Dibadika 1 - MUKANDA WA MYIDI MUKULU（TSH96）

BENA IZRAYELE MU TSHIPELA TSHIA SINAYIBadi babadika bisamba bia bena Izrayele musangu wa kumpala

1Dituku dia kumpala dia ngondu muibidi wa tshidimu tshivua tshilonda tshidimu tshia dipatuka diabu mu Ejipitu, Maweja-Nangila kuyukila ne Moshe mu tshipela tshia Sinayi, mu ntenta wa kusambakena, umuambila ne:

2— Wewe ne Arone, nubadike bena Izrayele bonsu. Nufunde mena a bantu balume bonsu ku muntu ku muntu, bilondeshile meku abu ne bisamba biabu.

3Nubadike, nufunde mena a bantu balume bonsu badi ne bidimu makumi abidi ne pa mutu, bikale ne bukole bua kuenza mudimu mu bisumbu bishilangane bia tshiluilu tshia bena Izrayele.

4Nuangate mfumu wa diku ku tshisamba tshionsu bua anuambuluishe.

5Ke mena a bamfumu abu badi ne bua kunuambuluisha: mu tshisamba tshia Rubene: Elishure, muana wa Shedeyure;

6mu tshia Shimeyone: Shelumiyele, muana wa Surishadayi;

7mu tshia Yuda: Nashone, muana wa Aminadabe;

8mu tshia Isakare: Netaneyele, muana wa Shuware;

9mu tshia Zebulone: Eliyabe, muana wa Elone;

10mu tshia Efrayime, muana wa Yozefe: Elishama, muana wa Amikude; mu tshia Menashe, muana wa Yozefe: Ngameliyele, muana wa Pedashure;

11mu tshia Binyamine: Abidane, muana wa Ngideyoni;

12mu tshia Dane: Akiyezere, muana wa Amishadayi;

13mu tshia Ashere: Pagiyele, muana wa Okrane;

14mu tshia Ngade: Eliyasafe, muana wa Deyuwele;

15mu tshia Naftali: Akira, muana wa Eyinane.

16Ke mena a bamfumu ba meku bavuabu basungule balombodi ba bena mvita ba mu bena Izrayele.

17Moshe ne Arone kuangata bantu bavuabu basungule abu bua bikale babambuluishi babu.

18Nanku, dituku dia kumpala dia ngondu muibidi, Moshe ne Arone kusangisha bantu bonsu. Kufundabu ku muntu ku muntu, bilondeshile meku ne bisamba biabu, bantu balume bonsu bavua ne bidimu makumi abidi ne pa mutu.

19Dibadika dia bantu adi divua dienzeka mu tshipela tshia Sinayi, bu muvua Maweja-Nangila muambile Moshe.

20-46Moshe ne Arone pamue ne bamfumu dikumi ne babidi ba meku, mfumu umue ku tshisamba umue ku tshisamba, ke bavua babadike bantu balume bonsu, bavua ne bidimu makumi abidi ne pa mutu, bikale ne bukole bua kuenza mudimu mu bisumbu bishilangane bia tshiluilu tshia Izrayele. Kufundabu mena abu, bituadije ku tshisamba tshia Rubene, muanabute wa Yakobe too ne ku meku onsu a bena Izrayele. Bantu bonsu bavua bungi nunku:

Tshisamba tshia Rubene: 46.500

Tshisamba tshia Shimeyone: 59.300

Tshisamba tshia Ngade: 45.650

Tshisamba tshia Yuda: 74.600

Tshisamba tshia Isakare: 54.400

Tshisamba tshia Zebulone: 57.400

Tshisamba tshia Efrayime, muana wa Yozefe: 40.500

Tshisamba tshia Menashe, muana wa Yozefe: 32.200

Tshisamba tshia Binyamine: 35.400

Tshisamba tshia Dane: 62.700

Tshisamba tshia Ashere: 41.500

Tshisamba tshia Naftali: 53.400

Bonsu pamue: 603.550.

Mudimu musunguluke wa tshisamba tshia bena Levi

47Kadi kabavua babadike tshisamba tshia bena Levi pamue ne bisamba bikuabu bia bena Izrayele to.

48Bualu Maweja-Nangila uvua mukandike Moshe ne:

49“Kubadiki tshisamba tshia bena Levi pamue ne bena Izrayele ba bisamba bikuabu nansha.

50Neubapeshe mudimu wa kulama nzubu wa tshijila, muaba udibu bateke mukanda wa ndondu, bintu bionsu bia kuasa nabi nzubu awu, nansha bintu bia kukuata nabi mudimu mu nzubu awu. Nebambule nzubu awu ne bintu biende bionsu. Nebenze mudimu mu nzubu awu. Kabidi nebase mitanda yabu minyungulule nzubu awu.

51Panudi numuangala, amu bena Levi nebatulakaje nzubu wa tshijila awu, bua kuya kumuasa kabidi muaba unudi nuya. Kadi muntu mukuabu mufike pabuipi ne nzubu wa tshijila awu, nebamushipe.

52Bena Izrayele nebase mitanda yabu muaba udi tshisumbu tshiabu tshia bena mvita, pa buipi ne dibendela diabu.

53Kadi amu bena Levi, nebase mitanda yabu minyungulule nzubu wa tshijila. Amu bobu nkayabu nebenze mudimu munda mua nzubu awu. Bena Izrayele bakumbaje mikenji eyi, kabakumfikisha munda nansha.”

54Bena Izrayele kukumbaja bionsu bivua Maweja-Nangila muambile Moshe.