Meji 14 - MUKANDA WA MYIDI MUKULU（TSH96）

Tshilejilu tshikuabu tshia ditendelela mpingu

1Muntu mukuabu udi musue kuya ne majuwa pa mayi manene a mavuala mavule. Udi ulomba diambuluisha kudi katupa ka mutshi, kadi kakayi nansha ne bukole bu majuwa adi amuambula.

2Muntu mmuenze majuwa aa bua lukuka lua biuma. Muntu muena meji ngudi muenze.

3Kadi Tatu, wewe udi wendesha majuwa aa bimpe, wewe udi muenzele njila mulelela pa mavuala a mayi manene.

4Nenku, nansha bantu bine badi kabayi bamanye mua kuenza, badi mua kuenda pa mayi manene, bualu wewe udi mua kubapandisha ku njiwu yonsu.

5Udi musue bua bantu bangate midimu yebe, iudi muenze ku Meji ebe, bua kudiambuluisha nayi. Nenku bantu badi mua kusabuka mayi manene ne majuwa, kabidi bapingana ku mukuna kabayi kalu, nansha bobu batekemena kudi buatu bukese.

6Malu a momumue avua menzeka ku kale, diba divua tshisamba tshia ditambisha tshia bantu banene bale babutuka. Bantu bavua batekemena bua kubutama mu buatu, buatu buuvua wendesha wewe, buakashiya dimiinu dia ndelanganyi mipiamipia pa buloba.

7Ke pavua buatu bua Nowa buela lupemba, bualu ke buvua buenza mudimu wa kuambula bantu bakane.

8Kadi diakabi ndia lupingu lusonga kudi muntu ne dia mulusongi walu. Bualu nansha yeye mulusonge ne bintu bita binyanguka, kadi ukadi ulubikila ne: nwidie! Badi balusonga ne mutshi udi ubola.

9Mvidi Mukulu udi ubenga munemeki wa mpingu, ubenga kabidi ne mpingu idiye muenze.

10Neanyoke lupingu ne udi muluenze kabidi.

11Nenku Mvidi Mukulu neabutule mpingu ya bisamba bikuabu. Bualu nansha yoyi mienze ne binta bidi Mvidi Mukulu mufuke, idi mpindiewu binta bibi bitambe, bidi bibipisha bantu, kabidi idi ipambula bantu batshimbakane.

Muaba udi mpingu mifuana bantu mifuma

12Bantu bakataadija kutombokela Mvidi Mukulu, pakenzabu mpingu. Bavua badikebela lufu, bua pavuabu bakumbaja dijinga diabu dia kusonga mpingu.

13Mpingu kayivua ku ntuadijilu to, kabidi kayakuikalaku kashidi to.

14Mpingu mmibuele mu bantu bua bitabataba biabu. Nanku neijike lukasa.

15Tatu kampande uvua mubungame bua lufu lua tshikosu lua muanende. Ke kuenzaye tshimfuanyi tshia muanende uvua mufue ne buana awu. Kutuadijaye kunemekela mufue awu bu nwidie wende, kabidi kulongeshaye bana babu bua kumutendelela, kabidi ne bidibu ne bua kuenza ne kuamba pa ditendelela adi.

16Ku kakese, ku kakese, tshibidilu tshibi etshi kuenda tshishindama. Pashishe tshibidilu etshi kushala diyi diela kudi bamfumu.

Ke muvua bantu bakukuila mpingu, balonda muvua diyi dia bamfumu babu nanku.

17Diba divua bantu base kule ne bamfumu babu, kabayi ne mushindu wa kubanemekela bimpe, bavua benza lupingu lua mfumu ewu uvuabu kabayi bamona ne mesu. Nanku bavua benza tshimfuanyi tshia mfumu tshivuabu mua kumona ne mesu abu. Ke muvuabu bela meji ne: tudi tunemeka tshintu tshitudi tumona, ne muoyi wa kunemeka utudi katuyi tumona.

18Nansha bine bavua kabamanyi mfumu, basongi ba mpingu pa kuenza mudimu wa lupingu ne disuminyina, bavua balulengeja mushindu wa kusaka bantu ku dilutendelela.

19Bualu musongi wa mpingu uvua ne dijinga dia kulengelela mfumu. Ke pavuaye usonga tshimfuanyi tshimpe tshipite ne mfumu muine ku bulenga.

20Nenku bantu bamone bulenga bua tshimfuanyi, tshia uvuabu banemeka kumpala bu muntu, mpindiewu badi batuadija kumukukuila bu nwidie wabu.

21Ke muakapambuka bantu nanku. Bavua bapambuka bua makenga nansha bua bamfumu, pavuabu banemeka katupa ka mutshi, nansha dibue pa mutu pa kunemeka Mvidi Mukulu umuepele.Bipupu bidi bifuma ku dinemeka mpingu

22Kabidi, kabavua bamanye Mvidi Mukulu bimpe to. Bavua munkatshi mua ndululu. Kadi ndululu ayi bavua bayidika ne: mbupole.

23Bavua balambula bana pa kutendelela nwidie yabu, benza malu makuabu mu musokoku, baditua ku malu a bundu, balonda bibidilu bibi bia buendenda.

24Kabavua banemeke nansha muntu, nansha nsombelu wa mu dibaka diende. Muntu uvua ushipa munga pa kumupangila, nansha umuenzela bibi bipite pa kuenza buendenda ne mukajende.

25Miaba yonsu badi batela amu bilumbu bia bantu badi bela mashi a bantu nabu panshi, badi bashipangana, biba bintu bia bende, bashimangana, balakana, banyanga mabaka, batombokela bamfumu, batshipa mitshipu ya dishima.

26Badi babueja tshimvundu munkatshi mua bantu bakane, bapingaja bubi pa buimpe buvuabu babenzela, balengulula bibidilu bilenga. Balume kuangatangana bu bakaji, badi bashipa mabaka, benda buendenda, benza malu mabi a mishindu yonsu.

27Padi bantu banemeka mpingu, ivuabu kabayi nansha mua kutela dina diayi mukana, ke mbangilu ne ndekelu wa bubi buonsu ne tshiledi tshiabu kabidi.

28Badi banemeka mpingu, badi bapanga mua kudilama ku bubi, badi balongesha dishima, bienza bu malu malelela, badi basombela amu bubi, badi bupula ndondu kabayi belakana.

29Badi bakula malu a dishima, baditshipa. Kabena bamona ne badi mua kupeta dinyoka to. Bualu mpingu idibu batekemena kayena ne muoyi to.

30Kadi nebabanyoke bua malu abidi: bangabanga bualu kabena bamanye Mvidi Mukulu bimpe, pashishe badi bapepeja bidi bia tshijila, batendelela ne nwidie, baditshipa bua kushima bantu.

31Padi bantu babi benza bualu bubi, badi babanyoka. Tshidi tshibanyoka ki mukole bua tshidibu batela pa kuditshipa. Kadi tshidi tshinyoka tshidi amu buakane budi bulondakaja muenji wa bubi.