Bualu ndi munange Tamare, muakunyi wa Absalome, muanetu wa tatu.

5Yonadabe kumupesha meji ne: Nanku, ulala pa bulalu bu muntu udi usama. Pikala mukalenga Davide mufike bua kukusamba, umuambile ne: “Itaba bua muanetu wa bakaji Tamare, afike bua kundambila biakudia. Neandambile biakudia abi, meme mutangile. Yeye nkayende neampeshe biakudia abi, bua meme kudia.”

6Nanku, Amnone kulala bu muntu udi usama. Mukalenga Davide kufika bua kumusamba. Amnone kumuambila ne:

— Itaba bua muanetu wa bakaji Tamare, afike kumpala kuanyi bua kundambila mikata ibidi. Ayimpeshe yeye nkayende, bua meme kudia.

7Nanku Davide kutuma muntu bua kuambila Tamare ku nzubu kuvuaye ne:

— Ndaku ku nzubu kua muanenu Amnone, umulambile biakudia.

8Tamare kuya kua Amnone, kumusangana mu bulalu. Kusopaye bukula, kukanga mikata, muanabu Amnone mutangile.

9Pashishe Tamare kuteka mikata ayi mu dilongu, kupesha muanabu. Kadi Amnone kubenga mua kudia. Kutumaye diyi bua bantu bonsu bapatuke. Bantu bonsu kupatuka.

10Amnone kuambila Tamare ne:

— Luaku, umpeshe mikata mu bulalu emu. Ke muaba undi musue bua wewe nkayebe uyimpeshile bua meme kudia.

Tamare kuambula mikata iwaye muenze, kuyaye nayi too ne ku bulalu bua Amnone.

11Pavua Tamare umupesha mikata ayi bua kudia, Amnone kukuata Tamare, umuambila ne:

— Tamare wetu, luaku tulale nebe.

12Tamare kubenga ne:

— Nansha, Amnone wetu! Kuena mua kunkuata ku bukole to! Bena Izrayele kabena benza malu a mushindu ewu to. Kuenji bibi nanku to!

13Wewe muenze nanku, meme nengendela njila kaayi? Wewe kabidi kuakuikala ne mushinga munkatshi mua bena Izrayele to. Nanku, anji kuambila mukalenga Davide bualu ebu. Kena mua kubenga bua wewe kunsela to.

14Amnone kubenga bionsu abi, kutekesha Tamare, kulala nende ku bukole.

15Pashishe kutuadijaye kukina Tamare bikole. Lukinu luende kupita dinanga divuaye munange Tamare kumpala. Nanku, kuipataye Tamare, umuambila ne:

— Umbuka apa!

16Tamare kuandamuna ne:

— Nansha! Paudi ungipata nenku, udi wenza kabidi bibi bipite biudi mumane kuenza! Kadi Amnone kubenga kabidi bionsu abi.

17Kubikilaye nsongalume muena mudimu wende, umuambila ne:

— Ipata nsongakaji ewu mu nzubu muanyi. Papatukaye ukange tshiibi bikole.

18Muena mudimu kuipata Tamare, kukanga tshiibi.

Tamare uvua muvuale muntumpu muimpe mutambe, bu mudi bana ba bakalenga bavuala padibu kabayi banji kubuela mu dibaka.

19Nanku kudielaye butu mu mutu, kupanda muntumpu wende muimpe. Kubuikilaye bianza kuisu, kuyaye, wenda udila bikole.

20Mukuluende Absalome kumukonka ne:

— Muakunyanyi wa bakaji! Amnone mmukubuelele mu nzubu ku bukole anyi? Lekela mutoyi, bualu ebu kabukutondi to. Amnone mmuanenu!

Biangatshile diba adi, Tamare kusomba ku nzubu kua mukuluende Absalome ne kanyinganyinga, bu mukaji udibu babenga ku dibaka.

21Mukalenga Davide kupeta lumu lua bionsu bivua bienzeka abi. Kufikaye munda bikole. Kadi kena mutandishe Amnone to, bualu uvua muanende muanabute, kabidi uvua mumunange bikole.

22Bu muvua Amnone mubuelele muakunyende Tamare mu nzubu ku bukole, Absalome kumujila, kumukina bikole bipite.

Absalome udi ushipesha Amnone, pashishe udi unyema

23Bidimu bibidi bimane kupita, dituku dikuabu, Absalome uvua ne bakoshi ba miosa ya mikoku ku nzubu kuende ku musoku wa Baale-Ashore, pabuipi ne tshimenga tshia Efrayime. Kubikidishaye bana ba mukalenga Davide bonsu.

24Kuyaye kuambila Davide ne:

— Mukalenga, ndi ne bakoshi ba miosa ya mikoku ku nzubu kuanyi. Wewe ufike mu tshibilu etshi, ne balombodi ba mu bukalenga bebe bonsu.

25Mukalenga Davide kubenga ne:

— Nansha muananyi! Tuetu bafike bonsu ku tshibilu atshi, udi mua kutata bikole.

Absalome kusengelela mukalenga Davide bikole. Kadi, mukalenga Davide kubenga mua kuya. Kumuelaye anu lupemba.

26Absalome kuambila kabidi mukalenga Davide ne:

— Bu muudi ubenga bua kuya, nanku itaba bua tuye nansha ne muanetu Amnone.

Mukalenga Davide kukonkaye ne:

— Udi musue kuya ne Amnone bua tshinyi?

27Absalome kusengelela kabidi mukalenga Davide bikole. Nanku mukalenga Davide kuitaba bua Amnone aye. Kuitabaye kabidi bua bana bende bakuabu baye ne Absalome.

28 Ke Absalome kutumina bena mudimu bende diyi ne:

— Nutangile Amnone bikole. Pikalaye mumane kukuatshika maluvu, meme nennuambile ne: “Tapayi Amnone!” Nanku nenumutute, numushipe. Kanutshinyi to, meme ke udi munutume. Nuikale ne dikima, nuleje bukitu buenu!

29Bena mudimu kukumbaja bionsu bivua Absalome muambe. Kushipabu Amnone. Bana bakuabu ba mukalenga Davide kujuka ku mesa diakamue, kubanda muntu yonsu pa nyama wende wa mpunde, kunyema.

30Patshivua bana abu mu njila, mukalenga Davide kupeta lumu ne: “Absalome mmushipe bana bebe ba balume bonsu. Kakuena kushala muana nansha umue to.”

31Nanku, mukalenga Davide kupanda bilamba biende, kulala panshi mu buloba. Balombodi ba mu bukalenga buende bonsu, kupanda bilamba biabu, kuimana pabuipi ne Davide.

32Kadi, Yonadabe, muana wa Shama (Shama ke uvua tatuende wa Davide), kuambila Davide ne:

— Mukalenga, kuedi meji ne: mbashipe bana bebe ba balume bonsu to. Mbashipe amu Amnone nkayende. Absalome uvua mumane kulaya bua kuenza bualu ebu, biangatshile dituku divua Amnone mubuelele muanabu Tamare mu nzubu ku bukole.

33Nanku kuedi meji ne: bana bebe mbalue bonsu to. Mbashipe anu Amnone nkayende.

34Kabidi Absalome mmunyeme.

Nsongalume uvua wenza mudimu wa kutentekela, kumonaye bantu musumba balonda njila wa ku Oronayime. Kuyaye kuambila mukalenga Davide ne:

— Ndi mumone bantu balua kuneku, bapueka pa mukuna balonda njila wa ku Oronayime.

35Yonadabe kuambila kabidi Davide ne:

— Mukalenga, bana bebe bafiki! Bionsu mbienzeke anu bu mumvua mukuambile.

36Anu Yonadabe ujikija kuakula, bana ba mukalenga Davide kufika. Kudilabu miadi bikole. Mukalenga Davide muine, ne balombodi ba mu bukalenga buende bonsu, kudila bikole.

37Absalome mumane kunyema, kuya ku nzubu kua Talmayi, muana wa Amikude, uvua mukalenga wa mu ditunga dia Ngeshure.

38Kushalaye ku nzubu aku bidimu bisatu. Mataku onsu awu, mukalenga Davide uvua amu unyingalala bua lufu lua muanende Amnone.

39Kanyinganyinga kavua mukalenga Davide naku, bua lufu lua Amnone kamane kujika, tshiji tshivuaye mutekele Absalome kujika patshi.