Mika Diumvuija - MUKANDA WA MYIDI MUKULU（TSH96）

Diumvuija— Muambi Mika uvua wenza mudimu wa buambi mu tshikondu tshia muambi Yeshaya, biangatshile ku tshidimu bu tshia 740 too ne ku bu tshia 700 bgbg ne Y.K. Uvua ulongesha bantu ba mu bukalenga bua Yuda, mu tshikondu tshivua bena Ashure babaluisha.Mika udi umanyisha badiye ulongesha ne: bu muvuabu bakuate Samariya, tshimenga tshikulu tshia bukalenga bua Izrayele, mu tshidimu bu tshia 721 bgbg ne Y.K., baluishi nebakuate kabidi tshimenga tshikulu tshia Yerushalayime, ne ditunga dijima dia mu bukalenga bua Yuda. Mika udi ubabela ne: nenubutuke bualu bua mibi yenu, nangananga bualu nudi nukengeshangana. Mu dina dia Mvidi Mukulu, muambi udi ulumbuluisha nangananga bantu baneme, ne badi ne mianzu: ke badi ne madimi mapite bunene, kabidi a bungi; ke balombodi ba bena ditunga; ke bandumbulula, ne batuangaji. Mika udi ukanyina kabidi bambi bakuabu badi badinga bantu, babambila ne: dikenga kadiakunukuata to. Ke mudibu kabayi bambuluisha bantu bua badikonke, badilengeje. Mika pende udi musue kubela badiye ulongesha, bua bele meji bimpe, basungule njila wa diakalenga dilelela: ke kukumbaja bidi Mvidi Mukulu musue, nangananga pa kunemeka ne kunanga bantu (6.8). Nansha yeye mubela bantu nanku, udi ubamanyisha kabidi mudi Mvidi Mukulu musue kuenza malu a dikema mapiamapia matuku atshivuavua, bua kusungidila bantu bende.Nanku mukanda wa Mika udi ulongesha, usambakaja malu abidi:1. Mvidi Mukulu udi umanyisha bantu bende muavuaye kubalumbuluisha, kubanyoka (bit. 1-3; 6.1—7.7);2. udi ubalaya kabidi muavuaye kubasungidila (bit. 4-5; 7.8-20), ku mudimu wa mfumu wa ku ndelanganyi ya Davide, uvuavua kubalombola bimpe (5.1-4a.)