Sira 6 - MUKANDA WA MYIDI MUKULU（TSH96）

1Kuikadi muluishi wa unudi badia nende bulunda,

bualu muntu udi ne lumu lubi udi ufua bundu,

bantu badi bamupepeja.

Abi ke bidi bienzekela muena mpala ibidi.

2Majinga ebe kaena mua kukutshimuna,

bualu bukole buebe buonsu budi mua kuvingutuka bibi.

3Bualu neushale bu mutshi mume, udi mupopoka mabeji,

kauyi ukuama bimuma.

4Majinga mabi adi afikisha muntu ku kabutu,

amusekesha kudi baluishi bende.

Bulunda bua bushuwa ne bua dishima(12.8-18; 37.1-6; Nsum 17.17)

5Miaku mimpe idi ivudija bulunda,

muntu udi wakula bimpe udi upeta mandamuna mimpe kudi bantu.

6Nansha badi bakuela muoyi bikale bavule,

kadi munkatshi mua bantu tshinunu,

usungula mibelu ya muntu amu umue.

7Pawasua kupeta mulunda, wanji kumanya mudiye,

kuanji kumunanga musangu umue to.

8Bualu, kudi balunda ba diba dia disanka diabu,

kadi, padi dikenga dikukuata,

muntu nansha umue wa kudibu kena ufika to.

9Kudi mulunda udi wandamuka muluishi,

padiye ukupepeja, udi ukukeba matandu,

bua kukufuisha bundu.

10Kudi balunda badi bakulamata diba dia kudia,

kadi, paudi mu dikenga,

muntu nansha umue wa kudibu kena ufika paudi to.

11Mu matuku audi ne bubanji, balunda abu badi bu wewe.

Kabidi badi batumina bena mudimu bebe diyi.

12Kadi dituku dia dikenga, badi bakuluisha,

ushala kuyi ubamona kabidi to.

13Epuka baluishi bebe.

Udimukile bantu badi baditemba ne tudi balunda bebe.

14Mulunda muimpe udi bu muaba mushindame utudi mua kunyemena.

Muntu udi mupete mulunda wa nanku,

mmupete mabue a busanga a mushinga mukole.

15Mulunda wa bushuwa, udi upita biuma bionsu

Katuena mua kumutuila mushinga to.

16Mulunda muimpe udi bu buanga bukole,

budi Maweja-Nangila upetesha bantu bende badi bamutshina.

17Muntu udi utshina Maweja-Nangila

udi mumanye mua kusungula bende balunda.

Bualu mudiye ke mudi kabidi mulunda wende.

Mutudi mua kupeta meji

18Muananyi, longa malu bituadije ku bunsonga buebe.

Newikale ne Meji too ne pawatoka nsuki.

19Keba Meji bu mudi tshidime ne mumiaminyi wa maminu benza.

Tekemena ne lutulu dikasa dimpe didiwu akututshisha.

Bualu pautshidi wakeba newanji kukenga,

kadi papita matuku, neusanke ne bipeta biawu

20Meji adi akolela bantu

bavua kabayi babuela mu kalasa kawu.

Muntu udi kayi ne lungenyi kena wakeba ne dinanukila to.

21Muntu awu udi utangila meji amu bu dibue dia bujitu,

dia kuteta nadi bukole buende.

Kena ujingakana bua kudishiya panshi.

22Meji adi makole bua kuapeta.

Bantu ba bungi kabena nawu.

23Muananyi wa balume, teleja, kabidi umvua tshindi ngamba.

Kuena mua kubenga pandi nkubela.

24Bueja makasa ebe mu tshikunyi tshia Meji.

Fila nshingu webe mu nshinga wawu wa tshiamu.

25Inama bua kuambula pa makaya,

nkanu yawu kayikutondi.

26Uye kudiwu ne muoyi webe mujima.

Ulonde mudiwu aya ne muebe muonsu.

27Ualonde, wakeba, nenku newamanye.

Kadi, pawapeta kualekedi nansha.

28Bualu kunshikidilu neupete dikisha pawikala nawu,

dikenga diebe nediandamuke disanka.

29Nanku bikunyi biawu nebikulame bimpe.

Nshinga wawu wa tshiamu neashale tshitampi tshiebe tshia lumu.

30Bujitu budiwu akuambuisha, budi bu tshifulu tshia mpawungi,

nkanu yawu idi bu mukaba wa mushinga mukole.

31Neuvuale meji bu mudibu bavuala tshilamba tshia lumu,

kabidi neuase bu mudibu base tshifulu tshia bumfumu.

32Muananyi, pawikala musue, newalonge.

Pawikala ne disuminyina, newikale muntu wa dimanya dikumbane.

33Neulonge malu pawikala musue kuteleja.

Paudi ne ntema neupete meji.

34Utantshile amu kutantshila bantu bakadi bamana kumona mudi panu,

ulamate meji adibu bakulongesha.

35Teleja ne muoyi webe onsu diyuki dia pa malu a Mvidi Mukulu.

Kujimiji kasumuinu nansha kamue kadi mua kukulongesha malu.

36Wewe mumone muntu wa lungenyi, uye kudiye diakamue.

Tuuta misesu ku nzubu kuende.

37Vuluka mikenji ya Maweja-Nangila.

Kumbaja amu kukumbaja meyi ende matuku onsu.

Yeye mene neakoleshe muoyi webe.

Neakupe meji audi ujinga.