1Musambu wa mu mukanda wa mulombodi wa bena misambu, wa
kuimba ne lunzenze lua nshinga muanda mukulu. Musambu wa mu mukanda wa misambu ya Davide.
2Maweja-Nangila, utuambuluishe!
Tshianana, bantu bebe badi mua kujimina.
Kamutshiena kabidi bantu ba nsongu.
3Bantu bonsu badi amu bashimangana.
Badi batua muntu makumbu, munda muabu bikale bamujana.
4Maweja-Nangila, butula bena lubombu bonsu,
puwisha badi baditemba, bamba ne:
5“Tudi bamanye mua kuakula, bua tupete bionsu bitudi tujinga. Netuambe bionsu bitudi basue, katuyi tutshina muntu.”
6Kadi Maweja-Nangila udi wamba ne:
“Mpindiewu ndi mfika bua kuambuluisha
bapele badibu bakengesha ne bena dikenga badi batua mikemu.
Nempikule badibu badiombola.”
7Tudi mua kutekemena bidi Maweja-Nangila wamba.
Miaku yende idi milelela,
idi bu tshiamu tshitoke tshia mushinga mukole
tshiengulula misangu muanda mutekete.
8-9Maweja-Nangila, wewe ke udi ukumbaja biudi ulaya.
Bantu badi bakubenga badi bendakana miaba yonsu,
bubi budi buvulangana mu bantu.
Kadi utuepule bua katubuelakanyi ne bantu babi aba.
Who We AreWhat We EelieveWhat We Do
2025 by iamachristian.org,Inc All rights reserved.
