2 Timote Diumvuija - MUKANDA WA MYIDI MUKULU（TSH96）
Diumvuija— Pavua Polu utumina Timote mukanda wende muibidi, uvua mu lukanu mu Rome (1.17). Dikenga divuaye nadi mu lukanu divua dimueneka bu dikole (2.9). Bantu bavua bamushiye nkayende (4.10, 16). Uvua mumanye muvuaye mumane kujikija luendu luende lua panu (4.6). Ke muvuaye utumina muntu uvua umunanga, uvua wenda nende miaba mivule, mukanda, umumanyisha ne miaku milenga majinga adiye nawu (1.2).Mupostolu udi wanji kuela Mvidi Mukulu tuasakidila bua dinanga ne ditaba, bidi Timote nabi. Bantu badi bakuatshila Lumu lua Disanka mudimu, nebabaluishe, nebabakengeshe. Ke mudi Polu ukolesha Timote ku muoyi, umulomba bua katshinyi makenga. Aluangane mvita ne dikima, bu “musolayi wa muoyi umue wa Yezu Kristu” (1.3—2.13). Adimukile bantu badi belangana amu milandu ya patupu, nansha mpata ya pa miaku. Ebi bionsu kabiena ne diambuluisha. Bidi mua kupambula bantu mu njila wa ditaba dilelela. Udi ulomba Timote, bua alonde tshilejilu tshiende yeye Polu. Avuluke kashidi malu a mu Mikanda ya tshijila avuaye mulonge ku buana buende (2.14—4.5). Ku ndekelu wa mukanda wende, Polu udi ulondela Timote makenga avuaye nawu, wela kabidi Mfumu tuasakidila, bualu uvua mumulame bimpe (4.6-22).Polu uvua muluangane mvita mimpe too ne ku ndekelu, mu mudimu mukole wa kulongesha Lumu lua Disanka (4.7). Mu bikondu bionsu, bantu badi babala mukanda ewu, bakebe kuluangana mvita ya momumue, kabayi batshina baluishi. Baleje ditaba, lutuulu, dinanga, ne dinanukila.
