1 Kulondolola Diumvuija - MUKANDA WA MYIDI MUKULU（TSH96）
Diumvuija— Mikanda ibidi ya Kulondolola kua malu, mmipatukile mu tshisumbu tshimue tshia bena Izrayele, bumue ntshia batuangaji. Yonsu ibidi idi yenza mukanda umue. Idi itumanyisha mianda yonsu ya kale ya bantu ba Mvidi Mukulu biangatshile ku mbangilu too ne ku bupika buabu bua mu Babilone.Udi utumanyisha malu aa ki mmufundi wa malu a kale ne kalele nansha, kadi mmuntu udi mumanye malu a Mvidi Mukulu, musue kabidi kualongesha bantu bakuabu. Udi ufundulula amue malu a mu mikanda ya kale, nangananga ya Samuwele ne ya Bakalenga, kadi udi usunguluja mu mikanda ayi anu malu adi mua kumuambuluisha bua kumvuija bantu malongesha ende manene a ne: Mvidi Mukulu nkayende udi mukalenga udi mua kulombola bena Izrayele. Bakalenga ba panu badi amu bena mudimu bende patupu, badi ne bua kuambuluisha bantu bua bavuluke bumfumu bua Mvidi Mukulu mu malu onsu adibu benza panu. Ke mudi Davide umueneka mukalenga wa tshitembu, udi witaba Mvidi Mukulu muende muonsu: uvua mukuate tshimenga tshia Yerushalayime, mutshienze tshimenga tshia tshijila, bua kutekamu nzubu wa Mvidi Mukulu. Yeye kabidi uvua mulongolole bimpe malu onsu a ditunga ne a ditendelela dia Mvidi Mukulu. Mumane kutulondela lufu lua mukalenga wa nsongu awu, mufundi udi ubanga kufunda malu a ndelanganyi ya Davide, ivua iludika bukalenga bua Yuda.Ntuadijilu wa mukanda wa kumpala wa Kulondolola, udi utuvuluija mu tshikosu menemene malu a kale, biangatshile ku Adame too ne ku Davide, nangananga mena a bankambua (bit. 1-9). Mu tshitupa tshibidi tshia mukanda (bit. 10-29) tudi tubala malu a mu bukalenga bua Davide. Kadi kudi amue malu adi mufundi kayi utela: bunsongalume bua Davide, muvuaye muanji kutambakana, bilumbu bivuaye nabi ne Shawule, bukalenga buende bua mu Ebrone bua bidimu muanda mutekete ne tshitupa, malu ende ne Batsheba, buntomboji bua Abshalome, a.n. Kadi udi ufunda bimpe, usakadila kabidi malu adi aleja mudi Davide ulongolola bintu bia kuibaka nabi nzubu wa Mvidi Mukulu mu Yerushalayime, kabidi mudiye upingaja mushete wa ndondu mu ditunga, utupakana pa kukeba kubadika bena Izrayele, kadi ukeba kulengeja tshilema pa kuibaka tshilambuilu muaba uvuabu ne bua kuasa nzubu wa Mvidi Mukulu kudi Shelomu. Udi ulongolola kabidi bimpe bisumbu bishilangane bia bena mudimu badi ne bua kulongolola muaba wa tshijila: batuangaji, bena Levi, bimbi, balami ba biibi, ne bakuabu kabidi.
