Dielulula 20 - MUKANDA WA MYIDI MUKULU（TSH96）

Mushindu wa kuluangana mvita

1Nuenu baye kuluangana mvita ne bantu badi ne tubalu, kabidi ne matempu a mvita, nansha ne baluishi bapite bena mvita benu ku bungi, kanubatshinyi to. Bualu Maweja-Nangila Mvidi Mukulu wenu, uvua munupatule mu Ejipitu, udi munkathi muenu.

2Panudi nudilongolola bua kuluangana, mutuangaji imane kumpala kua bena mvita ba bena Izrayele, ele lusanzu ne:

3“Nuenu bena mvita ba bena Izrayele, numanye ne: lelu nudi nuluangana ne bena lukuna benu. Panuafika muaba udibu, nukoleshe muoyi. Kanubatshinyi, kanupampakanyi, kanuzakadi to.

4Maweja-Nangila Mvidi Mukulu wenu udi nenu. Neanuluile mvita ayi, bua nuenu kubatshimuna!”

5Pashishe balombodi ba bena mvita, nebambile bena mvita ne: “Pikala muntu wa munkatshi muenu muase nzubu, kayi muanji kusombamu, apingane kuende. Bualu badi mua kumushipa mu mvita, muntu mukuabu kuvua kuangata nzubu awu.

6Pikala muntu wa munkatshi muenu mukune mitshi ya mvinyo, kayi muanji kupolaku bimuma bia tshianyi, apingane kuende. Bualu udi mua kufua mu mvita, muntu mukuabu kuvua kupola bimuma abi.

7Pikala muntu wa munkatshi muenu mubangile mukaji, kayi muanji kumubuelela mu nzubu, apingane kuende. Bualu udi mua kufua mu mvita, muntu mukuabu kuangata mukaji awu.”

8Pashishe balombodi ba bena mvita nebambe kabidi ne: “Pikala muntu kayi ne muoyi mukole, utshina, mbimpe apingane kuende. Bualu udi mua kupumbisha bakuabu mua kuluangana.”

9Pajikija balombodi ba bena mvita abu mayuki awu, nebasungule muntu ku tshisumbu tshionsu bua kulombolaye bakuabu.

10Bua kuluisha tshimenga kampande, nudianjile kulomba bena tshimenga atshi bua kubuelamu tshianana, kakuyi mvita to.

11Pikala bena tshimenga atshi bitabe, banunzuluile biibi bia tshimenga, nebanukuatshile mudimu. Nenubenzeje midimu ku bukole.

12Kadi pikalabu basue mvita, babenge bua nuenu kubuela mu tshimenga tshiabu, nuele tshimenga munkatshi ne tshiluilu.

13Padi Maweja-Nangila Mvidi Mukulu wenu unuambuluisha bua nutshikuate, nushipemu bantu balume bonsu.

14Kadi, bakaji, bana, bimuna, ne bintu bionsu bidi mu tshimenga atshi, nubiangate, nuenza nabi munudi basue. Bualu bintu bia baluishi benu mbintu bidi Maweja-Nangila Mvidi Mukulu wenu munupeshe.

15Ke munudi mua kuenzela bimenga bionsu bidi kule, kabiyi mu ditunga dinuasomba.

16Kadi mu bimenga bia mu ditunga didi Maweja-Nangila Mvidi Mukulu wenu munupe bua nudikuate, nenushipemu bantu bonsu, kanuyi nushiya nansha umue ne muoyi.

17Bena Iti, bena Amore, bena Kenaane, bena Perizi, bena Ivi ne bena Yebusa, nenubashipe bonsu, muvua Maweja-Nangila Mvidi Mukulu wenu muambe.

18Bualu bantu aba, badi mua kunulongesha buenzayi, budibu benza bua kusankisha mvidie yabu. Nuenu balonde buenzayi ebu, nudi nuenzela Maweja-Nangila Mvidi Mukulu wenu bibi.

19Nuenu bele tshimenga munkatshi matuku a bungi, kanuyi ne mushindu wa kutshikuata, kanupudi mitshi ya bimuma to. Bualu mitshi eyi, kayena bu bantu banudi nuluisha to. Nanku nudi mua kudia bimuma biayi. Kadi kanukosu mitshi to.

20Kadi mitshi idi kayiyi ikuama bimuma bia kudia, nudi mua kuyishimbula, kuenza nayi miaba ya kuimanyina, bua numone mua kukuata tshimenga atshi bimpe.