1 Tesalonike 3 - MUKANDA WA MYIDI MUKULU（TSH96）

1Kadi katuvua mua kushala bindile amu kuindila nansha. Ke patuvua bashindike mua kushala nkayetu mu Atene.

2Tuvua banutumine Timote. Yeye ke muanetu utudi tukuatshila nende Mvidi Mukulu mudimu wa kumanyisha bantu Lumu lua Disanka lua Kristu. Tuvua banutumineye bua anukankamike, anukoleshe ku muoyi mu ditaba dienu.

3Nanku muntu nansha umue wa kunudi katenkakanyi mu ditaba, padibu batukengeshe. Nudi bamanye ne: makenga a nanku adi amue a ku malu adi Mvidi Mukulu mutulongoluele.

4Bualu patuvua nenu, tuvua badianjile kunumanyisha ne: nebatukengeshe. Ke bidi bienzeka ebi, munudi badimuene.

5Nanku bu mumvua tshiyi mua kuindila kabidi, meme kutuma Timote, bua adijadikile munudi nutungunuka mu ditaba. Mvua ntshina ne: bumue diabolu udi mua kunuteta, kunyanga mudimu wonsu utuvua benze.

6Kadi mpindiewu Timote mmupingane kunu, utumina kuenu aku. Uvua mutumanyishe munudi nuenda mu njila wa ditaba, ne wa dinanga. Uvua mutuambile munudi batunange, batuvuluke. Nudi nujinga kutumona tshiakabidi, amu mutudi tujinga kumonangana nenu.

7Nanku, bana hetu, mu ntatu yonsu, ne mu makenga, bitudi nabi lelu, malu atuvua bumvue bualu buenu adi atukolesha ku muoyi. Ditaba dienu didi ditukankamika.

8Bualu mpindiewu tudi bafululuke, bualu nudi badisange ne Mfumu ne muoyi umue.

9Disanka dionsu dinudi nutusankisha nadi kumpala kua Mvidi Mukulu wetu, katuena ne miaku mikumbane ya kumuela nayi tuasakidila.

10Munya ne butuku tudi tumulomba, tumusengelela, bua tumonangane nenu mpala ne mpala, tukumbaje malu a ditaba dienu atshidi mashale.

11Mvidi Mukulu ne Tatu wetu, kabidi ne Mfumu wetu Yezu Kristu, batulongoluele njila, bua tufike kuenu bua kunumona.

12Mfumu adiundishe dinangangana dienu, ne dinanga dinudi nunanga nadi bantu bakuabu bonsu, dikale difuanangane ne ditudi banunange nadi.

13Mvidi Mukulu akoleshe mioyi yenu. Nanku nenuikale bantu ba tshijila, bakane tshishiki, kumpala kua Mvidi Mukulu Tatu wetu, diba diafika Mfumu wetu Yezu Kristu ne bende bonsu.