2 Tesalonike Diumvuija - MUKANDA WA MYIDI MUKULU（TSH96）
Diumvuija— Mu mukanda muibidi mutumina bena Tesalonike, mupostolu Polu udi ubanga kumvuija tshiakabidi bualu bukavua bumane kuakula mu mukanda wende wa kumpala: dituku dia Dipingana dia Kristu mu butumbi buende. Bena ditaba ba mu Tesalonike batshivua amu belangana mpata mikole pa bualu ebu. Bamue bavua bamba ne: dituku edi ndimane kufika (2.2); bakuabu bavua balekela mene midimu ivuabu benze, bamba ne: bu mudi dituku dia nshikidilu wa bionsu pabuipi, tukuate mudimu bua tshinyi? Nanku bavua basomba mu lulengu, balomba biakudia kudi bantu bakuabu (3.6-12). Mukanda ewu udi ukeba kulengeja malongesha a patupu, avua mua kunyanga Tshisumbu tshia bena ditaba ba mu Tesalonike.Mupostolu udi wanji kuela Mvidi Mukulu tuasakidila, bua ditaba didi bena Tesalonike nadi, ne bua dinangangana didibu baleja patoke. Udi ubalombela kabidi kudi Mfumu, bua abapeshe dinanukila mu mudimu udiye mubabikidile (1.1-12). Pashishe udi utuadija diakamue bualu bunene bua mu mukanda wende: dilongesha dia pa dituku didi Kristu mua kupingana mu butumbi buende. Polu udi wamba ne: Kristu kena upingana mpindiewu. Muntu wa pa buende, udibu binyika “Muena Bubi”, udi ne bua kumueneka kumpala. Neasake bantu bua batombokele Mvidi Mukulu, babenge Kristu (2.1-12). Bua kudilongolola ku bikondu bikole abi, mbimpe bena ditaba bashale bashindame mu ditaba dia Lumu lua Disanka, kabayi bapungila mu ditendelela (2.13—3.5). Pashishe Polu udi ubela bikole bena lulengu ne bena lulombu, ubavuluija bilejilu bimpe bia bantu badi bakuata mudimu muabu muonsu, bua bujitu buabu kabuikadi pambidi pa bantu bakuabu (3.6-15). Ku ndekelu udi ubela lupemba, ubela kabidi muoyi mu dina dia Mfumu (3.16-18).Miaku ya Polu ya ne: “Udi kayi musue kukuata mudimu, alekele kudia” (3.10), idi ilongesha mubadi wa mukanda ewu ne: bena ditaba kabanyemi bujitu budi pambidi pabu. Kabalekedi midimu idi Mvidi Mukulu mufundile muntu yonsu, idiye ne bua kukuatshila ku dituku ku dituku bena nzubu wende, ne bantu bakuabu bonsu badi batekemena kudiye.
