Estere Diumvuija - MUKANDA WA MYIDI MUKULU（TSH96）
Diumvuija— Mukanda wa Estere udi utulondela muvuabu basungidila bena Yuda ku kabutu. Malu aa mmenzeke mu tshikondu tshivua bena Persa bakeba kudia bumfumu mu matunga onsu a mu Aziya, biangatshile ku Inde too ne ku Ejipitu. Bena Yuda ba bungi, bena meku avuabu baye nawu mu bupika ku Babilone, kabawa bapingane kuabu tshidimu tshivua bena Persa babutule bukalenga bua bena Babilone to (539 bgbg ne Y.K.). Bu muvua bena Yuda, nansha muvuabu basombe munkatshi mua bantu ba bisamba bikuabu, balame mikenji yabu, balonda bibidilu biabu, bivua bishilangane ne bia bantu bakuabu, bena mutumba nabu misangu mivule bavua amu babakine. Ke bidi mukanda wa Estere utuleja bimpe. Udi utulondela mvita ivua munkatshi mua Amane, mfumu wa balombodi ba ditunga mu bukalenga bua Ahashaveroshe, ne Mordekayi, muena Yuda, uvua ukuata pende mudimu mu mbulamatadi wa bena Persa. Mordekayi udi uludika Estere, bua apete muanzu wa mukalenga muadi wa bena Persa. Ke muvua Estere mua kuepula bana babu ku njiwu ivua mua kubabutula. Ke mudi mukanda ewu utuvuluija ne: bantu badi benza muabu muonsu bua kubutula bena Yuda, nebapange tshidibu bipatshile. Dituku divuabu bajadike bua kubutula bena Yuda, nediandamuke dituku didi bena Yuda batshimune baluishi babu, babakosa mutu. Dituku adi ke dituku dia tshibilu tshia bena Yuda tshia Purime, tshivua ku ndekelu kua tshikondu tshiabu tshia mashika, kumpala kua tshibilu tshia Dipita dia Maweja-Nangila. Mukanda wa Estere udi utulondela mfuki wa tshibilu atshi.Mushindu udi bena Yuda baluila bana babu, badisombuela, udi mua kukemesha, nansha kupampakaja mubadi. Kadi tuvuluke muvua bena Yuda basombe mu ditunga dia bende, muaba uvuabu bababenga, babadiombola, babakengesha ne kansungansunga. Malu a Estere adi atuvuluija tshiakabidi ne: tshikisu tshia nanku tshidi tshilela tshikisu tshikuabu. Kadi tshikondu tshivuabu bafunde mukanda ewu, bena Yuda kabatshi vua ne ditekemena dia kupeta budikadidi bua ditunga diabu to. Nanku mukanda ewu udi ubavuluija mudi Mvidi Mukulu amu mua kubasungidila ku makenga manene.
