Rute Diumvuija - MUKANDA WA MYIDI MUKULU（TSH96）

Diumvuija— Malu a Rute adi mukanda ewu utulondela, adi aleja tshikondu tshia Balombodi ba bisamba, badibu binyika kabidi ne: mBandumbulula, baludiki ba bena Izrayele. Kadi mukanda mene mbaufunde amu kunyima kua bidimu, katuyi nansha mua kujadika tshikondu tshivuabu baufunde.Kafundila ka mukanda, nkutulondela muvua mukaji wa tshisamba tshia bende, mubuele mu tshisamba tshia bantu ba Mvidi Mukulu. Bua nanku, mukanda udi utumanyisha mudi Rute, muena Mowabe, mukaji wa tshitembu, wa diyi dimpe, udi unanga diku dia ba bayende ne muoyi umue, witabe kabidi Mvidi Mukulu wa Izrayele muende muonsu. Bualu bua malu mempe adi Rute wenza, Mvidi Mukulu neamufute. Dikasa dibi, didi dikuate Rute ne mamuenende Nowemi mu ntuadijilu, ku kakese ku kakese nediandamuke, dienza diakalenga; bupele buabu nebuandamuke bubanji. Bualu ebu badi batulondelabu bimpe bitambe. Budi butuleja mukaji wa nsongu, wa disanka, udi unemeka bantu, kayi upungila, utekemena kudi Mvidi Mukulu.Kadi disanka didi dipite makuabu onsu ke diledibua dia muana wa Rute, bualu muana awu neikale kakuende wa mukalenga Davide. Ke mudi Rute, muena Mowabe, upeta dina munkatshi mua bankambua ba Davide, ne munkatshi mene mua bankambua ba Yezu (Mat 1.5).