Dibadika 3 - MUKANDA WA MYIDI MUKULU（TSH96）

Midimu ya bena Levi

1Tshikondu tshivua Maweja-Nangila muyukile ne Moshe pa mukuna wa Sinayi, Arone ne Moshe bakavua ne bana.

2Arone uvua ne bana ba balume banayi: Nadabe, muanabute, Abiku, Elazare ne Itamare.

3Bana aba ke bavuabu balaba manyi, babajidile bua benze mudimu wa butuangaji.

4Kadi Nadabe ne Abiku kufuila mu tshipela tshia Sinayi kumpala kua muaba wa tshijila, kabayi banji kulela bana. Bualu bavua balambule Maweja-Nangila mulambu wa manananshi, avua kaayi a tshijila. Nanku anu bana babidi ba Arone, Elazare ne Itamare, ke bavua bashale bua kuenza mudimu wa butuangaji pamue ne tatuabu.

5Maweja-Nangila kuambila Moshe ne:

6— Bikila tshisamba tshia bena Levi. Ubateke ku bumfumu bua mutuangaji Arone, bamuambuluishe.

7Bena Levi nebenze mudimu kumpala kua ntenta wa kusambakena, bua kuambuluisha Arone ne bena Izrayele bonsu. Nebenze midimu yonsu idi itangila nzubu wa tshijila.

8Nebalame bintu bionsu bia mu ntenta awu. Nebenze midimu yonsu idi itangila nzubu wa tshijila bua kuambuluisha bena Izrayele.

9Nanku neupeshe Arone ne bana bende bena Levi, bua babambuluishe muabu muonsu mu dina dia bena Izrayele bakuabu, balame nzubu wa tshijila.

10Neupeshe Arone ne bana bende nkayabu mudimu wa butuangaji. Muntu mukuabu muenze mudimu awu kayi mutuangaji, nebamushipe.

11Maweja-Nangila kuambila Moshe ne:

12— Ndi musungule bena Levi munkatshi mua bena Izrayele bakuabu bonsu, bua bangenzele mudimu. Ndi mbangata bua bikale banyi, pa muaba wa bamuanabute bonsu ba bena Izrayele.

13Bualu dituku di-mvua mufuishe bamuanabute ba bena Ejipitu, mvua mushiye bamuanabute bonsu ba bena Izrayele too ne ba bimuna biabu ne muoyi bua bikale bianyi. Meme ndi Maweja-Nangila.

Dibadika dia kumpala dia bena Levi

14Maweja-Nangila kuambila Moshe mu tshipela tshia Sinayi ne:

15— Ubadike bantu balume bonsu ba bena Levi. Ufunde mena abu, bituadije ku bana batekete ba ngondu umue ne pa mutu too ne ku bantu bakulumpe, bilondeshile meku abu ne bisamba biabu.

16Moshe kubabadika muvua Maweja-Nangila mumuambile.

17Levi uvua ne bana balume basatu: Ngershone, Kekate ne Merari.

18Ngershone uvua ne bana balume babidi: Libni ne Shimeyi. Badi bankambua ba bisamba bibidi.

19Kekate uvua ne bana ba balume banayi: Amrame, Ishare, Ebrone ne Uziyele. Badi bankambua ba bisamba binayi.

20Merari uvua ne bana ba balume babidi: Mali ne Mushi. Badi bankambua ba bisamba bibidi. Nanku mbinyike meku a bena Levi bilondeshile mena a bana bonsu aba.

21Ngershone ke nkambua wa bena Ngershone badi batapuluka meku abidi, dia bena Libni ne dia bena Shimeyi.

22Bantu balume bonsu ba tshisamba etshi, bituadije ku bana batekete ba ngondu umue too ne ku bantu bakulumpe, bavua 7.500.

23Bena Ngershone bavua base mitanda yabu kunyima kua nzubu wa tshijila, luseke ludi diba dibuelela.

24Mfumu wa tshisamba eshi uvua Eliyasafe, muana wa Layele.

25Bena Ngershone ke bavua ne mudimu wa kulama bintu bia ntenta wa kusambakena ebi: ntenta wa munda, ntenta muibidi, ne ntenta wa kubuikila ku ntenta ibidi ayi, kabidi ne tshilamba tshivua tshilembeleja ku mushiku wa ntenta.

26Bavua balama kabidi bilamba bia ku lupangu, ne tshilamba tshia ku tshibuelelu tshia lupangu luvua lunyungulula nzubu wa tshijila ne tshilambuilu. Bavua balama kabidi mionji yonsu ya kuasa nayi ntenta.

27Kekate ke nkambua wa bena Kekate, badi batapulukangana meku anayi: dia bena Amrame, dia bena Ishare, dia bena Ebrone ne dia bena Uziyele.

28Bantu balume ba tshisamba etshi, bituadije ku bana batekete ba ngondu umue too ne ku bantu bakulumpe, bavua 8.600. Bavua ne mudimu wa kulama bintu bia tshijila bivua munda mua ntenta.

29Bena tshisamba etshi tshia Kekate, bavua base mitanda yabu, luseke lua kuinshi kua nzubu wa tshijila.

30Mfumu wa tshisamba etshi uvua Elishafane, muana wa Uziyele.

31Bena tshisamba etshi bavua ne mudimu wa kulama bimpe mushete wa ndondu, mesa a tshijila, tshitekelu tshia miendu, bilambuilu, malongu adibu benza nawu mudimu muaba wa tshijila, kabidi ne tshilamba tshidibu balembeleja munda mua nzubu wa tshijila.

32Elazare, muana wa balume wa mutuangaji Arone, ke uvua mfumu mukulu wa bena Levi bonsu. Uvua utangila bantu bavua benza mudimu muaba wa tshijila.

33Merari ke nkambua wa bena Merari, badi batapuluka meku abidi, dia bena Mali ne dia bena Mushi.

34Bantu balume bonsu ba tshisamba etshi, bituadije ku bana batekete ba ngondu umue too ne ku bantu bakulumpe, bavua 6.200.

35Bena tshisamba tshia Merari bavua base luseke lua ku mutu kua nzubu wa tshijila. Mfumu wabu uvua Suriyele, muana wa Abikayile.

36Bena Merari ke bavua ne mudimu wa kulama bintu bivuabu benza nabi nzubu wa tshijila: mabaya, makunji ne bitaku biawu, ne bintu bikuabu bionsu.

37Bavua balama kabidi makunji a lupangu ne bitaku biawu, milonda ne mionji. Nanku bena Merari bavua ne mudimu wa kulama bimpe bintu bionsu ebi.

38Moshe ne Arone ne bana bende bavua base mitanda yabu luseke ludi diba dipatukila lua muaba wa tshijila, kumpala kua tshibuelelu tshia muaba awu. Bavua benza mudimu muaba wa tshijila mu dina dia bena Izrayele bonsu. Muntu yonsu uvua musue kuenza mudimu muaba awu, kayi mutuangaji, bavua ne bua kumushipa.

39Bungi bua bantu balume bonsu ba bena Levi, bavua Moshe ne Arone babadike, bu muvua Maweja-Nangila muambe, bituadije ku bana batekete ba ngondu umue too ne ku bantu bakulumpe, kabidi bilondeshile ku meku abu, bavua 22.000.

Bena Levi badi bapingana pa muaba wa bamuanabute

40Maweja-Nangila kuambila Moshe ne: — Ubadike bamuanabute bonsu ba balume ba bena Izrayele, bituadije ku bana batekete ba ngondu umue too ne ku bantu bakulumpe, ufunde mena abu.

41Pashishe, ujidile bena Levi bua bikale banyi meme Maweja-Nangila, pa muaba wa bamuanabute bonsu ba bena Izrayele. Bimuna kabidi bia bena Levi nebikale bianyi, pa muaba wa bamuanabute bonsu ba bimuna bia bena Izrayele.

42Moshe kuenza bionsu bivua Maweja-Nangila mumuambile. Kubadikaye bamuanabute ba balume ba bena Izrayele bonsu.

43Bonsu pamue bituadije ku bana batekete ba ngondu umue too ne ku bantu bakulumpe, bavua 22.273.

44Maweja-Nangila kuambila Moshe ne:

45— Ujidile bena Levi bua bikale banyi meme Maweja-Nangila, pa muaba wa bamuanabute bonsu ba bena Izrayele. Bimuna bia bena Levi kabidi nebikale bianyi meme, pa muaba wa bamuanabute ba bimuna bia bena Izrayele.

46Kadi bua kupikula bamuanabute ba bena Izrayele 273, badi bapite ba bena Levi ku bungi;

47pa muntu yonsu, bafute nkanu itanu ya tshiamu tshitoke tshia mushinga mukole — nkanu ya mu muaba wa tshijila, ya grame dikumi ku lukanu lumue —.

48Nufile nkanu eyi kudi Arone ne bana bende, bua kupikula bungi bua bamuanabute ba bena Izrayele budi bupite bungi bua ba bena Levi.

49Ke Moshe kusangisha nkanu ya kupikula nayi bungi bua bena Izrayele buvua bupite bungi bua bena Levi.

50Uvua musangishe kudi bamuanabute ba bena Izrayele nkanu 1.365, bu mudi nkanu ya mu muaba wa tshijila.

51Kuyipeshaye Arone ne bana bende ba balume, bu muvua Maweja-Nangila muambe.