Yowele 1 - MUKANDA WA MYIDI MUKULU（TSH96）

1Telejayi miaku ivua Maweja-Nangila mumanyishe Yowele, muana wa Petuwele.

Mpasu ne minanga nebinyange buloba

2Nuenu bakulu, umvuayi!

Nuenu bonsu badi basombe mu ditunga dia Yuda, telejayi!

Bualu bua mushindu ewu mbumane kuenzeka

mu tshikondu tshienu,

nansha tshia bankambua benu anyi?

3Nubuambile bana benu:

bana benu babuambile babu bana,

bua bambile ndelanganyi idi ilonda.

4Tshintu tshiyuabu bashiye mu madimi kudi meshi,

nebatshidie kudi mpasu;

tshiwa mpasu mishiye,

nebatshidie kudi mintuntu;

tshivua mintuntu mishiye,

nebatshidie kudi mpasu ya mikumbi.

5Nuenu bakuatshiki ba maluvu, jukayi, dilaayi!

Nuenu bonsu banu ba nwinyo, asayi miadi!

Bualu bishi mbimane kudia tumuma tuonsu;

nanku kanuakunua kabidi nwinyo mupiamupia!

6Bualu tshisumbu tshia mpasu

ntshibuele mu ditunga dietu.

Mpasu mmipite bungi, kabayi mua kuyibala.

Idi ne lukuka, ne menu bu a nyama wa ntambue,

ne mbanga bu ya ntambue mukaji.

Idi inyanga madimi etu a mionji ya nwinyo,

7ibutula mitshi yetu ya mfiku butubutuu,

iyikunya, iyivula bizubu,

ishiya amu ku matamba kutooka too.

8Asayi muadi, mudi mukaji utshidi nsongakaji wenza mu madilu,

udila bayende utshivua umuselelaku!

9Batuangaji badi benzela Maweja-Nangila mudimu, badi badila,

bualu bantu kabatshiena bafika

mu nzubu wa Mvidi Mukulu,

ne milambu ya ntete, nansha ya maluvu.

10Madimi mmanyangakaja,

buloba mbuume.

Kamutshiena ntete ya kuenza bukula,

kanutshiena maluvu.

Kamutshiena mafuta, nansha dimata!

11Babidime badi bapampakana,

bena madimi a mionji ya nwinyo badi bateketa mu maboku,

bualu ntete yonsu mmijimine,

bia pa madimi bionsu mbifue.

12Mionji ya nwinyo mmiume,

mitshi ya mfiku mmifube.

Mitshi yonsu ya bimuma mmishawuke.

Disanka dionsu ndijike

munkatshi mua bantu.

Nujile biakudia, nutendelele Maweja-Nangila

13Nuenu batuangaji, vualayi bilamba bia mu madilu!

Nuenu badi benza mudimu ku tshilambuilu, dilayi!

Nuenu bantu ba Mvidi Mukulu wetu,

luayi, bungamayi butuku bujima!

Bualu milambu ya ntete, nansha ya maluvu,

kabatshiena bafika nayi mu nzubu wa Mvidi Mukulu.

14Nuele diyi bua bantu bajile biakudia,

nubueje tshisangilu tshinene,

nusangishe bakulu, ne bantu bakuabu bonsu ba mu ditunga,

bafike mu nzubu wa Mvidi Mukulu wetu,

bamusengelele bua atuambuluishe.

Dituku didi Maweja-Nangila ufika munda

15Eyi, dituku didi dikuatshisha bowa,

dituku didi Maweja-Nangila ufika munda, dikadi pabuipi.

Didi difika pamue ne kabutu

kavua Mvidi Mukulu wa bukole buonsu mumane kujadika.

16Bu mudi biakudia bietu bijimine,

katuyi mua kuenza bualu,

ke mudi disanka ne musangelu biumuke

mu nzubu wa Mvidi Mukulu wetu.

17Maminu mmumine mu mabuwa a buloba.

Mu mayeba mudi mushale mutupu,

nzubu ya kulamina biakudia mmiupuke,

ntete yonsu mmijike.

18Telejayi mudi nyama itua mikemu!

Bisumbu bia ngombe bidi bitambakana nseke yonsu,

bualu kayena kabidi ne bisosa bia kudia.

Mikoku mene idi ifua.

Muambi udi utendelela Mvidi Mukulu

19Maweja-Nangila, wewe ke undi mbikila!

Kapia nkoshe bisosa bia mu mpata,

ndimi ya kapia mmidie mitshi yonsu ya mu madimi.

20Nyama ya tshisuku idi ikudidila,

bualu misulu ya mayi mmikame.

Kapia nkashidishe bisosa bia mu mpata.