1Maweja-Nangila wakafuka muntu ne diambuluisha dia buloba.
Kadi neamupingaje kabidi mu buloba.
2Wakafundila bantu tshikondu ne bungi bua matuku adibu mua kulala panu.
Wakabapesha bumfumu bua bionsu bia pa buloba.
3Uvua mubafuke ku tshimfuanyi tshiende.
Kubapeshaye bobu kabidi bukole.
4Uvua mubapeshe bukole bua kutangila nyama nansha nyunyi,
ne bua kutshinyisha bionsu bidi ne muoyi pa buloba.
6Uvua mubafuke
bua bakule, bamone ne bumvue.
Kubapeshaye bongu bua kuela meji.
7Kubapeshaye meji ne lungenyi,
kubaleja bidi bimpe ne bidi bibi.
8Mu mioyi yabu, kutekaye katupa ka butoke buende,
bua kubaleja bukole budiye ukuata nabu midimu yende.
10Nanku nebatumbishe Dina diende dia tshijila,
nebalondelangane bunene bua midimu yende.
Ndondu ne mikenji ya Mvidi Mukulu11Maweja-Nangila kena amu mupeshe bantu
mushindu wa kujingulula malu,
kadi mmubelele kabidi mikenji idi mua kubalombola bua bikale ne muoyi.
12Kutuaye nabu ndondu wa kashidi,
kubalejaye tshidiye musue.
13Mesu abu kumonawu butumbi buende,
matshi abu kumvuawu diyi diende dia bukalenga.
14Kubambilaye ne: “Nudilame ku bubi bonsu.”
Kubambilaye tshidi muntu yonsu ne bua kuenzela mukuende.
Mvidi Mukulu udi umona bionsu bidi bantu benza15Maweja-Nangila udi umona diba dionsu malu adi bantu benza.
Udi muamanye onsu, kakuena budi bumusokome.
17Maweja-Nangila udi mupeshe tshisamba tshionsu watshi mfumu.
Kadi bena Izrayele mbantu ba Maweja-Nangila.
19Malu onsu adi bantu benza adi patoke kumpala kuende,
udi utabalela ngenzelu yabu yonsu.
20Maweja-Nangila kena mupange malu mabi adi bantu benza.
Mibi yabu yonsu udi muyimone.
22Dipa dia pa luse didi bu tshitampi
ku mesu kua Maweja-Nangila.
Udi uvuluka bualu buimpe,
bu mudi muntu ukuba kamonyi ka disu diende.
23Dituku dikuabu neafute bantu,
amu mudi ngenzelu yabu.
24Kadi, badi badilengeja neabape mushindu wa kupinganabu kudiye.
Neakoleshe ku muoyi bantu badi kabayi ne ditekemena.
Meji adi abela bantu bua kupingana kudi Maweja-Nangila25Pingana kudi Maweja-Nangila, benga mibi yebe.
Umusengelele, ulekele bubi.
26Pingana kudi Mvidi Mukulu, Muena Kulu,
lekela malu mabi.
Benga bualu bubi kashidi kashidi.
27Udi mua kutumbisha Mvidi Mukulu ku bafue nnganyi?
Amu bantu batshidi ne muoyi ke badi mua kumutumbisha!
28Padi muntu ne muoyi ne makanda a mubidi,
udi mua kutumbisha Maweja-Nangila.
Yeye katshiyiku, mumane kufua,
nkujika, kena mua kumuvuluka kabidi to!
29Luse lua Maweja-Nangila nduvule.
Udi ufuila bonsu badi baya kudiye luse!
30Bualu muntu kena ne bukole bua kuenza malu onsu bimpe to,
bualu muntu kakushala ne muoyi pa buloba kashidi.
31Kudi tshidi tshipita diba ku bukenke anyi?
Kadi, diba didi dibuitshidila, dibuela.
Ke mudi muntu udi wela meji a kuenza malu mabi.
32Mvidi Mukulu udi uludika mabulunge a mulu.
Kadi bantu bonsu badi amu buloba ne butu!
Who We AreWhat We EelieveWhat We Do
2025 by iamachristian.org,Inc All rights reserved.
