Balombodi 18 - MUKANDA WA MYIDI MUKULU（TSH96）

Bena Dane badi bumuka mu buloba buabu

1Tshikondu atshi bena Izrayele kabavua ne mukalenga to. Tshisamba tshia bena Dane tshivua tshikeba muaba wa kuasa. Bualu ku bisamba bionsu bia bena Izrayele, bena Dane kabavua banji kupeta muaba wa kuasa to.

2Nanku bena Dane kusungula munkatshi muabu bantu balume batanu bavua ne dikima. Bantu abu bavua bumukila mu bimenga bia Sora ne Eshetayole, bua kuya kutentekela ditunga bimpe. Bantu balume abu kufika mu buloba bua mikuna ya Efrayime. Kuimanabu pabuipi ne kua Mika.

3Pavuabu muaba awu, kumvuabu nsongalume wa bena Levi wakula. Kumanyabu tshiakuidi tshiende. Kuyabu kukonka nsongalume awu ne:

— Udi mukubikile muaba ewu nnganyi? Udi wenza tshinyi? Tshiudi musombele muaba ewu ntshinyi?

4Nsongalume kuandamuna ne:

— Mika uvua musue kundama. Udi umfuta bua ngikale mutuangaji wende.

5Kumuandamunabu ne:

— Nanku, ebeja Mvidi Mukulu. Tudi basue kumanya ne: luendu luetu elu nebikale luimpe anyi?

6Mutuangaji kubambila ne:

— Kanutshinyi to! Maweja-Nangila udi nenu mu luendu elu.

7Bantu batanu abu kutungunuka ne luendu, too ne ku Layishe. Kusanganabumu bantu bonsu basomba ne ditalala, anu bu bena Sidone. Kakuvua muntu nansha umue uvua mubenge mfumu wa buloba abu to. Bena Layishe bavua mutantshi mule ne bena Sidone. Kabavua ku diyi dia muntu mukuabu to.

8Bantu ba bena Dane bavuabu batume abu, kupinganabu ku Sora ne ku Eshetayole. Bana babu kubakonka mushindu uvua luendu.

9Kuandamunabu ne:

— Jukayi, tuye kuluisha bena Layishe. Tudi bamone ne: buloba buabu budi buimpe butambe. Kanushadi basombe amu tshianana to. Jukayi lukasa, nuye kukuata buloba ebu!

10Panuafikamu, nenusangane bantu abu kabayi badimuke to. Mbase mu buloba bualabale. Mvidi Mukulu neafile buloba abu mu bianza bienu. Kabidi bintu bilenga bionsu bia panshi pa buloba bidi mu buloba abu.

11Nanku bena mvita nkama isambombu ba bena Dane, bavua ne bia mvita mu bianza, kumuka mu Sora ne mu Eshetayole.

12Kuyabu kuasa mitanda yabu luseke ludi diba dibuelela lua Kiriyate-Yeyarime, mu ditunga dia bena Yuda. Ke padibu binyika muaba awu too ne mpindiewu ne: Makane-Dane, mmumue ne: mitanda ya Dane.

13Bena mvita abu kumuka muaba awu, kuya mu buloba bua mikuna ya Efrayime. Kufikabu pabuipi ne nzubu wa Mika.

14Bena mvita batanu bavwa bamane kutentekela buloba bua Layishe, kuambilabu balunda babu ne:

— Numanye ne: ku nzubu eyi, kudi nzubu mukuabu muikale ne lupingu, ne bintu bia kubuka nabi. Mudi kabidi lupingu lukuabu lua tshiamu tshienguluke. Nuenu nkayenu nujadike tshinudi ne bua kuenza.

15Ke bantu batanu abu kuya ku nzubu wa Mika. Kubuelabu mu nzubu muvua nsongalume wa bena Levi, kumuelabu muoyi.

16Diba adi bena Dane nkama isambombu, bavua ne bia mvita mu bianza, bavua bimane mu mushiku wa mbelu wa nzubu awu.

17Bantu batanu bavua bamane kutentekela ditunga abu bamane kubuela mu nzubu, kuambulabu mpingu yonsu ivuamu, kabidi ne bintu bia kubuka nabi, ne lupingu lua tshiamu tshienguluke. Mutuangaji uvua muimane mu mushiku wa mbelu pamue ne bena mvita nkama isambombu.

18Mutuangaji umona bantu babuela mu nzubu wa Mika, bambula mpingu ne bintu bia kubuka nabi, kubakonkaye ne:

— Tshinudi nuenza mu nzubu emu ntshinyi?

19Bena mvita kumuandamuna ne:

— Puwa, buikila mukana! Uye netu, bua wikale mutuangaji mu tshisamba tshietu. Udi musue kuikala mutuangaji wa muntu umue, anyi wa tshisamba tshijima tshia bena Izrayele?

20Mutuangaji kusanka bikole bua meji awu. Kuambulaye mpingu, ne bintu bia kubuka nabi, kudisangaye ne bena mvita.

21Bena Dane kutungunuka ne luendu, bamane kupitshisha bana, bimuna ne mabuki kumpala kuabu.

22Bena mvita bakavua mutantshi mule ne nzubu wa Mika, ke Mika ne bena mutumba nende, kudisangisha bua kubalondakaja.

23Kuelabu bena Dane bibingu. Bena Dane kukudimuka kudi Mika, kumukonka ne:

— Tshidi tshikutonda ntshinyi? Udi utulonda ne bantu bungi nenku bua tshinyi?

24Mika kuandamuna ne:

— Nudi bangate mvidie yanyi imvua mudienzele. Kabidi nudi bakuate mutuangaji wanyi. Tshiena mushale ne tshintu to. Kadi nudi nunkonka tshidi tshintonda bishi?

25Bena mvita kuandamuna ne:

— Buikila mukana! Bana betu bakuabu badi mua kufika munda, kukuluisha. Nanku neudikebele lufu, wewe ne bena nzubu webe!

26Ke bena mvita kutungunuka ne luendu. Mika umona ne: bena mvita abu badi ne bukole bua bungi, kupinganaye ku nzubu kuende!

Muaba wa tshijila mu tshimenga tshia Dane

27Bena Dane kuangata bintu bivua Mika mudienzele. Kuyabu kabidi ne mutuangaji wa Mika uvua umuenzela mudimu. Bena Dane kuya kuluisha bena Layishe. Kushipabu bantu bavua mu tshimenga atshi, kabayi ne bualu, basomba mu ditalala. Bena Dane kuosha tshimenga atshi.

28Tshimenga tshia Layishe tshivua mu tshibandabanda tshia Bete-Rekobe, mutantshi mule ne Sidone. Bena Layishe kabavua ku bumfumu bua muntu mukuabu to. Ke pavua muntu nansha umue kayi ufika bua kubambuluisha. Bena Dane kuasulula tshimenga atshi, kusombamu.

29Kushintululabu dina dia Layishe, divuabu binyika tshimenga atshi kale. Kutshinyikabu ne: Dane, dina dia nkambua wabu, muana wa Yakobe.

30Bena Dane kuimanyika lupingu lua Mika bua kuntendelela. Yonatane, muana wa Ngershome (Ngershome uvua muana wa Moshe), kushala mutuangaji wa tshisamba tshia bena Dane. Ndelanganyi ya Yonatane ivua anu mu mudimu ewu wa butuangaji too ne pavua bantu baye mu bupika.

31Bena Dane bavua anu batendelela lupingu lua Mika matuku onsu awa muaba wa tshijila wa Mvidi Mukulu mu Silo.