Meji 4 - MUKANDA WA MYIDI MUKULU（TSH96）

1Pa mutu pa kulela bana, mbipite buimpe kuenza malu makane! Bantu badi benza nanku nebabavuluke kashidi. Badi babatumbisha kudi Mvidi Mukulu ne kudi bantu nabu.

2Patshidibu ne muoyi, bantu badi bidikija ngenzelu yabu. Padibu bafue, bantu badi babajinga. Mu muaba wa butumbi bua kashidi, badi bapeta nsala wa kalumbandi. Bualu mbatshimune mvita, bua kupetabu difutu dipite bulenga.

3Bantu badi balengulula Mvidi Mukulu, bana babu nebikale bantu tshianana. Nansha bobu bavulangane, kabena batanta to, bualu mbakoleshe bibi.

4Nansha bobu kabayi banji kukola, badi bu matamba a mitshi idi kayiyi ne miji mikole, adi anyunga ku lupepele. Padilu lukuma bikole, matamba adi atshibuka.

5Malala a mabue neatshibuke kaayi manji kukola, ngaji mibishi kabena mua kuyidia, bualu kayena mimpe, muntu kena ne tshidiye mua kuenza nayi.

6Bana balela mu buendenda, nebapangishe baledi babu diakalenga dituku dia tshilumbuluilu.

Mudi muntu muakane ufua kayi muanji kukola

7Muntu muakane nansha yeye mufue kayi muanji kukola, udi upeta dikisha dia kashidi.

8Bukalakaja budi bukengela kanemu. Kadi kabena banemeka muntu bualu ukadi mukulakaje, nansha ukadi ne bidimu bia bungi to.

9Kuikala muntu wa meji, ki nkuikala ne nsuki mitoke to. Nsombelu wa muntu kayi kadiwu, mmupite bukulakaje.

10Muntu udi ne nsombelu mulenga, udi ulengelela Mvidi Mukulu. Nenku Mvidi Mukulu udi umunanga. Padi muntu awu munkatshi mua bantu babi Mvidi Mukulu udi umuambula mulu.

11Badi bamumusha bua ngenzelu mibi kayinyangi lungenyi luende, nansha bua dishima kadinyangi muoyi wende.

12Bualu bukole bua bubi budi bumusha ngenzelu mimpe, kabidi majinga mabi adi umusha lungenyi lulenga.

13Muntu ewu upetele buakane mu bidimu bikese, bupite buvuaye mua kupeta mu bidimu bivule.

14Nsombelu wende uvua usankisha Maweja-Nangila, ke pavuaye mumumushe lukasa munkatshi mua bantu babi. Bantu bakamona bionsu abi, kadi kabena bumvua, nansha bamanye tshidi bualu ebu buleja ne:

15Mvidi Mukulu udi ulengelela bantu bende, badiye musungule, kabidi udi ukuba bamulamatshi bende.

16Nenku padi muntu muakane ufua, ngenzelu wende udi ubipila muntu mubi, udi mushale ne muoyi, utombokela Mvidi Mukulu. Ngenzelu milenga ya nsonga utshidi ne muoyi, idi ibipila mukulumpe muenzayi.

17Padi muena meji ufua, bantu kabena bamanye tshidi Maweja-Nangila musue kumuenzela bua kumufila mu muaba wa dikisha.

18Bantu badi baseka muena meji padiye ufua, kadi bobu ke badi Maweja-Nangila useka.

19Bobu bafue, tshitalu tshiabu kabakutshijika to. Mu muaba wa bafue nebabaseke amu kubaseka kashidi. Mvidi Mukulu neabumushe muaba udibu, alembeleje mitu yabu panshi bela mikolu mulu, bua bapange mua kuakula. Nebapange tshia kuenza, bashale mu dikenga dia kashidi, muntu nansha umue kayi mua kubavuluka.

Bantu badi bapepeja Mvidi Mukulu nebakenge

20Pikala Mvidi Mukulu ubalumbuluisha pa bubi buabu, bantu aba nebatshine mua kusemena pabuipi ne Mvidi Mukulu, bilema biabu bionsu nebibasonguele kabidi bibapisha.