Sira 14 - MUKANDA WA MYIDI MUKULU（TSH96）

1Muntu udi udilama ku ngakuilu wende, mmuena diakalenga.

Kabidi kena mua kukenga bua bilema biende to!

2Muena diakalenga mmuntu udi kondu kende ka munda kakayi ne bubi,

kabidi upeta bidiye utekemena!

Makenga a muena buiminyi

3Paudi muena buiminyi, biuma bidi

mua kukuambuluisha ku tshinyi?

Wewe mubanji, paudi kuyi utula biuma, bidi mua kukuambuluisha ku tshinyi?

4Udi ukunguja biuma kuyi ubidia, udi ukuatshila bantu bakuabu mudimu.

Bualu bobu nebasanke ne biuma biende.

5Padi muntu udisuya nkayende,

kudi muntu udiye mua kuleja muoyi mulenga anyi?

Kena mua kudisankisha ne biuma biende.

6Muntu udi udikengesha yeye nkayende udi muntu mubi mupite,

badi bamunyoka bua bubi buende.

7Padi muena buiminyi wenza bualu buimpe, mmubuenze ku mpukapuka.

Kadi bubi buende nebumueneke patoke.

8Muntu muena lukuka udi muntu mubi,

kena utangila bantu bu udi kayi mubamanye, udi ubapepeja.

9Muena bukonkotu kena usanka bua bidiye nabi,

buiminyi budi bunyanga muoyi wende.

10Muena buiminyi kena upangana diampa,

kadi ku ende mesa kudi lukota ne nzala!

Tshitudi ne bua kuenza ne biuma

11Muananyi, paudi ne kantu, udiangata ne mushinga.

Kadi paudi ne mushindu, ulambula Maweja-Nangila milambu idi mimuakanyina.

12Wamanya ne: lufu kaluena kule.

Dituku diebe dia lufu kuena mudimanye.

13Kuyi muanji kufua, enzela mulunda webe bimpe,

bilondeshile muebe muudi namu, wikale ne kalolu kudiye.

14Kuena mua kulekela diakalenga dia mu lupitapita.

Kuena mua kubenga kusanka ne bintu biebe.

15Umanye ne: neushile bantu bakuabu bintu biebe.

Bantu bakuabu badi babipiana, babitshinka, babiabanyangana.

16Upeshe bantu bintu, bobu bakupeshe biabu, usankishe muoyi webe,

bualu ku bafue kabena basanka kabidi to.

17Muntu yonsu udi ukulakaja bu tshilamba.

Ke mukenji wa kashidi udi ne: “Muntu udi ne bua kufua!”

18Padi mutshi muikale ne tshifufu,

mabeji adi asasa, kadi makuabu adi apopoka.

Ke mudi ndelanganyi ya bantu, aba bafue, balela bakuabu.

19Bionsu bidi muntu wenza bidi bijimina,

muntu uvua mubienze udi ujimina kabidi momumue.

Dikeba dia meji(51.13-29; Nsum 8.22-35)

20Muena diakalenga mmuntu udi ulonda tshidi meji amuambila,

wenza bionsu ne lungenyi!

21Udi udikonka mu muoyi wende bua kumanya njila ya meji, udi wela meji a kulonda mudi meji amuambila.

22Udi wipatshila Meji bu mudi tshilembi ulonda nyama,

udi uatentekela miaba yonsu idiye uya.

23Udi utangila pa madidishi awu,

utelejila ku tshiibi tshiawu.

24Udi usomba pabuipi ne nzubu wawu,

udi uashila mutanda wende ku bimana bia nzubu wawu.

25Udi wasa ntenta wende pabuipi nawu,

udi usomba muaba wa disanka.

26Udi wibakishila disua diende mu matamba awu,

udi wikishila mu dileji diawu,

usomba muinshi mua matamba awu.

27Matamba awu adi amujika ku munya,

ne yeye udi usomba mu muaba wa lumu.