1Telejayi bidi Mvidi Mukulu mumanyishe muambi Abakuke.
Mvidi Mukulu, kuena umona bena tshinyangu anyi?2Maweja-Nangila, matuku bungiwu
andi nkubikila, Wewe nansha kunteleja!
Ndi nkumanyisha tshinyangu tshitudi natshi,
kadi Wewe nansha kutusungidila!
3Udi ummuenesha mabika ne mala nanku bua tshinyi?
Bantu badi bakengeshangana bibi.
Muudi ubatangila, kuyi wenza bualu mbishi?
Ndi munkatshi mua tshinyangu ne tshimbambila,
miaba yonsu ngumvua amu bilumbu ne matandu.
4Bu muudi kuyi wenza bualu,
mikenji yebe mmifue,
bena buenzayi badi babinga,
bantu babi badi bapisha badi kabayi ne bualu,
nsambu yonsu badi bayikosa amu bibi.
Mvidi Mukulu udi wandamuna: bena Babilone nebafike5Maweja-Nangila udi wandamuna ne:
Tangilayi malu adi enzekela
mu matunga adi nenu mutumba.
Nenukeme bikole, nukatshila!
Bualu bunene nebuenzeke; nenubumone.
Muntu munuambilebu amu mukana,
kanuvua mua kumuitaba to.
6Ndi mbikila bena Babilone,
tshisamba tshia bantu ba lonji, kabayi luse.
Badi bendakana pa buloba bujima,
bakeba kudia bumfumu mu matunga a bende.
7Badi batshinyisha bantu, babakuatshisha bowa.
Badi badienzela mudibu basue,
bajadika nkayabu bidi bimpe kuenza.
8Nyama yabu ya tubalu mmipite ya nkashama ku lubilu.
Idi ne lonji lupite lua nyama ya bimungu idi yenda ne nzala.
Babandi babu ba pa tubalu,
badi bafumina kule, benda batupika.
Badi ne lubilu bu lua nyunyu ya mikanku,
idi imona nyama wa kudia, yikila ne lukuka pambidi pende.
9Badi bafika ne tshinyangu bu mvunde,
batangila kumpala ne lukuka,
baboya bena lukanu bungi bu lusenga.
10Badi baseka bakalenga ba matunga, banaya nabu,
batshimbakaja bakulu ba mu bukalenga buabu.
Bimana bivua bantu bakoleshe nabi bimenga,
badi babimona bu bintu bia tshianana, benza anu kabumba ka buloba, babandapu, bakuata tshimenga.
11Badi bafika lubilu bu mvunde,
bakudimuka, baya.
Bukole buabu ke nwidie wabu!
Muambi udi udidila Mvidi Mukulu, bua tshinyangu tshia bena Babilone12Wewe udi Maweja-Nangila wa kale ne kale.
Udi Mvidi Mukulu wanyi wa tshijila,
wa kashidi ne kashidi.
Maweja-Nangila, muena bukole utudi tutekemena,
Wewe kusungula bena Babilone,
kukolesha baluishi betu,
bua bamfuishe, batunyoke.
13Kadi mesu ebe adi mimpe be.
Kuena mua kuanyisha bua amone malu mabi.
Bantu badi bakengesha bakuabu,
kuena mua kubatangila, kuyi wenza bualu.
Kadi muudi umona bidi bena tshinyangu abu benza,
kuyi wamba bualu, mbishi?
Bantu babi aba badi babutula matunga
a bantu ba nsongu badi babapita bobu.
Kadi udi umona nanku, upuwa bua tshinyi?
14Paudi kuyi uludika bantu,
badi bu mishipa, nansha bu bishishi,
bidi kabiyi ne mulombodi wabi.
15Ke mudi bena Babilone bakuata bantu,
mudibu baloba mishipa ne ndobu.
Badi bu balobi badi bakuata mishipa mu makondu abu,
bayipatula mu mayi, basanka, batshionkomoka.
16Badi balambula makondu abu milambu,
bawoshila musenga wa kamonya, mudibu benzela mvidie.
Bualu ke adi abadisha, abanemesha.
17Bena Babilone nebatule amu kutula
miele yabu ya nwita anyi?
Nebabutule amu kubutula bantu ba matunga makuabu,
kabayi bumvue luse anyi?
Who We AreWhat We EelieveWhat We Do
2025 by iamachristian.org,Inc All rights reserved.
