1Bantu bonsu badi kabayi bamanya Mvidi Mukulu mbatshimbakane. Badi basanka bua bintu bilenga bidibu bamone, kabayi bamanye mua kusunguluja “Mvidi Mukulu mulelela.” Badi bamanya midimu idiye muenze, kadi kabayi bamanye muyenji.
2Bavua bela meji ne: nwidie idi iludika buloba ne kapia, lupepela, mvunde, mitotu idi inyunguluka mulu, nansha mayi adi apueka lubilu, nansha diba ne ngondu.
3Bantu bavua basanka pa kumona bulenga bua bintu ebi, ke pavuabu babielela meji ne: ke nwidie. Kadi badi ne bua kumanya ne: bintu bionsu ebi bidi ne Muludiki umue. Yeye ke udi mupite bifukibua bionsu ebi ku bunene. Bualu udi mubifuke ke mpokolu wa bulenga buonsu.
4Bantu padibu bakatshila bulenga buabi ne midimu yabi, bamanye ne mufuki wa bintu ebi ke muena bukole buonsu.
5Patuikala tumvua bunene ne bulenga bua bifukibua, tudi ne bua kumvuilemu kabidi udi mubifuke.
6Kadi katuena mua kupepeja bantu aba to. Misangu mikuabu bavua bapambuke bua kukeba Mvidi Mukulu ne kupetangana nende.
7Bu mudibu basombe munkatshi mua midimu yende, bavua bayikenketa, bayimona bu nwidie, bualu mbayimone miakane.
8Kadi bantu aba badi bena tshibawu.
9Bu mudibu ne lungenyi lukumbane lua kujandula malu a bantu, mudibu kabayi mua kujingulula Mfumu wa bintu bionsu ebi mmunyi?
Mpingu: tshilejilu tshia bakoshi ba nkunyi10Diakabi dienu, nuenu badi batekemena kudi bintu bidi kabiyi ne muoyi, badi bakukuila nwidie mienza kudi bantu, bimfuanyi bia nyama bifula ne mpawungi nansha ne tshiamu tshitoke tshia mushinga mukole, nansha bienza kale kudi bantu ne dibue dia patupu.
11Tangilayi tshilejilu tshia mukoshi wa nkunyi, udi ukosa mutshi mulenga, uuvula tshizubu ne mankenda, uupepeja ne meji, udi uwandamuna bintu bidi bilengelela bantu.
12Bua bizubu bia mutshi, udi ubiangata bua kulamba nabi biakudia, udia uukuta.
13Kadi mu bizubu bivua bishale bua kuimansha, muvua bidi kabiyi ne mudimu, mutshi mukonyangale muikale ne mapu. Udi uwangata, uusonga bua kujikija lutetuku. Udi uusonga, uwandamuna, uwenza mpala wa muntu,
14nansha uwenza tshimfuanyi tshia nyama. Kulabaye mukubu mukunze ku lupingu, kujikaye kalema kuonsu kadiku.
15Pashishe udi kulongoluela muaba muimpe, kupopela ku tshimana ne misumadi.
16Udi kutabalela bua kaluponyi, bualu udi mumanye ne lupingu elu kaluena mua kuimana nkayalu, mbimpe muntu alulame.
17Kadi padiye musue kutendelela bua bintu biende: dibaka diende, bana bende, ne mbua madimi ende, kena ne bundu bua kulomba kudi tshintu atshi katshiyi ne muoyi to. Udi ulomba bukole bua mubidi,
18kudi tshintu atshi katshiyi bukole bua mubidi. Kudi tshintu atshi tshifue, udi ulomba muoyi! Udi ulomba diambuluisha kudi lupingu, palu kaluyi nadi, ulomba luendu luimpe, lolu palu katshia kaluena luenda.
19Ludi ne bianza bidi kabiyi ne bukole bua kukuata, yeye udi ulomba diambuluisha bua bungenda a mushinga buende, bua mpetu yende ne bua mudimu wende, lolu palu kaluyi nadi.
Who We AreWhat We EelieveWhat We Do
2025 by iamachristian.org,Inc All rights reserved.
