Yoshuwa Diumvuija - MUKANDA WA MYIDI MUKULU（TSH96）

Diumvuija— Mukanda wa Yoshuwa, mupinganyi wa Moshe, udi utulondela muvua Yoshuwa ulombola bisamba bia bena Izrayele, bua bamone mua kubuela mu ditunga dia bena Kenaane, basemu. Mu mukanda ewu mudi bitupa bisatu:1. Dibuela mu ditunga dia Kenaane (tshit. 1 too ne ku tshit. 12).2. Diabanya dia ditunga (tshit. 13 too ne ku tshit. 21).3. Matuku a ndekelu a Yoshuwa panu (tshit. 22 too ne ku tshit. 24).Mvidi Mukulu mmupeshe bantu bende ditunga diabu, bua kukumbaja bivuaye mulaye bankambua ba bena Izrayele, muambuluile ne Moshe. Mu mianda ya kale ya bena Izrayele idi itumanyisha bivua Mvidi Mukulu mubenzele, dibuela dia mu Kenaane ndifuanangane ne dipatuka dia mu Ejipitu. Bu muvua Mvidi Mukulu muenze diba divua bena Izrayele bapatuke mu Ejipitu, ke mudiye wenza mpindiewu kabidi malu a kukema, wambuluisha bantu bende mu mvita yabu, bua batshimune baluishi babu.Padibu batumanyisha mudi tshisamba tshionsu tshipeta muaba watshi mu ditunga dia Kenaane (nansha kabayi banji kudikuata dionsu dijima mene), badi basue kutuleja mudi Mvidi Mukulu unanga bantu bende, mmusue bua bonsu bapete muaba muimpe wa kusomba ne wa kudima. Ke mudibu bafunde mena a bungi a misoku mu bitupa bikuabu bia mukanda (tshilejilu: tshit. 13; tshit. 15 ne tshit. 16).Mu mukanda mujima, Yoshuwa udi uvuluija bantu ne: bu mudi Mvidi Mukulu ukumbaja bivuaye mutulaye, tukumbaje kabidi bituvua bamulaye. Bualu bu mudi bena Izrayele basombe mpindiewu munkatshi mua bantu benyi, badi kabayi bamanye Mvidi Mukulu, badi babuela mu njiwu mipiamipia ya kuvila Mvidi Mukulu wabu. Ke padi Yoshuwa musue bua benzulule tshiovu tshivuabu badie ne Mvidi Mukulu. Ke tshidibu benza mu tshisangilu tshia mu musoku wa Shekeme (tshit. 24). Bantu badi balaya mua kuitaba Mvidi Mukulu. Ke mudi malu a bena Izrayele atuadija mu ditunga diabu. Bushiwa misangu mivule bantu benyi nebakebe mua kunyenga bena Izrayele ditunga diabu. Kadi misangu mivule badi ne bua kubela kabidi bena Izrayele bua bakumbaje bivuabu balaye Mvidi Mukulu wabu.