Efeze Diumvuija - MUKANDA WA MYIDI MUKULU（TSH96）

Diumvuija— Mu lukama lua kumpala lua bidimu, Bisumbu bia bena ditaba bivua bienda bivulangana mu Aziya Mukese (ke tshitupa tshia Turkiya tshidi mu Aziya). Bisumbu ebi bivua biumvuangana, kadi Tshisumbu tshia bena ditaba tshia mu Efeze, tshivua tshimueneka bu Tshisumbu tshikulu. Bualu Polu uvua mulale bidimu bisatu mu tshimenga etshi mu luendu luende luisatu (MM 19.1—20.1). Mu Ef 3.1 ne 4.1, tudi tubala muvua Polu mu lukanu diba divuaye mufunde mukanda ewu. Ke mudibu bauteka munkatshi mua mikanda idibu binyika ne: “nya mu lukanu,” bu mudi kabidi mikanda mitumina bena Filipe, Filemone, ne bena Kolose.Pa kumona bunene ne buimpe bua dilongesha didi mu mukanda ewu, tudi mua kuamba ne: ki mbaufundile amu Tshisumbu tshimue tshia bena ditaba, kadi bantu bavule, kabidi ba bikondu bionsu. Dilongesha dinene didi momu, ke diumvuija dia dijinga divua Mvidi Mukulu nadi kuonsu eku, dia kusangisha bionsu, ne bidi mu diulu ne bidi pa buloba, ku bumfumu bua muntu umue, Kristu (1.10).Pa kumusha mbangilu mukese (1.1-2), ne nkomenu mukese (6.21-24), dilongesha edi didi dikosolola mu bitupa binene bibidi:— Mu tshitupa tshia kumpala (1.3—3.21), mupostolu udi ukema, ukatshila pa bionsu bidi Mvidi Mukulu mutuenzele kudi Kristu. Pashishe udi umvuija mudi bantu bonsu benza tshintu tshimue, uleja kabidi muvua Mvidi Mukulu musangishe bonsu, ne bena Yuda ne badi kabayi bena Yuda (ba ndekelu aba ke badiye utumina mukanda wende,) mu tshisamba tshimue epele, tshisamba tshia bana bende.— Mu tshitupa tshibidi (4.1—6.20), mupostolu udi ulomba bena ditaba, bua badisange, benze tshintu tshimue munkatshi muabu, bilondeshile muoyi mupiamupia udibu bapeta pa kudisanga ne Yezu Kristu. Ke padi yonsu wa kudibu ne bua kuakaja nsombelu wende ne bantu bonsu, ne bena ditaba nende, ne bena diku diabu, ne bantu bakuabu bonsu mene.Polu udi umvuija ne bimfuanyi bisatu mudi tshisamba tshia Mvidi Mukulu ne bua kushala mu bobumue: bobumue bua MUBIDI: Tshisumbu tshia bena ditaba tshidi bu mubidi, Kristu muikale mutu wawu; bobumue bua NZUBU: Tshisumbu tshia bena ditaba tshidi bu nzubu, Kristu muikale dibue dia mu ditumba; bobumue bua BENA DIBAKA: Tshisumbu tshia bena ditaba tshidi bu muena kua Kristu, udi ulamata bayende muende muonsu. Nanku bena ditaba kabena mua kuenda mu bobumue, padibu kabayi balamatangana ne Mfumuabu umuepele.