Osheya Diumvuija - MUKANDA WA MYIDI MUKULU（TSH96）
Diumvuija— Osheya kubanga mudimu wende wa muambi wa Mvidi Mukulu mu bukalenga bua Izrayele (bukalenga bua kulu) bu bidimu dikumi panyima pa muambi Amosa, mmomumue ne: bu mu 750 bgbg ne Y.K. Neakuate mudimu wende wa muambi bidimu bu makumi abidi ne bitanu, mmomumue ne: bu too ne ku tshikondu tshiwa bena Ashure bakuate tshimenga tshia Samariya, bukalenga bua Izrayele kujimina (722-721).Mu tshikondu atshi (tangila 2 Bak 14.23—17.23), bumfumu bua mu ditunga budi busunsukangana bibi: bukalenga bua Yerobowame II bumane kujika (tangila diumvuija ku 1.1 ne ku 1.4), bena Ashure kujukila kulu ne bulobu. Eku paku mu Samariya misangu ne misangu mbashintulule bakalenga ku bukole, babumushe mu nkuasa ya bumfumu, babanjije bantu bakuabu, badi balongolola malu mu ditunga mushindu udi ubengangana ne muvua bavua babadianjidila mu nkuasa benza. Lupongu palu luenda ludiunda munkatshi mua bena biuma bakese badi ne bionsu, ne bapele bapite bungi badi bianza bitupu. Nanku Amosa ukavua mumane kubela bantu bua dishilangana edi dipite bunene. Kadi nangananga ditaba dia bantu ba Mvidi Mukulu didi dienda dikepela: bavule bakadi batuadija kutendelela mvidie ya bena Kenaane (tangila diumvuija ku 1.2.)Bionsu abi, Osheya udi ubilongesha ne tshimfuanyi tshia makenga a mu dibaka. Bu muvuaye usunsuka muoyi wa munda, pavua mukajende kayi muangate dinanga diende ne mushinga, ke mudi Mvidi Mukulu umvua dikenga padi bantu bende bamubenga (diba adi badi bu mukaji, muena buendenda, udi ukeba balume bakuabu, ushiya wende udi umunanga.) Kadi bu mudiye umunanga, udi amu utekemena ne: mukajanyi neadilengeje, neapingaje muoyi wende kundi, bua tunangangane muetu mua bangabanga (14.2-10.) Pa kulongesha mudi diumvuangana dia Mvidi Mukulu ne bantu, ne bua kuikala nangananga dia dinanga, bu dia mulume ne mukaji badi banangangana bimpe, Osheya ukadi ulongesha malu atudi tusangana mu Lumu lua Disanka (Mat 9.13; 12.7.)Mu mukanda wa Osheya ki mbasangishe malongesha malondangane bilondeshile bidimu biwabu baalongesha, kadi bilondeshile malu adibu balongeshamu:— Bit. 1-3: malu a mu dibaka dia Osheya, ne dilongesha didi munda muawu.— 4.1—9.9: malu adi munkatshi mua Izrayele ne Mvidi Mukulu wende.— 9.10—14.1: miji ya bubi bua bena Izrayele buvua butuadija kale bua kubenga Mvidi Mukulu.— 14.2-10: dinanga dia Mvidi Mukulu didi dipite bionsu.
