Estere ngreke 2 - MUKANDA WA MYIDI MUKULU（TSH96）

Estere udi ushala mukalenga mukaji

1Malu aa mamane kuenzeka, tshiji tshia mukalenga kutuya. Katshivua ubikila Astine nansha, bualu uvua muvuluke muvua mukalenga mukaji muandamune, kabidi ne mushindu wa dinyoka divuaye mufundile Astine.

2Balombodi banene ba mu bukalenga buende kumuambilabu ne:

— Badi ne bua kukukebela kabidi bansongakaji batshidi tumama, bikale ne mpala mulenga.

3Nanku mu bitupa bionsu bia buloba bidi mu bukalenga buebe, uteke balombodi badi ne mudimu wa kusungula bansongakaji badi tumama, nangananga badi bimpe, bua babafile mu lupangu lua bakaji ba mukalenga ludi mu Suze. Pashishe nebabapeshe muntu mutungu udi utangila lupangu lua bakaji. Nebabapeshe bionsu bidibu ne bua kulengeja nabi mubidi.

4Mukaji udi mua kubilengelela awu, neashale mukalenga mukaji pa mutu pa Astine.

Bualu ebu kusankisha mukalenga bikole, nanku kubukumbajaye.

5Mu tshimenga tshia Suze muvua muena Yuda, diende Mordekayi, uvua muana wa Yayire, wa ku ndelanganyi ya Kishe, mu tshisamba tshia Binyamine.

6Bayua bamukuate mu bupika. Uvua ufumina ku Yerushalayime. Nebukadnesare mukalenga wa bena Babilone uvua mukuate bena mu Yerushalayime mubatume mu bupika.

7Uvua mukoleshile muana wa bakaji wa mansebende Aminadabe ku nzubu kuende. Muana wa bakaji awu diende Estere, uvua muana nshiya. Mordekayi uvua umukolesha nanku bua ashale mukajende. Estere uvua muimpe be.

8Bobu bamana kumanyisha bantu mukenji uvua mukalenga muele nanku, ke kusangishabu bansongakaji mu tshimenga tshia Suze, babalombola kudi Ngayi uvua utangila lupangu lua bakaji. Estere uvua kabidi munkatshi muabu.

9Uvua mulengelele bikole Ngayi ne mumutokele ku muoyi. Kumupeshaye mafuta a kulaba ne biakudia bia pa buabi, kumupa kabidi bansongakaji muanda mutekete bavua bamueneka bimpe ku mesu a bantu, bavua bafika bualu buende mu lupangu lua mfumu. Ngayi uvua ulama Estere bimpe pamue ne bena mudimu bende ba mu lupangu lua bakaji.

10Estere kavua mubambile tshisamba tshiende nansha ditunga diende to. Bualu Mordekayi uvua mumukandike.

11Mordekayi uvua wendakana matuku onsu kumpala kua lupangu lua bakaji bua kutentekela tshidi mua kuenzekela Estere.

12Padi nsongakaji mushale tshidimu tshijima mu lupangu lua bakaji, badi mua kumufikisha kudi mukalenga. Tshidimu atshi bavua ne bua kulongolola mibidi yabu: munkatshi mua ngondu isambombu bansongakaji bavua badikunguja, badilaba mafuta a mire, mu ngondu mikuabu isambombu ivua ilonda, bavua badilaba kabidi mafuta a mupuya muimpe ne bintu bikuabu bidi bakaji balengeja nabi mubidi.

13Pashishe nsongakaji yonsu uvua uya kudi mukalenga. Nenku mukalenga uvua wambila mukuabu muntu bua aye kupatula nsongakaji awu mu lupangu lua bakaji umufila too ne mu nzubu ya bukalenga.

14Nsongakaji uvua uya dilolu, butshia mu dinda, upingana mu lupangu luibidi luvua Ngayi, muntu mutungula wa mukalenga utangila. Kavua upingana kabidi kudi mukalenga nansha, kadi amu bu mukalenga mumubikile mu dina.

15Dikuabu dituku, Estere, muana wa Aminadabe ne mansebende wa Mordekayi, uvua mumane kukumbaja matuku a kudilongolola bua kuya kumonangana ne mukalenga. Kavua mulengulule mubelu nansha umue uvua muntu mutungu uvua utangila lupangu lua bakaji mumuambile. Ke pavua Estere mutokela bantu bonsu ku muoyi.

16Amu tshidimu tshia muanda mutekete tshia bukalenga bua Artashasta, mu ngondu wa dikumi ne muibidi, nansha ngondu wa Adare, uvua ne bua kuya kudi mukalenga.

17Mukalenga kunanga Estere bikole, munkatshi mua nsongakaji yonsu, yeye ke uvua mumutokela ku muoyi. Ke mukalenga kumuasa nsala wa mukalenga mukaji.

18Pashishe kulambishaye didia dinene dia lumingu lujima, kubikidisha balunda bende bonsu ne bantu bonsu bavua ne mianzu, nanku kuangataye dibaka ne Estere. Amu bua dibaka edi, mukalenga kuela mukenji mu bukalenga buende bua bantukabafutshi tshitadi.

19Mordekayi uvua ukuatshila mudimu mu nzubu wa bukalenga.

20Kadi Estere kavua mudimanyishe ne: ndi muena Yuda nansha. Mordekayi uvua mumukandike ne: kuena mua kuamba bualu bua mushindu ewu. Uvua ne bua kunemeka Mvidi Mukulu, kukumbaja ne mikenji yende muvuaye muenze diba divuaye mu bianza biende. Estere uvua mukumbaje ne mulonde amu mu wabu bamuambila.

Mordekayi udi usokoluela mukalenga tshitungu tshibi

21Mordekayi uvua mubande muanzu munene, nenku bena mudimu babidi banene ba mu bukalenga bavua batangila malu a balami ba mukalenga kumufikila munda bikole. Ke kuelabu tshitungu bua bamone mua kushipa mukalenga Artashasta.

22Nenku Mordekayi kumanya bualu abu, kubumanyisha Estere, mukalenga mukaji kubufikisha kudi mukalenga ne bionsu bivuabu basue kumuenzela.

23Mukalenga kukonka bena mudimu banene babidi ba mu bukalenga abu. Pashishe kutumaye diyi bua babowe, kabidi bafunde bionsu bivua bienzeka abi mu mikanda ya bukalenga, bua bantu banemeke Mordekayi kabidi ne bua bavuluke midimu yende mimpe iwaye mukuate.