Tobite 7 - MUKANDA WA MYIDI MUKULU（TSH96）

Raguwele udi ufila muanende wa bakaji kudi Tobiyase

1Padibu bafika mu tshimenga tshia Ekbatane, Tobiyase udi wambila mutumibue ne:

— Azarya musuibue, uye kumfila mpindiewu kua muanetu Raguwele.

Mutumibue wa Mvidi Mukulu kumufilaye kua Raguwele. Bobu kumusangana musombe pamue ne tshiibi tshidi kumpala kua lubanza. Bobu kudianza kuela Raguwele muoyi. Raguwele kuitaba ne:

— Balunda banyi, ndi mujingila dikasa dimpe. Anyishayi! Kubabuejaye mu nzubu muende.

2Raguwele kuambila mukajende Edna ne:

— Muana wa balume ewu mmufuanangane ne Tobite, muana wa tatu mukuabu!

3Edna kukonka benyi abu kabidi kuvuabu bafumina. Kumuandamunabu ne:

— Tudi difumina ku Ninive. Tudi bena Izrayele ba mu tshisamba tshia Naftali. Tuvua mu bupika.

4Mukaji kubakonka kabidi ne:

— Nudi bamanye muanetu Tobite anyi?

Bobu kumuandamuna ne:

— Eyowa, tudi bamumanye.

5Kubakonkaye tshiakabidi ne:

— Udi bishi?

Bobu kumuambila ne:

— Utshidipu, kabidi udi bilenga.

Tobiyase kuamba kabidi ne:

— Ntatu.

6Raguwele kutakuka panshi, kumupukila, kubanga muadi, umuambila ne:

— Muananyi, Mvidi Mukulu akuele lupemba! Udi muana wa muntu wa nsongu. Ndikasa dibi kaayi padi muntu muakane kabidi muenji wa bimpe ushala mpofu!

Kuelaye kabidi Tobiyase mu tshitupa, kutuadija kudila muadi.

7Mukajende Edna ne muanende Sara kubanga miadi bavuluka Tobite.

8Pashishe Raguwele kushipela benyi bende babidi abu mukoku wa tshimpanga, kubenzejilaye didia dinene.

9Bobu bamane kuowa mayi, bumusha mikiya bu mudi tshilela, kusombabu ku mesa bua kudia. Tobiyase kuambila Rafayele ne: — Azarya musuibue, ambila Raguwele bua ampeshe muanetu wa bakaji Sara ikale mukajanyi.

10Raguwele umvua nanku, kuambilaye nsongalume ne:

— Mpindiewu anji kudia, kabidi unue, malu a dilolu edi akulengelele. Kakuena muntu udi mua kusela Sara to. Nansha meme tshiena mua kudienzela bua kumuselesha kudi munga mulume nansha, anu kuudi wewe. Bualu wewe udi muana wa muanetu mu diku. Kadi muananyi, ndi musue kukuambila bualu mudibu patoke.

11Nkadi mumuseleshe kudi bana betu bena Izrayele balondangana muanda mutekete. Bonsu abu kutuabu amu butuku buvuabu bamubuelela mu nzubu. Nansha biobi bienzeka nanku, muananyi, kadi anji kudia, unue, Mvidi Mukulu neakuambuluishe.

12Kadi Tobiyase kuandamuna ne:

— Meme tshiena mua kudia nansha kunua kantu muaba ewu, paudi kuyi muanji kukosa tshilumbu etshi.

Raguwele kumuandamuna ne:

— Bangabanga ndi ntshikosa, bualu muananyi mmuena kuebe bilondeshile mikenji ya Moshe, mudi Mvidi Mukulu mumane kuanyisha. Ke padiye mushale mukajebe, umuakidile bu muena kuebe. Bituadijila mpindiewu, udi bayende, yeye mmukajebe. Udi ukulamata biangatshile lelu too ne kashidi. Maweja-Nangila muena kulu neakuenzele bilenga muananyi, bua butuku ebu bionsu bipite biakane. Akufuile luse kabidi akulame mu bupole.

13Raguwele kubikila muanende wa bakaji Sara. Padiye ufika, udi umukuata ku tshianza, umufila kudi Tobiyase, umuambila ne:

— Umuangate bu mukajebe, bilondeshile mudibu bafunde mu mukanda wa Mikenji ya Moshe. Umuangate uye nende mu ditalala kudi tatuebe. Mvidi Mukulu wa mu diulu akulombole, kabidi akututshishe dikasa dimpe.

14Pashishe Raguwele kubikila mukajende bua amutuadile mutshi wa kufunda nawu mukanda. Kufundaye mukanda wa disanga dibaka. Uvua ujadika muvuaye mufile Sara kudi Tobiyase bua ikale mukajende bilondeshile mudibu bafunde mu mikenji ya Moshe. Bionsu abi bimane kuenzeka, bonsu kutuadijabu kudia ne kunua.Tshibilu tshia dibaka butuku

15Raguwele kubikila muena kuende Edna, umuambila ne:

— Mukajanyi, ulongolole tshibambalu tshibidi tshia kulala, ufilamu Sara.

16Edna kuya kulongolola bulalu mu tshibambalu, amu muvua bayende mumuambila. Kufilayemu muanende, kutuadija kudila. Pashishe kukupulaye binsonji.

17Kuambaye ne:

— Kolesha muoyi muananyi, Maweja-Nangila muena kulu neakusankishe pa mutu pakukubungamija. Kuteketshi mu maboku to.

Pashishe kupatukaye.