Yudite 14 - MUKANDA WA MYIDI MUKULU（TSH96）

Akiyore udi witaba dilongesha dia bena Izrayele

1Yudite kuambila bena Yuda ne:

— Bana betu telejayi. Angatayi mutu ewu, nuulembeleje kulu kua tshimana tshia tshimenga tshietu.

2Kadi patshiabu ne dinda padi diba dipatuka, muntu yonsu angate biende bia myita. Bantu bonsu badi ne dikanda bapatuke mu tshimenga. Nusungule mulombodi. Enzayi bu badi basue kupueka mu mpata batangile miaba idibu balama kudi bena Ashure. Kadi kanupueki to.

3Baluishi ba bena Ashure nebangate bia myita biabu, nebaye mu mitanda yabu, bua kubikila balombodi babu ba myita badi ku mutu kua bakuabu. Nebaye lubilu ku ntenta wa Oloferne, kadi kabakumusangana ne muoyi to. Bowa nebubakuate, nebanunyeme baye kule.

4Nuenu ne bantu bonsu badi base mu ditunga dia bena Izrayele, nenubalondakaje, nenubashipele mu lubilu alu.

5Kadi bangabanga, bikilayi Akiyore, muene Amone, uvuaye mmutumina apa bua tuetu tufue pamue nende, bua amone ne amanye mutu wa muntu uvua upita kupepeja bena Izrayele.

6Bobu kubikila Akiyore mu nzubu mua Oziyase. Padiye ufika, umona mutu wa Oloferne mu tshianza tshia muntu uvua mu tshisangilu, kuponaye panshi ne bowa, lungenyi kuanji kumujimina.

7Bobu kumujula, yeye kudiela ku makasa a Yudite, umunemekela wamba ne:

— Bantu badi mu ntenta ya bena Yuda, bakuele lupemba. Bisamba bionsu padibi biumvua batela dina diebe, nebizakale.

8Kadi mpindiewu, undondele tshiudi muenze mu matuku aa. Yudite kumulondela muvua bualu, bantu bonsu bateleja, bituadija ku dituku divuaye mupatuke mu tshimenga too ne ku diba divuaye uyukila malu adi.

9Yeye mumane kubalondela bualu bujika, bantu kuela bibingu bikole bia disanka biumvuika mu tshimenga tshionsu.

10Akiyore kujingululaye bionsu bivua Mvidi Mukulu wa Izrayele muenze, kulamataye Mvidi Mukulu ne muoyi mujima. Kumutekabu panshi, kuitabaye dilongesha dia bena Izrayele too ne ku lelu.Bagoyase udi utandula lufu lua Oloferne

11Butshia ne dinda dionsu, bena Izrayele kulembeleja mutu wa Oloferne ku tshimana tshia tshimenga. Bantu kuangata bia nwita, kupatukabu balondangana mu bisumbu bapueka pa kapulumuku ka mukuna.

12Padi bena Ashure babamona, badi batume bena mvita bua bamanyishe balombodi babu ba bena myita. Balombodi aba, kuambilabu balombodi bonsu ba myita bualu abu, ba bisumbu bikese ne ba bisumbu bidi ku mutu kua bakuabu.

13Padi balombodi ba myita aba bafika ku ntenta wa Oloferne, badi bambila Bagoyase uvua ulama bintu bia mulombodi wa myita, mfumu udi ku mutu kua bakuabu, ne:

— Bisha mulombodi udi ku mutu kuetu ku tulu. Bapika bena Izrayele aba, badi bakimina bua kulua kutubunda ne myita.

14Bagoyase, kubuela mu kukokola ku tshiibi ntenta. Uvua muele meji ne: Oloferne mbalale ne Yudite.

15Kadi muntu kavua mumuandamune to. Ke kumushaye tshilamba tshia ku mbelu bua kubuela mu tshibambalu tshia kulala. Kusanganaye tshitalu tshia Oloferne tshikosa mutu tshilekela pa kabasa.

16Bagoyase kuasa muadi, kuela kasala, kuela mbila, kudipanda bilamba biende.

17Kubuelaye mu ntenta uvua Yudite ulala, nansha kumusangana. Kunyemenaye mutangila kuvua balombodi bavule ba bena myita wela diyi dikole ne:

18— Bapika aba mbatupotela! Mukaji umuepele wa bena Ebrewu mmufuishe mukalenga Nebukadnesare ne nzubu wende mujima bundu. Bualu Oloferne mmufue panshi, mukosa mutu!

19Amu bamfumu ba tshiluilu tshia bena Ashure bumvua nanku, kupandabu mintumpu yabu, kubindulukabu mioyi munda bikole, kuelabu mbila ne bibingu, kumvuikabi mu mitanda muonsu.