Matayi 26 - MUKANDA WA MYIDI MUKULU（TSH96）

Badi belela Yezu tshifufu tshibi(Mar 14.1-2; Luk 22.1-2; Yow 11.45-53)

1Pasua Yezu mumane kulongesha malu onsu aa, kuambilaye balongi bende ne:

2— Nudi bamanye ne: tshibilu tshia Dipita dia Maweja-Nangila netshikaleku, papita matuku abidi. Nebafile Muana wa muntu bua bamupopele pa mutshi mutshiamakane.

3Diba adi bamfumu ba batuangaji ne bakulu ba bena Yuda kudisangisha mu lubanza lua mutuangaji munene, dina diende nKayifa.

4Kupungabu diyi bua kukuatshisha Yezu mu budimu, kumushipesha.

5Bavua bamba ne:

— Katuena mua kumukuata matuku a tshibilu nansha. Bualu bantu badi mua kujula tshimvundu.

Mukaji udi wela Yezu manananshi mu mutu(Mar 14.3-9; Yow 12.1-8)

6Yezu uvua mu nzubu mua Simone, muena nsudi, mu Betanya.

7Mukaji kampande kufika kudiye ne mulangi wa albatre, muwule ne manananshi a mushinga mukole. Kuelaye Yezu manananshi aa mu mutu pavuaye ku mesa.

8Balongi ba Yezu bamona nanku, kufikabu munda, bamba ne: — Kunyanga bintu nunku bua tshinyi?

9Kabavua mua kusumbisha manananshi aa ku mushinga mukole, kupesha bapele makuta anyi?

10Bu muvua Yezu mumanye tshiyuabu bamba, kubabelaye ne:

— Nudi nutatshisha mukaji ewu bua tshinyi? Mmungenzele bualu buimpe.

11Bualu nenuikale ne bapele matuku onsu. Kadi meme kanuakushala nanyi kashidi to.

12Udi mungele manananshi aa pambidi, mmulongolole mubidi wanyi bua kuujika bimpe.

13Ndi nnujadikila bulelela ne: pa buloba bujima, miaba yonsu yalongeshabu Lumu lua Disanka elu, nebalondele bantu bivua mukaji ewu muenze. Nanku bantu nebamuvuluke.

Yudase udi utungila Yezu tshitungu(Mar 14.10-11; Luk 22.3-6)

14Diba adi umue wa ku balongi dikumi ne babidi, dina diende Yudase Iskariyote, kuyaye kudi bamfumu ba batuangaji.

15Kubakonkaye ne:

— Nenumpeshe tshinyi pandi mfila Yezu kunudi?

Kubalabu nkanu ya tshiamu tshitoke tshia mushinga mukole makumi asatu, kumupeshabu.

16Kutuadija ku diba adi, Yudase kukeba muvuaye mua kufila Yezu kudibu, kamuyi lutatu.

Didia dia Mfumu(Mar 14.12-21; Luk 22.7-14,21-23; Yow 13.21-30)

17Dituku dia kumpala mu tshibilu tshia Mampa kaayi mela buanga, balongi kufika kudi Yezu, bamukonka ne:

— Udi musue tukulongoluele didia dia Dipita dia Maweja-Nangila penyi?

18Yezu kubandamuna ne:

— Nuye mu tshimenga kua muntu kampanda, numuambile ne: “Mulongeshi udi wamba ne: diba dianyi didi pabuipi. Meme ne balongi banyi, netuenzele tshibilu tshia Dipita dia Maweja-Nangila kuebe.”

19Balongi kuenza muvua Yezu mubambile. Kulongololabu didia dia Dipita dia Maweja-Nangila.

20Ku dilolu Yezu kusomba ne balongi dikumi ne babidi ku mesa bua kudia.

21Pavuabu badia, Yezu kuamba ne:

— Ndi nnujadikila bulelela ne: umue wa kunudi neanyile mu tshitungu.

22Balongi kunyingalala bikole. Kukonkabu Yezu ku muntu ku muntu ne:

— Mfumu, uudi wamba, mmeme anyi?

23Yezu kuandamuna ne:

— Utuvua bele nende tshianza mu dilongu dimue, ke yeye wampangila.

24Muana wa muntu neafue, mudi Mikanda ya tshijila kulongesha bualu buende. Kadi muntu wapangila Muana wa muntu, mmuena diakabi. Muntu awu kabavua nansha mua kumulela to.

25Yudase uvua upangila Yezu, kumukonka pende ne:

— Mfumu wanyi, uudi wamba mmeme anyi?

Yezu kumuandamuna ne:

— Muudi muambe amu mmomu.

Didia dia Mfumu(Mar 14.22-26; Luk 22.15-20; 1 Kor 11.23-25)

26Pavuabu badia, Yezu kuangata diampa, kuela Mvidi Mukulu tuasakidila, kudikosolola, kudiabanyina balongi bende, ubambila ne:

— Angatayi, nudie, etshi mmubidi wanyi.

27Pashishe kuangataye dikopu dia maluvu a nwinyo, kuelaye kabidi Mvidi Mukulu tuasakidila, kudipesha balongi bende, wamba ne:

— Nuayi bonsu bidi mu dikopu edi.

28Bualu mmashi anyi, adi ashindika ndondu udi Mvidi Mukulu utua ne bantu, adibu bapuekesha bua kujimijila bantu bonsu mibi yabu.

29Ndi nnujadikila ne: kutuadija ku mpindiewu, tshiakunua kabidi nwinyo ewu, too ne ku dituku dinganua nenu nwinyo mupiamupia mu Bukalenga bua Tatu wanyi.

30Kuimbabu misambu ya tshibilu. Pashishe kuyabu ku mukuna wa Olive.

Yezu udi wambila Petro ne: neumvile(Mar 14.27-31; Luk 22.31-34; Yow 13.36-38)

31Ke Yezu kuambila balongi bende ne:

— Butuku ebu, nenunyeme bonsu, nunshiye nkayanyi. Bualu mu Mikanda ya tshijila mbafunde ne: “Nenshipe mulami wa mikoku, yoyi neitangalake.”

32Kadi meme mumane kubika ku lufu, nenye kunuindila mu Ngalileya.

33Ke Petro kumuandamuna ne:

— Nansha bonsu banyema, bakushiya, kadi meme tshiakunyema to.

34Yezu kumuambila ne:

— Ndi nkujadikila bulelela ne: butuku ebu, tshitala katshiyi tshianji kusama, wewe newikale mumane kunwila misangu isatu ne: tshiena mumumanye to.

35Petro kumuambila ne:

— Kashidi tshiakukuvila ne: tshiena mumumanye to. Nansha bua lufu, netufue nebe.

Balongi bakuabu bonsu kuamba kabidi amu nanku.

Mu lupangu lua Ngetsemani(Mar 14.32-42; Luk 22.39-46)

36Ke Yezu ne balongi bende kufika mu lupangu ludibu binyika ne: Ngetsemani. Kubambilaye ne:

— Sombayi apa. Ntshidi mpengama kuaka bua kutendelela.

37Ke Yezu kuya ne Petro, kabidi ne bana babidi ba Zebede. Kutuadijaye kubungama ne kupampakana.

38Nanku kubambilaye ne:

— Muoyi wanyi udi ne dibungama dia lufu. Shalayi apa. Kanuladi tulu to. Tuikale batabale bonsu.

39Yezu kupengama katantshi, kudiela mpala panshi, utendelela, wamba ne:

— Tatu wanyi, pikalabi mua kuenzeka, ungumushile dikopu edi dia dikenga. Kadi bienzeke muudi musue wewe, kabienzeki mundi musue meme.

40Yezu kupingana kudi balongi bende, kubasangana balale tulu. Kukonkaye Petro ne:

— Kanuvua ne bukole bua kushala nanyi batabale nansha bua diba dimue bua tshinyi?

41Tabalayi. Tendelelayi, bua kanubuedi mu mateyi. Muoyi wa kuenza bimpe nudi nawu, kadi bukole bua kubikumbaja, kanuena nabu.

42Ke Yezu kuya kutendelela ku luseke musangu muibidi, wamba ne:

— Tatu wanyi, bu dikopu edi kadiyi mua kumuka kundi, tshiyi mudinue, bienzeke amu muudi musue!

43Kupinganaye tshiakabidi kudi balongi bende, kubasangana balale bikole. Mesu abu avua maneme bujitu.

44Yezu kubashiya kabidi, kuya kutendelela ku luseke musangu muisatu, wambulula amu miaku ya momumue.

45Pashishe kupinganaye kudi balongi bende, kubambila ne:

— Nutshidi anu balale, bikishe? Monayi diba didibu bafila Muana wa muntu mu bianza bia bantu babi ndimane kukumbana.

46Jukayi! Tuyayi! Tangilayi, muntu udi umfila kudibu, nyeye awu!

Badi bakuata Yezu(Mar 14.43-50; Luk 22.47-53; Yow 18.3-12)

47Patshivua Yezu wakula nanku, Yudase, umue wa ku dikumi ne babidi, kufika ne bantu bavule, bikale ne miele, kabidi ne mitshi. Ke bamfumu ba batuangaji ne bakulu ba bena Yuda bavua babatuma.

48Nanku Yudase uvua mupangile Yezu, ukavua mumane kumanyisha bantu ne: “Ungatua mishiku awu, ke yeye unudi nukeba, numukuate!”

49Ke Yudase kufika diakamue kudi Yezu, umuela muoyi:

— Mfumu, muoyi awu!

Pashishe kumutuaye mishiku.

50Yezu kumuamba ne:

— Mulunda wanyi, tshiudi musue kuenza, utshikumbaje lukasa.

Nanku bavua Yudase nabu kusemena kudi Yezu, kumukuata, kumulama bikole.

51Umue wa ku bavua ne Yezu kupatula muele wende, kutapa muena mudimu wa mutuangaji munene, kumukosa ditshi.

52Ke Yezu kumuamba ne:

— Pingaja muele webe mu tshibubu. Bualu yonsu watula muele, neafue ku muele.

53Kuena mumanye ne: ndi mua kubila Tatu wanyi, Yeye kuntumina amu mpindiewu batumibue bende bapite pa bisumbu dikumi ne bibidi bua kungambuluisha.

54Kadi meme muenze nanku, malu adi mu Mikanda ya tshijila neakumbane bishi? Bualu mu mikanda amu mbafunde ne: bienzeke amu nanku.

55Diba mene adi Yezu kukonka bantu ne:

— Nuvua ne bua kufika ne miele ne mitshi bua kunkuata meme anyi? Ndi muivi anyi? Mvua ndongesha matuku onsu mu nzubu wa Mvidi Mukulu, kadi kanuena bankuate to.

56Kadi bionsu abi mbienzeke bua kukumbaja miaku ya bambi idibu bafunde mu Mikanda ya tshijila.

Ke balongi bende bonsu kumushiya, kunyema.Badi baya ne Yezu mu Tshipangu tshikulu(Mar 14.53-65; Luk 22.54-55,63-71; Yow 18.13-14,19-24)

57Bavua bakuate Yezu, kuyabu kumufila kua Kayifa, mutuangaji munene, mu nzubu muvua balongeshi ba mikenji ne bakulu ba bena Yuda basangile.

58Petro uvua ulonda Yezu pa bule, too ne ku lupangu lua mutuangaji munene. Kubuelaye mu lubanza. Kusombaye pamue ne bena mudimu bavua balama tshiibi, bua kumona muakosabu tshilumbu.

59Bamfumu ba batuangaji ne bena Tshipangu tshikulu bonsu, bavua bakeba bualu bua dishima bua kudingila Yezu, bua bamone mua kumufundila tshibawu tshia lufu.

60Kadi nansha muvua bantu bavule bafike bua kumudingila malu, kabakapeta bualu nansha bumue to. Ku ndekelu bantu babidi kufika,

61bamba ne:

— Muntu ewu uvua wamba ne: “Ndi mua kupula nzubu wa Mvidi Mukulu ewu, kumuibakulula mu matuku asatu.”

62Ke mutuangaji munene kujuka, kukonka Yezu ne:

— Kuena wandamuna anyi? Malu adi bantu aba bakujadikila ngwowu anyi?

63Kadi Yezu uvua amu mupuwe. Ke mutuangaji munene kukonka Yezu ne:

— Mu dina dia Mvidi Mukulu udi ne muoyi, ndi nkulomba bua utuandamune, uditshipe. Udi Kristu, Muana wa Mvidi Mukulu anyi?

64Ke Yezu kumuandamuna ne:

— Muudi muambe amu mmomu. Kadi ndi nnujadikila ne: kutuadija ku mpindiewu nenumone Muana wa muntu musombe ku dia balume dia Mvidi Mukulu wa bukole buonsu. Nenumumone kabidi upueka mu mavuba a mu diulu.

65Ke mutuangaji munene kudipanda bilamba, wamba ne:

— Mmupende Mvidi Mukulu! Katutshiena tukengela bajadiki ba bualu ebu kabidi to! Nudi bumvue amu mpindiewu mudiye mupende Mvidi Mukulu.

66Nudi nukosa tshilumbu tshiende bishi?

Kumuandamunabu ne:

— Muntu awu mmuena tshibawu! Tshiende ndufu!

67Pashishe bamue kumufuila mate mu mpala, kumututa bisusu. Bakuabu kumukuma mapi,

68bamba ne:

— Wewe Kristu, utshinke, utuambile: udi mukutute nnganyi?

Petro udi uvila Yezu(Mar 14.66-72; Luk 22.56-62; Yow 18.15-18,25-27)

69Petro uvua mu lupangu, musombe pambelu. Muena mudimu mukaji kusemena kudiye, umuamba ne:

— Wewe kabidi uvua ne Yezu, muntu wa mu Ngalileya awu.

70Kadi Petro kuyila, bantu bonsu bateleja, wamba ne:

— Tshiena mumanye buudi musue kuamba.

71Pashishe Petro kuya ku tshiibi tshia lupangu. Mukuabu mukaji muena mudimu kumumona, kuambila bantu bavua kaba aku ne:

— Muntu ewu uvua ne Yezu wa mu Nazarete.

72Ke Petro kuyila tshiakabidi, ujadika ne:

— Ndi nditshipa ne: Tshiena mumanye muntu ewu to.

73Kunyima kua katupa, bavua muaba awu, kusemenabu kudi Petro, bamuamba ne:

— Bulelela udi umue wa kudibu. Tudi bumvue ku ngakuilu webe kuudi ufuma!

74Ke Petro kuamba ne:

— Bu meme nshima, Mvidi Mukulu annyoke! Ndi nditshipa ne: tshiena mumanye muntu ewu nansha!

Amu diba adi, tshitala kusamatshi.

75Petro kuvuluka tshivua Yezu mumuambile ne: “Tshitala katshiyi tshianji kusama, newikale mumane kunwila misangu isatu ne: tshiena mumanye muntu awu to.” Ke Petro kupatuka, wenda udila bikole.