2 Kulondolola 18 - MUKANDA WA MYIDI MUKULU（TSH96）

Yosafate udi umvuangana ne Akabe, mukalenga wa bena Izrayele(1 Bak 22.1-4)

1Mukalenga Yosafate uvua ne bubanji ne lumu. Uvua museleshe muanende wa balume mukaji, muana wa Akabe, mukalenga wa Izrayele.

2Bidimu bimane kupita, Yosafate kuya kudi Akabe, mu tshimenga tshia Samariya. Akabe kushipa mikoku ya bungi ne ngombe, bua kuakidila Yosafate ne bantu bavuaye nabu. Pashishe, Akabe kulomba Yosafate, bua baye kuluisha tshimenga tshia Ramote tshivua mu ditunga dia Ngilaade.

3Akabe kukonka Yosafate ne:

— Udi mua kumfila mu mvita bua tuetu kukuata tshimenga tshia Ramote tshidi mu ditunga dia Ngilaade anyi?

Yosafate kuandamuna ne:

— Wewe ne meme tukadi bantu bamue. Bantu bebe mbanyi, banyi mbebe. Tudi tuya nebe pamue mu mvita.

Bambi, bena mudimu ba mukalenga(1 Bak 22.5-12)

4Kadi Yosafate kuambila Akabe ne:

— Bangabanga, ukonke Maweja-Nangila.

5Nanku, Akabe, mukalenga wa bena Izrayele, kubikidisha bambi bende nkama inayi. Kubakonkaye ne:

— Tudi mua kuya kuluangana, bua kukuata tshimenga tshia Ramote tshidi mu ditunga dia Ngilaade, anyi katuena mua kuya?

Bambi kuandamuna ne:

— Udi mua kuya. Maweja-Nangila neafile tshimenga atshi mu bianza biebe.

6Kadi, mukalenga Yosafate kukonka Akabe ne:

— Munemu kamuena muambi mukuabu nansha umue, udi mua kutukonkela Maweja-Nangila anyi?

7Akabe, mukalenga wa bena Izrayele, kuandamuna ne:

— Munemu mudi anu muambi mukuabu umuepele. Dina diende mMika, muana wa Imla. Kadi tshiena mumunange to. Bualu misangu yonsu udi ummanyisha amu malu mabi. Katshia katu muanji kungambila bualu buimpe to.

Yosafate kuandamuna ne:

— Lekela kuamba muambi nanku.

8Ke Akabe, mukalenga wa Izrayele, kubikila muntu uvua ukuata mudimu mu lubanza lua nzubu wa bukalenga. Kumutumaye lukasa bua kuya kubikila Mika, muana wa Imla.

9Pavua bambi balondela bantu malu, Akabe mukalenga wa Izrayele, ne Yosafate mukalenga wa Yuda, bavua basombe mu nkuasa yabu ya bukalenga. Bavua bavuala bilamba biabu bia bukalenga, basombe mu tshialu tshivua pabuipi ne tshibuelelu tshia tshiibi tshia tshimenga tshia Samariya.

10Muntu kampande, dina diende Sedekiya, muana wa Kenaane, uvua muenze nsengu ya tshiamu. Kuambaye ne:

— Maweja-Nangila udi wamba ne: “Nsengu eyi ke tshimanyinu tshidi tshileja bukole buudi ubutula nabu bena mvita ba bena Arame.”

11Bambi bakuabu bonsu kuambulula miaku ayi, bamba ne:

— Mukalenga, uye kuluisha tshimenga tshia Ramote tshidi mu ditunga dia Ngilaade. Neutshimune. Maweja-Nangila neafile tshimenga atshi mu bianza biebe.

Muambi Mika(1 Bak 22.13-28)

12Muntu uvua muye kukeba Mika, kuambila Mika ne:

— Teleja, bambi bonsu mbambile mukalenga Akabe meyi a mushindu umue ne: neutshimune. Wewe kabidi umuambile meyi a mushindu umue ne a bambi bakuabu. Umujadikile ne: neutshimune.

13Kadi muambi Mika kuandamuna ne:

— Bu mudi Maweja-Nangila ne muoyi, nemmuambile anu tshidi Mvidi Mukulu wanyi musue.

14Muambi Mika ufika kudi mukalenga Akabe, mukalenga Akabe kumukonka ne:

— Muambi Mika, tudi mua kuya kuluangana bua kukuata tshimenga tshia Ramote tshidi mu ditunga dia Ngilaade, anyi katuena mua kuya?

Muambi Mika kumuambila ne:

— Udi mua kuya. Neutshimune. Maweja-Nangila neafile tshimenga atshi mu bianza biebe.

15Kadi, mukalenga Akabe, kumukonka kabidi ne:

— Paudi wakula mu dina dia Maweja-Nangila, ndi nkusengelela ne: ungambile anu malu malelela! Tshidi Maweja-Nangila mukuambile ntshinyi?

16Ke muambi Mika kumuambila ne:

— Ndi mumone bena Izrayele bonsu,

bamuangalake pa mikuna,

bu mudi mikoku kayiyi ne mulami.

Maweja-Nangila udi wamba ne:

“Bena Izrayele kabatshiena ne bamfumu to.

Muntu yonsu apingane kuende talalaa.”

17Akabe mukalenga wa Izrayele kuambila Yosafate ne:

— Mvua mumane kukuambila ne: muambi Mika udi ungambila anu malu mabi misangu yonsu. Katshia katu muanji kungambila bualu buimpe to!

18Kadimuambi Mika kuamba kabidi ne:

— Teleja anu tshidi Maweja-Nangila wamba. Ndi mumone Maweja-Nangila musombe mu nkuasa wende wa bukalenga. Bena mudimu bende bonsu ba mu diulu bavua bimane, aba ku dia balume diende, bakuabu ku dia bakaji.

19Nanku, Maweja-Nangila kukonka ne: “Udi mua kuya kushima Akabe bua kuyaye kuluisha tshimenga tshia Ramote tshidi mu ditunga dia Ngilaade, bua kumushipabu mu tshimenga atshi nnganyi?” Kufilabu meji mashilangane.

20Diba adi mutumibue uvua ulombola bambi, kusemena kudi Maweja-Nangila, umuambila ne: “Meme nenye kumushima.” Maweja-Nangila kukonka ne: “Neuye kumushima mushindu kaayi?”

21Mutumibue kuandamuna ne: “Nensake bambi bonsu, bua bambile mukalenga Akabe malu a dishima.” Maweja-Nangila kumuandamuna ne: “Ke mushindu muimpe mutambe bua kumushima. Uye kuenza nanku!”

22Eyowa, bionsu abi mbimane kuenzeka. Maweja-Nangila ke uvua mutume mutumibue bua adinge bambi bebe bonsu. Bualu Maweja-Nangila udi mumane kujadika bua kukubutula.

23Diakamue, Sedekiya, muana wa Kenaane, kusemena kudi muambi Mika, kumutapa dipi, ukonka ne:

— Muudi mua kujadika ne: Mueyelu wa Maweja-Nangila mmumane kunshiya meme, bua kukuakuisha anu wewe mmunyi?

24Muambi Mika kuandamuna ne:

— Eyowa, wewe mene neujadike bionsu ebi, dituku diwikala ukeba muaba musokome wa wewe kubutama mu tshibambalu tshia munda mua nzubu webe.

25Pashishe, Akabe mukalenga wa bena Izrayele kuambila bena mudimu bende ne:

— Nukuate muambi. Numufile kudi mulombodi wa tshimenga tshia Amone, ne kudi Yowashe, muana wa mukalenga.

26Nubambile ne: mukalenga Akabe udi wamba bua kuela mulumiana awu mu lukanu. Bamupeshe anu kapese ka diampa ne mayi a kunua, too ne pangapingana katakata ku mvita eyi.

27Mika kumuandamuna ne:

— Wewe mupingane katakata, nanku meme tshiena muakule mu dina dia Maweja-Nangila to. Udi ne matshi a kumvua asangane kumvua anyi?

Badi bashipa mukalenga Akabe mu mvita(1 Bak 22.29-40)

28Akabe, mukalenga wa Izrayele, ne Yosafate, mukalenga wa Yuda, kuyabu kuluisha tshimenga tshia Ramote tshidi mu ditunga dia Ngilaade.

29Akabe, mukalenga wa Izrayele, kuambila Yosafate ne:

— Ndi musue kuya mu mvita mushindu udi bantu kabammanyi. Nanku nemvuale bilamba bia patupu bua ngenze bu muntu mukuabu. Kadi wewe Yosafate uvuale bilamba biebe bia bukalenga.

Nanku Akabe, mukalenga wa Izrayele, mumane kuvuala bilamba bia patupu, kuyabu mu mvita.

30Kadi, mukalenga wa bena Arame uvua mukandike bamfumu balombodi ba bena mvita bende, bavua ne matempu ende a mvita, bua kabaluishi bena mvita bakuabu, nansha balombodi ba bena mvita to. Uvua ubambila ne: muluishi wenu ke Akabe, mukalenga wa Izrayele.

31Nanku, bamfumu bavua ne matempu a mvita bamone Yosafate, kuambilanganabu ne: ke Akabe, mukalenga wa Izrayele ewu. Kumuelabu munkatshi bua kumuluisha. Kadi, Yosafate kulomba diambuluisha kudi Maweja-Nangila Mvidi Mukulu. Awu kumuambuluisha, kuipata baluishi bende.

32Nanku, pavua bendeshi ba matempu bajadike ne: muntu awu ki mmukalenga wa Izrayele nansha, kulekelabu kumulondakaja.

33Kadi muena mvita mukuabu wa bena Arame kuela mukete mu mpukapuka. Mukete awu kuasa Akabe, mukalenga wa Izrayele, kubuela mu mubidi pankatshi pa bitata bia kazaku kende ka mvita. Mukalenga Akabe kuambila muntu uvua wendesha ditempu diende dia mvita ne:

— Pingana panyima! Umuka nanyi mu mvita, tshiena mumvue bimpe to, mbantape mputa!

34Dituku adi, mvita ivua mipite bukole. Nanku, Akabe mukalenga wa Izrayele uvua ne bua kushala muaba awu, muimane mu ditempu diende dia mvita, mululamangane ne bena mvita ba bena Arame, kayi mua kumuka. Pambi diba kubuela, kufuaye!