1Muntu yonsu udibu bafuka kudi Mvidi Mukulu udi ne dikenga divule.
Mvidi Mukulu mmuimikile bantu bujitu buvule budibu bambula,
bituadije ku dituku divuabu babalele,
too ne ku dituku diapinganabu ku buloba.
2Tshidi tshibelesha meji ne tshibakuatshisha bowa ke
dituku dia lufu didi dibindile.
3Bituadije kudi mukalenga udi musombe mu nkuasa wa butumbi,
too ne ku muena dikenga udi musombe panshi mu butu,
4bituadija kudi mfumu udi muvuale tshinkutu tshikunze ne nsala wa lumu bia bumfumu,
too ne kudi muntu udi muvuale tshilamba tshikayabale tshia buanda bua mitshi,
5bonsu badi amu ne tshiji, lubabu,
tshimvundu, dipampaka, bowa bua lufu,
matandu ne njiya.
Padi muntu ulala butuku bua kuikisha,
udi umona ntatu ya mishindu ne mishindu ku tulu.
6Nansha padiye mulale,
udi ukenga ku tulu bu muntu udi ukenga mu munya,
udimona unyema bu muntu udi unyema mvita.
7Padibu basue kumukuata udi utabuluka,
ukema ne: mvua ntshina tshianana.
8Makenga aa adi akuata bia muoyi bionsu bidi Mvidi Mukulu mufuke,
bantu ne nyama,
— kadi neakuate benji ba malu mabi misangu muanda mutekete:
9lufu, kushipangana, matandu, mvita,
makenga, tshiyole, kabutu ne tshipupu.
10Makenga onsu aa, Mvidi Mukulu uvua muafuke
bua kukengesha benji ba bibi,
nansha mvula wa tshipupu, Maweja-Nangila uvua mumulokeshe,
bua bubi buabu.
11Tshionsu tshidi tshifuma ku buloba netshipingane ku buloba,
tshionsu tshidi tshifuma mu mayi netshipingane mu mayi manene.
Biuma bimpe ne biuma bibi12Bintu bia mabuejila
ne bintu bidi bipeta ku buenzayi, bionsu nebijimine,
kadi bidi bipeta ku buakane nebishale kashidi.
13Mpetu ya bantu babi, idi bu musulu udi uuma,
neibutuke bu dikubakuba dikole dia mvula
didi dituuta padi mvula uloka.
14Mabue adi atua tshianga bua dibutuka diabu,
nanku benji ba bibi nebajimine kashidi.
15Ndelanganyi ya bantu babi kayena ipita kutanta.
Bantu babi badi bu mutshi udi mumena pa lubuebue.
16Tshisosa tshia mukela tshidi tshimena ku muelelu wa mayi, nansha wa musulu onsu,
nebatshitule kabayi banji kutula bikuabu,
17kadi dipa dia kalolu didi bu lupangu ludi ne bintu bionsu.
Bidi muntu upa ne muoyi wa luse, Mvidi Mukulu neabivuluke.
Ditshina dia Mvidi Mukulu ke tshiuma tshidi tshipite bikuabu18Muntu udi ne kantu ku bianza, nansha muntu udi ukuata mudimu,
udi usomba ne disanka.
Kadi muntu udi wangula tshiuma tshia mushinga mukole udi mupite.
19Kulela bana ba bungi, kuasa tshimenga,
ke kushindika dina diebe panu kashidi,
kadi mukaji wa malu mimpe mmupite.
20Maluvu ne misambu bidi bisankisha muntu,
kadi kunanga meji, kudi kupita bionsu bulenga.
21Muadi wa lushiba ne lunzenze bidi bilengeja musambu,
kadi diyi dimpe didi ditambe bionsu busheme.
22Bulenga bua mubidi ne buimpe bua mpala bidi bisankisha mesu,
kadi bisosa bia mu mpata bidi bipite.
23Balunda badi bamonangana diba didibu basue,
kadi mukaji ne bayende mbapite abi.
24Bena muntu nansha bantu badi ne luse,
badi bambuluishangana diba dia dikenga,
kadi dipa dia pa luse ndipite abi.
25Mpawungi ne tshiamu tshitoke tshia mushinga mukole,
bidi bipesha muntu bukole,
kadi mubelu muimpe mmupite ebi.
26Biuma ne bukole bidi bipesha muntu dikima,
kadi kutshina Maweja-Nangila nkupite.
Bualu muntu udi utshina Maweja-Nangila kena ubula tshintu.
27Padi bantu batshina Maweja-Nangila,
badi bu badi mu lupangu ludi ne bintu bionsu.
Muntu udi utshina Maweja-Nangila udi ne lumu lupite lukuabu luonsu.
Muena lulombu28Muananyi, kuikadi muena lulombu.
Mbimpe kufua pa mutu pa kuikala muena lulombu!
29Muntu udi wela disu ku biakudia bia bende,
nsombelu wende kabena mua kumuamba ne: mmuimpe to.
Udi udia bintu bia bende,
udi udienzela bibi.
Kadi muntu mulonge kabidi mukolesha bimpe, kena nanku to.
30Tshintu tshilomba tshidi tshisheme, mukana mua muena lulombu,
kadi paditshi tshiya munda tshidi tshimosha bu kapia.
Who We AreWhat We EelieveWhat We Do
2025 by iamachristian.org,Inc All rights reserved.
