Sira 39 - MUKANDA WA MYIDI MUKULU（TSH96）

1Udi ukeba mua kulonga meji a balongeshi ba kale ne kulonga malu a bambi.

2Udi umanya malu avua bantu ba lumu bamba,

udi umanya tshidi nsumuinu mikole yamba.

3Udi ulonga malu masokome adi mu nsumuinu,

nsombelu wende mujima udi wa kujandula nsumuinu.

4Udi ukuatshila bantu banene mudimu,

udi muntu musunguluke munkatshi mua bamfumu.

Amu yeye ke udibu bimikila midimu ya kuya ku ba bende.

Bualu udi mumanye meji mimpe ne malu a bantu.

5Udi uteka biangatshile ku dinda,

muoyi wende mujima kudi Maweja-Nangila, wakamufuka.

Udi utendelela Muena Kulu.

Udi ulomba Mvidi Mukulu, umulondela mibi yende.

6Udi utendelela Maweja-Nangila Mvidi

Mukulu Munene bua amupeshe lungenyi,

pashishe udi mua kutangalaja muaku wa meji,

neatendele Maweja-Nangila, umuela tuasakidila.

7Amu Mvidi Mukulu nkayende ke udi umulombola mudiye musue ne mudiye mumanye,

padi muntu wela meji ku malu masokome a Mvidi Mukulu.

8Amu Mvidi Mukulu ke udi ulundula lungenyi lua muena meji,

padi muntu ewu ulongesha.

Neasankile mu mikenji ya Mvidi Mukulu,

bua ndondu udi Mvidi Mukulu mutue ne bantu bende.

9Bantu bavule nebatumbishe meji ende.

Kabena bamupua muoyi.

Dina diende nedishale kashidi ne kashidi.

10Bena bisamba bikuabu nebayukile bua meji ende.

Mu bisangilu nebatumbishe lumu luende.

11Pikalaye mulale matuku mavule panu,

udi ushiya dina dia lumu dipite makuabu tshinunu.

Nansha yeye ufua lukasa, udi amu ne disanka.

Bionsu bidi Mvidi Mukulu muenze mbimpe

12Ndi musue kunuambila meji andi nawu.

Bualu ndi ne meji a bungi,

bu mudi ngondu ne butoke bua bungi padiye mujalame.

13Bana banyi ba tshijila, ntelejayi, diundayi bu mudi bilongu,

bidi bimena ku muelelu wa mayi.

14Ikalayi bu musenga wa kamonya udi utangalaja mupuwa wawu muimpe,

lejayi buimpe buenu bu bua bilongu bidi bipite bikuabu.

Imbayi musambu pamue, ne meyi makole,

elayi Maweja-Nangila tuasakidila bua bionsu bidiye wenza.

15Tumbishayi bumfumu buende.

Samunayi lumu luende, imbayi misambu ne lunzenze.

Numutue makumbu, nuamba ne:

16Bionsu bidi Maweja-Nangila muenze bidi bimpe be!

Bionsu bidiye wamba bidi bienzeka amu pa diba diabi.

17Kakuena mushindu wa kuebeja ne:

“Etshi ntshia tshinyi?

Kadi tshiatshia ntshia kuenza natshi tshinyi?”

Bualu tshintu tshionsu badi batshikengela amu pa diba diatshi.

Mayi adi imanakana dibulu ku diyi diende,

adi adisanga muaba umue ku muaku wa mukana muende.

18Tshionsu tshidiye wamba tshidi tshienzeka pa lukasa,

Kakuena muntu udi mua kumukandika bua kuenzaye mudimu wende wa kupandisha bantu.

19Yeye udi umona bionsu bidi bantu benza.

Kakuena nansha bantu badi mua kumusokoma.

20Udi umona bionsu bivua bienzeka ku kale, too ne bidi mua kuenzeka.

Kakuena tshidi tshimukemesha to.

21Kakuena mushindu wa kukonka ne:

“Etshi ntshinyi?

Kadi tshiatshia ntshia kuenza natshi tshinyi?”

Bualu tshintu tshionsu tshidi ne mudimu watshi.

22Udi unanga ditunga udiela lupemba, bu mudi Nile upasalala,

bu mudi mvula ufukisha buloba ne mayi.

23Ke muvuaye mufikile bisamba bia bantu benyi munda,

muandamune mayi menza tshipela tshia luepu.

24Njila yende idi milulame bua bantu bakane,

kadi idi miuwule ne njiwu bua bantu babi.

25Biangatshile ku tshibangidilu, Mvidi Mukulu mmufuke bintu biakane bua bantu bakane,

bintu bibi bua bantu babi.

26Bintu bia kumpala bidi muntu ukengela padiye ne muoyi ke:

mayi, kapia, tshiamu, luepu,

ntete ya bukula, mabele ne buitshi,

maluvu, mafuta ne bivualu.

27Bionsu ebi bidi biambuluisha bantu bakane,

kadi bidi bitatshisha bantu babi.

28Kudi imue mpepela idi Mvidi Mukulu mufuke

bua kunyoka nayi bantu babi,

padiye uyituma idi ikengesha bantu bikole.

Mu tshikondu tshidi Mvidi Mukulu ukosa nsambu,

mpepela eyi idi itatshisha bantu,

idi ituyisha tshiji tshia Mufuki wayi.

29Kapia, mvula wa mabue, tshiyole tshia nzala ne lufu,

Mvidi Mukulu mmubifuke kabidi bua kunyoka nabi bantu.

30Menu a nyama ya lonji, tuminyiminyi, nyoka ya ntoka,

ne muele wa kubutula nawu bantu babi,

31bionsu ebi bidi bikumbaja diyi dia Mvidi Mukulu.

Pa buloba apa mbimane kudilongolola.

Diba dimane kufika, kabiena bibenga kuitaba ku diyi diende to.

32Bionsu abi mvua mumane kubijadika ku ntuadijilu,

meme kubiela meji, kubifunda.

33Bionsu bidi Maweja-Nangila mufuke bidi bimpe.

Udi utupa bionsu bitudi nabi dikenga pa diba diabi.

34Kakuena mushindu wa kukonka ne:

“Tshintu etshi tshidi tshibi tshipite tshiatshia”,

bualu tshikondu tshidiku tshidi bantu mua kuamba ne: bionsu mbimpe.

35Kadi mpindiewu, tuimbayi ne muoyi mujima, ne meyi makole,

tuele Maweja-Nangila tuasakidila.