Tobite 12 - MUKANDA WA MYIDI MUKULU（TSH96）

Rafayele udi udimanyisha

1Tshibilu tshia dibaka tshimane kujika, Tobite kubikidisha muanende Tobiyase, umuambila ne:

— Muananyi, anyisha bua ufute muntu uvua muye kukufila ku luendu, ubandishe difutu diende adi.

2Tobiyase kukonka tatuende ne:

— Tatu, ndi mua kumufuta makuta bungi munyi? Nansha meme mumupeshe tshia bibidi tshia lupetu lutudi bavua nalu, tshiena mujimije kantu to.

3Mmumpingaje kakuyi bualu bubi nansha bumue bungenzekele. Uvua muipate mukishi mubi uvua utatshisha mukajanyi. Uvuamungambuluishe bua meme kupeta makuta, kabidi uvua mujikije disama diebe. Bua bionsu ebi, ndi mua kumufuta tshinyi?

4Tatu kuandamuna muana ne:

— Mbikumbane bua kumufuta tshia bibidi tshia ku bionsu binudi bafike nabi.

5Tobiyase kubikila Rafayele, umuambila ne:

— Udi wangata difutu diebe, tshia bibidi tshia bionsu bitudi bafike nabi. Pashishe, mpindiewu udi mua kupingana ne ditalala kuenu.

6Rafayele kubangata bonsu babidi, kuya ku mpenga, ubambila ne:

— Elayi Mvidi Mukulu tuasakidila, numutumbishe kumpala kua bionsu bia muoyi bua bilenga bidiye munuenzele, bua biobi kumutumbisha, kumusaka ne mu misambu. Manyisha bantu bonsu midimu idi Mvidi Mukulu mukuate, kabidi ne mudiyo miakane. Kanuena mua kulekela kumusamuna to.

7Bidi bimpe, kusokoka malu masokome a mukalenga, kadi midimu ya Mvidi Mukulu idi mikumbane kuyisokolola patoke bua bantu bayikobole.

“Enzayi bimpe, bualu bubi nansha bumue, kabuena mua kunuenzekela to.

8Kutendelela Mvidi Mukulu ne muoyi umue, kabidi ne kupeshangana bintu bia luse bua kulengelela Maweja-Nangila, kudi kupita biuma bipeta ku buenzayi. Bidi bipite buimpe kupesha bapele tshintu tshia pa luse pa mutu pa kukunguja mpawungi.

9Bualu tshia pa luse tshifila ne muoyi wa kalolu tshidi tshiepula muntu ku lufu, kabidi tshidi tshiumusha mikiya yonsu. Bantu badi bapesha bapele tshia pa luse, badi balala panu bikole.

10Kadi bantu badi benza bibi kabidi ne kansungasunga badi badienzela amu nkayabu bibi.

11“Kadi mpindiewu ndi nnuleja bualu patoke tshiyi nnusokoka. Mvua nnumanyisha ne: bidi bimpe kusokoka malu adi mukalenga muele meji, kadi mbimpe kusokolola patoke midimu ya Mvidi Mukulu ne bukole buayi buonsu.

12Nenku, umanye ne: Pauvua utendelela, wewe Tobite, Sara uvua kabidi utendelela pende. Amu meme ke uvua mufikishe malomba enu kudi Maweja-Nangila wa butumbi. Mvua mumuleje kabidi malu ebe, pauvua ujika bitalu.

13Pauvua mujuke ku mesa kuyi welakana. Uvua mushiye biakudia, muye kujika tshitalu, amu diba adi, Mvidi Mukulu kuntuma kuudi bua meme kukuteta.

14Kadi uvua muntume kabidi bua kukondapa, wewe ne Sara mukaji wa muanebe.

15Meme ndi Rafayele, ndi umue wa ku batumibue muanda mutekete ba Mvidi Mukulu, badi bimana amu kumpala kua Maweja-Nangila wa butumbi bua kumukuatshila mudimu.”

16Tobite ne muanende, kutabuluka, kumvua bowa, kuinamabu panshi.

17Mutumibue wa Mvidi Mukulu kubambila ne:

— Kanutshinyi to. Nuikale ne ditalala, nuele Mvidi Mukulu tuasakidila bikondu bionsu!

18Pamvua kuudi, kabivua bua malu mempe anyi to. Kadi Mvidi Mukulu ke uvua musue. Amu yeye ke uudi mua kuela tuasakidila, kumutumbisha dituku dionsu paudi ne muoyi.

19Panuvua bammona meme bu uvua udia, tshi vua ndia nansha, bivua amu mu meji enu amu.

20Nanku, tumbishayi Maweja-Nangila panu. Nukobole bukole bua Mvidi Mukulu. Kadi meme mpindiewu, ndi mpingana kudi uvua muntume. Nuenu, nufunde bionsu bivua binuenzekele.

Pashishe Rafayele kubanda mu diulu.

21Nenku, Tobite ne muanende kubanduluka, kadi kabavua mua kumumona kabidi to.

22Kutumbishabu Mvidi Mukulu ne misambu, bavua basamuna midimu idiye muenze, ne bua dimueneka dia mutumibue wende uvua mubamuenekele bua kubambuluisha.