2 Samuwele 24 - MUKANDA WA MYIDI MUKULU（TSH96）

Davide udi ubadika bena Izrayele(1 Kul 21.1-6)

1Dituku dikuabu, Maweja-Nangila kufikila kabidi bena Izrayele munda. Kuenzejaye Davide bualu buvua ne bua kukebela bantu makenga, bualu Davide uvua mupete meji a kubadika bena Izrayele ne bena Yuda.

2Mukalenga Davide kuambila Yowabe, mfumu wa bena mvita bende bavua bamulame, ne:

— Endakana mu ditunga dijima dia bena Izrayele, kuinshi kua ditunga too ne ku mutu, bua babadike bantu. Ndi musue kumanya bungi bua bantu.

3Yowabe kuandamuna mukalenga ne:

— Mukalenga, meme ndi musue bua Maweja-Nangila Mvidi Mukulu webe avudije bena Izrayele misangu lukama. Ndi musue bua wikale ne muoyi, umone bionsu ebi. Kadi udi musue kuenza bualu bua mushindu ewu bua thinyi?

4Kadi bu muvua mukalenga Davide musuminyine bualu abu, Yowabe ne bamfumu balombodi ba bena mvita kuenza anu tshivua mukalenga muambe. Kumukabu ku nzubu kua mukalenga bua kuya kubadika bena Izrayele.

5Basabuka Yardene, kutuadijabu ne tshimenga tshia Aroyere, ne tshimenga tshivua muinshi mu tshibandabanda. Kutungunukabu bapitshila mu bena Ngade bua kuya ku Yazere.

6Kubuelabu mu buloba bua Ngilaade, baya mu ditunga dia bena Iti, mu Kadeshe, mu Daneyane, mu misoku ivua nabu mutumba, bua kufika ku Sidone.

7Kutungunukabu mu tshimenga tshia Tigre tshivuabu bakoleshe ne bimana, ne mu bimenga bionsu bivua bia bena Ivi, ne bena Kenaane, bua kufika ku Bersheba kuinshi mu ditunga, mu buloba bua bena Yuda.

8Bobu bamane kuendakana ditunga dijima mu ngondu tshitema ne matuku makumi abidi, kupinganabu mu Yerushalayime.

9Yowabe kuambila mukalenga Davide bungi bua bantu bonsu bavuabu babadike. Bena Izrayele bavua ne bena mvita 800.000 batshivua ne bukole bua kuluangana. Bena Yuda bavua ne bena mvita 500.000.

Mvidi Mukulu udi unyoka Davide(1 Kul 21.7-17)

10Diakamue Davide kudiunwua ne: ndi muenze bibi pandi mubadike bantu ba bena Izrayele. Kuambilaye Maweja-Nangila ne:

— Pandi mubadike bena Izrayele, ndi muenze bibi bitambe. Ndi ntonda ne: ndi muenze bualu ebu amu bu muntu udi kayi ne lungenyi! Maweja-Nangila umfuileku luse bua bubi buanyi.

11-12Ke Maweja-Nangila kuambila muambi Ngade, mufidi wa ngenyi wa mukalenga Davide, ne:

— Uye kudi Davide, umuambile ne: “Maweja-Nangila udi wamba ne: Ndi nkufundila manyoka asatu. Usungule diudi musue.”

Butshia dinda, Davide ubika,

13muambi Ngade kuya ku nzubu kua Davide, umuambila bionsu bivua Mvidi mukulu muambe. Pashishe muambi kukonka Davide ne:

— Usungule dinyoka diudi musue. Udi musue ditunga diebe dishale ne tshiyole tshia nzala bidimu muanda mutekete anyi? Udi musue kunyema baluishi, bobu benda amu bakulondakaja, ngondu isatu, anyi? Udi musue tshipupu tshia disama tshikengesha bena ditunga diebe, matuku asatu? Ela meji bimpe, ungandamune tshindi mua kuya kuambila udi muntume.

14Davide kuandamuna ne:

— Ndi munkatshi mua dikenga dikole…Kadi, ndi musue kushala anu mu bianza bia Maweja-Nangila pa mutu pa kuikala mu bianza bia bantu. Bualu Maweja-Nangila udi ne luse.

15Nanku Maweja-Nangila kutumina bena Izrayele tshipupu tshia disama biangatshile dinda adi too matuku asatu. Mu ditunga adi dijima, bantu bavua bafue binunu makumi muanda mutekete.

16Mutumibue wa Maweja-Nangila kuolola tshianza mu tshimenga tshia Yerushalayime bua kutumamu tshipupu. Kadi Maweja-Nangila kubenga. Kuambilaye mutumibue uvua ubutula bantu ne:

— Kuajiki, puekesha tshianza! Diba adi, mutumibue wa Maweja-Nangila uvua pabuipi ne muaba uvua Aravna, muena Yebusa, ushipula ntete ya kuenza bukula.

17Davide mumane kumona mutumibue uvua ubutula bena Izrayele, kuambilaye Maweja-Nangila ne:

— Meme ndi muena tshibawu. Meme ndi muenze bibi. Kadi bantu aba kabena benza bualu bubi to. Nanku mbimpe unyoke meme, ne bena nzubu wanyi.

Davide udi washila Maweja-Nangila tshilambuilu(1 Kul 21.18-26)

18Anu dituku adi, muambi Ngade kuya kudi Davide, umuambila ne:

— Uye muaba udi Aravna ushipula ntete ya kuenza bukula, washilapu Maweja-Nangila tshilambuilu.

19Davide kuya muaba awu, bu muvua Maweja-Nangila mumutumine diyi kudi muambi Ngade.

20Pavua Aravna kulu aku, kumonaye mukalenga Davide ulua kudiye ne balombodi ba mu bukalenga buende, kusemenaye kudibu, kutua mpala panshi kumpala kua mukalenga Davide,

21umukonka ne:

— Mukalenga udi mufike ku nzubu kuanyi bua tshinyi?

Davide kuandamuna ne:

— Ndi musue kusumba muaba ewu. Ndi musue kuashilapu Maweja-Nangila tshilambuilu bua kujikija tshipupu tshia disama didi dikengesha bena Izrayele.

22Aravna kuandamuna ne:

— Mukalenga wanyi, angata bintu bionsu biudi musue, ulambule Mvidi Mukulu mulambu. Angata yanyi ngombe ya mulambu, nyoyi eyi. Wangate kabidi matempu ne bintu bia kushipula nabi bua wewe kutemesha nabi kapia.

23Ndi nkupesha bintu bionsu ebi. Nanku mukalenga, ndi mutekemene ne: Maweja-Nangila Mvidi Mukulu webe neakufuile luse, neanyishe mulambu webe.

24Kadi mukalenga Davide kumuambila ne:

— Kumpeshi tshianana to. Ndi musue kubisumba. Ndi nkufuta. Tshiena musue kulambula Maweja-Nangila Mvidi Mukulu wanyi milambu idibu bampesha tshianana to!

Davide kumufuta nkanu mitoke ya mushinga mukole makumi atanu bua kusumba muaba wa tshishipuidi tshia ntete ya kuenza bukula, ne ngombe.

25Davide kuasa tshilambuilu muaba awu. Kulambulaye Maweja-Nangila milambu ya kuosha ne ya bobumue. Nanku, Maweja-Nangila kufuila bena ditunga luse. Tshipupu tshia disama tshivua tshibakengesha kujikatshi.