Sira 12 - MUKANDA WA MYIDI MUKULU（TSH96）

Lekela kumyuangana ne badi babenga Mvidi Mukulu

1Paudi musue bua bakuele tuasakidila bua bimpe biudi muenze,

umanye muntu uudi mubienzele.

2Bantu badi balamata Mvidi Mukulu

ubenzele bimpe.

Padibu kabayi bakuenzela pabu bimpe, Mvidi Mukulu neakuambuluishe.

3Bantu badi batungunuka amu mu

dienza dia bibi,

kabidi babenga mua kuambuluisha bapele,

kabena bapeta bualu bua nsongu to.

4Pesha muntu udi ulamata Mvidi

Mukulu tshintu,

kadi kuambuluishi muenji wa bibi nansha.

5Enzela muntu mupuekele bimpe. Kupeshi muntu udi upetula Mvidi

Mukulu tshintu to,

bualu bidi bu kumupa mukombu bua kukututaye,

neakuenzele bibi kabidi bipite, bua bimpe bionsu biuvua mumuenzele.

6Muena Kulu udi udiwula muenji wa

bibi,

neamunyoke ne dinyoka didi dimukumbanyina.

7Upeshe muntu muimpe tshintu, kadi upale muntu mubi.

Nudimukile balunda ba dishima

8Kabena bamanyina mulunda mu

matuku a disanka.

Kadi mu matuku a dikenga, muluishi udi umueneka patoke.

9Padi muntu mu disanka, baluishi

bende badi ne dibungama.

Kadi padiye mu dikenga, nansha

mulunda wende mene udi umulekela.

10Kuena mua kutekemena kudi muluishi

webe,

bualu bubi buende budi bu mudi dimoma didi dikuata ku tshiamu.

11Nansha yeye mudipuekeshe kumpala kuebe,

wenda muiname, umudimukile, umumanye kabidi.

Umuenzele bu mudi muntu usukula lumuenu,

bua kujadika ne: dimona dialu kadiena mua kushala kashidi.

12Kusombi pamue nende,

bua kavu kukutonkola, kukupingana mu nkuasa.

Kashadi tshindonda tshiende, bualu udi mua kubaaba muaba webe.

Kunyima kua wewe mumane kupeta kanyinganyinga,

neumvue buimpe bua bindi nkuambila ebi.

13Muntu musuma kudi nyoka uvuaye unaya nende,

muntu udi mua kumumvuila luse anyi?

Nansha bantu bonsu badi babunda nyama ya tshisuku,

badi mua kubumvuila luse anyi?

14Ke mudibi ne bua muntu udi wendakana ne muenji wa bibi,

ubuelakana mu bubi buende.

15Patshidi muntu mubi wenda pamue nebe,

kena uleja muende mudiye muonsu to.

Kadi paudi upeta dikasa dibi udi ukushiya amu nanku.

Paudi wimana kulu, udi usokoma,

paudi upangila bualu, udi udileja patoke.

16Muluishi udi uyukila nebe ne miaku ya lubombu,

kadi udi welangana meji a mua kukuela mu dijimba.

Udi mua kumona muluishi upuekesha ne binsonji.

Kadi padiye upeta mushindu wa kukushipa

udi umatshisha mashi ebe panshi.

17Padi dikenga dikukuata, yeye udi ufika kumpala,

udileja bu udi musue kukusamba, ukuteya.

18Nealeje muende muonsu mudiye, neakupe mutu,

ukuseka, ukuma bikashi, wenza mutoyi muvule.