Musambu muimpe Mutambe Diumvuija - MUKANDA WA MYIDI MUKULU（TSH96）

Diumvuija— Munkatshi mua mukanda wa Mvidi Mukulu, tudi tusangana nsangilu wa tusala tua dinanga, tudi tutumbisha mulume ne mukaji badi balejangana dinanga diabu patoke, kabayi bafue bundu. Bantu bavule badi bakema mudi tusala atu tupeta muaba munkatshi mua mikanda ya tshijila. Bakuabu kabena nansha banyishe to. Ke muvua bantu, ku kale too ne ku lelu, bumvuija tusala etu, bu misambu idi ituleja amu dinangangana dia Mvidi Mukulu ne bantu bende. Kadi dinangangana dia mulume ne mukaji diasangana kabidi dipa dia Mvidi Mukulu kuenza anyi? Dienze. Nanku didi ne muaba wadi mu mukanda wa Mvidi Mukulu. Musambu ewu udi umvuija, ukolesha mene musambu wa dinanga utudi tubala mu mukanda wa Tshibangidilu (2.23-25).Badi mua kuabuluja musambu ewu mu tusala muanda mutekete (1.2—2.7; 2.8-17; 3.1—5.1; 5.2—6.3; 6.4—7.11; 7.12—8.5a; 8.5b-14). Tusala etu tudi mayuki munkatshi mua mulume ne mukaji, badi bumvuijangana dinanga diabu nansha ku malu a mubidi ne bimfuanyi bishilangane: badi bakebangana, bapetangana, bashiyangana, bakebangana tshiakabidi. Kadi meyi menyi makuabu a bantu ba muoyi mubi, adi akeba mua kunyangakaja mayuki a mulume ne mukaji: ke balami ba mikoku (balunda ba nsongalume), mamuende wa nsongakaji, nansha bana babu ba balume ba nsongakaji, nansha bakaji bakuabu balunda bende. Bakuabu badi bamba ne: nansha diyi dia mukalenga Shelomu, udi ukeba mua kuangata pende nsongakaji, didi amu koku. Bantu bonsu aba (nansha bisumbu bia bantu), badi bakeba kubuelakana munkatshi mua mulume ne mukaji. Kadi dinangangana adi kadiena dia bantu bonsu aba to, didi amu dipa dia Mvidi Mukulu, didi bantu babidi badi banangangana bushiwa bapeta.