Estere ngreke B - MUKANDA WA MYIDI MUKULU（TSH96）

Mukenji wa dibutula bena Yuda 1 Mukanda uvua mufunda nenku: “Artashasta, mukalenga munene udi utumina balombodi ba bitupa bia buloba lukama ne makumi abidi ne muanda mutekete bidi mu bukalenga, kabidi ne bena mudimu banene badi babatua munyima mukanda ewu, biangatshile ku Inde too ne ku bena Kushe. 2 “Ndi mfumu wa matunga mavule, bumfumu buanyi budi butangalake mu buloba bujima. Kadi tshiena musue kuditemba bua bumfumu. Ndi musue kulombola matuku onsu ne muoyi muakane ne kalolu. Ke mushindu undi mua kulama bantu banyi ku bimvundu, kubalekela mu bukalenga buanyi bintu bimpe bia matunga makuabu, bua bamone mua kusomba ne bantu ba mu matunga makuabu, mu ditalala didi bantu bonsu bajinga! 3 “Meme kukonka bafidi banyi ba ngenyi mushindu undi mua kukumbaja bualu ebu. Umue wa kudibu, ke Amane uvua muntue munyima ku muanzu munene mu bukalenga buanyi, uvua musunguluke kutudi bonsu bua meji ende, kabidi uvua umueneka muvuaye munnange ne mundamate. 4 Kumanyishaye ne kudi tshisamba tshia bantu ba ngenzelu mibi, tshidi tshitangalake munkatshi mua bisamba bionsu bia pa buloba. Bantu aba badi ne mikenji idi kayiyi ifuanangana ne ya matunga makuabu, badi babenga amu kubenga mua kutumikila mikenji ya mukalenga, badi baluisha bukalenga bundi ndombola ne muoyi umue, bua bantu bonsu basanke. 5 Ndi mumone ne: tshisamba etshi, amu tshiotshi nkayatshi tshidi tshibenga amu kubenga bantu bakuabu, tshidi tshiditeka pa nkayatshi, tshilonda mikenji idi matunga makuabu kaayi mamanye, ntshikina bionsu bindi ndongolola, tshidi tshienza malu mabi, nenku, malu a mushindu ewu, adi mua kunyanga bukalenga. 6 Ke pandi ngela mukenji bua kubutula badi Amane mulombodi wa malu a mu bukalenga, udi mundonde munyima mu bukalenga kabidi mfumu wa bantu, mumfundile mu mukanda. Bantu abu mbaluishi betu. Babashipe bonsu ne bakaji ne bana, kakushadi muntu to. Kababafuidi luse, kababengeleki to. Bakumbaje mukenji ewu, mu matuku dikumi ne anayi a ngondu wa dikumi ne muibidi, nansha ngondu wa Adare tshidimu etshi. 7 Bualu bantu aba, kabena bumvuangana ne bantu bakuabu nansha. Nenku nebabakengeshe bikole, babela mu kandondu ka bafue amu dituku dimue. Nenku kabena mua kupangisha bukalenga buetu mu matuku adi kumpala bua kutungunukabu bimpe mu ditalala ne mu bupole.”