Sira 24 - MUKANDA WA MYIDI MUKULU（TSH96）

TSHITUPA TSHISATUBuneme bua Meji

1Meji adi aditua mena.

Munkatshi mua bena Izrayele bantu bende,

adi aditua makumbu.

2Adi akula munkatshi mua diku dia bantu ba Muena Kulu.

Adi aditemba kumpala kua bantu ba Maweja-Nangila.

3Adi amba ne: “Ndi mupatuke mukana mua Muena Kulu;

meme kubuikila buloba bu mudi dibungi.

4Mvua musombe mulu muamua,

mushikame mu divuba dia mulu.

5Meme kuendakana nkayanyi mulu muamua muonsu,

meme kuenda ne mu mayi manene malabale.

6Bumfumu buanyi buvua bumuangalake mu bisamba bionsu,

ne mu matunga onsu, pa mavuala a mayi manene ne pa buloba bujima.

7Meme kukeba pa kuikishila mu bintu ebi bionsu,

kadi muaba kaayi umvua mua kushindamena?

8Nenku Mufuki wa bintu bionsu, uvua mumfuke,

kungambilaye ne: ‘Asa nzubu webe mu ndelanganyi ya Yakobe.

Udie bumpianyi mu Izrayele.’

9Wakamfuka ku tshibangidilu

kayi muanji kufuka tshintu nansha tshimue,

nenshale ne muoyi tshiendelele.

10Meme ke uvua ukuatshila Mvidi Mukulu Muena Kulu mudimu,

mu ntenta wende wa tshijila,

pashishe meme kuasa pa mukuna wa Siyone.

11Ke Maweja-Nangila kunsombesha mu Yerushalayime,

tshimenga tshindi mupite kunanga.

Meme kushala mukalenga.

12Meme kushindama mu thisamba tshidi ne butumbi,

tshidi Maweja-Nangila musungule bu tshiende yeye.

13Meme kudiundilamu bu mutshi wa sedre wa mu Lebanone,

bu mutshi wa siprese pa mukuna wa Ermone,

14meme kudiunda bu mutshi wa dibue wa mu Engedi,

nansha bu mitshi ya rose ya mu tshimenga tshia Yeriko,

bu mutshi wa olive mu mpata,

meme kulepa amu bu mutshi wa platane.

15Meme kutuma mupuya bu manananshi a mishindu yonsu,

kabidi bu mire muimpe ne ngalbanume,

bu onikse ne storakse,

bu dibungi dia muinshi wa kamonya,

munda mua ntenta wa tshijila.

16Meme kuolola maboku bu matamba a mutshi wa lusanga,

matamba anyi adi a lumu ne butumbi.

17Meme kupatula ntonga mimpe bu mutshi wa nwinyo.

Bilongu bianyi kupatula bimuma bia mushinga mukole kabidi bia bungi.

19Vuayi kundi meme, nuenu badi banjinga,

diayi bimuma bianyi bindi munupe nuukute.

20Udi mumvuluke udi ne busheme bupite buitshi,

udi nanyi udi ne disanka dipite bunene.

21Bantu badi bandabula badi kabidi ne nzala,

badi bannua nebikale kabidi ne nyota.

22Kadi muntu udi unteleja kakufua bundu,

muntu udi ukuata nanyi mudimu kena mua kuenza bualu bubi to.”

Meji ne mikenji ya Mvidi Mukulu

23Bionsu bidibu babala ebi,

ke bidi mu mukanda wa ndondu,

udi ututuangaja ne Mvidi Mukulu Muena Kulu;

ke mikenji ivua Moshe mutuelele,

ke bumpianyi bua ndelanganyi ya Yakobe

mu meku abu.

25Mikenji eyi idi miuwule ne meji tente,

bu mudi musulu wa Pishone nansha wa Tigre miuwule mu tshikondu tshia mvula.

26Mikenji eyi idi itangalaja lungenyi

bu mudi musulu wa Perate muuwule, upasalaja mayi,

nansha bu mudi musulu wa Yardene mu tshikondu tshia kunowa.

27Mikenji eyi idi ilongesha malu mapite bungi,

bu mudi musulu wa Nile uwula,

nansha bu mudi musulu wa Ngikone

mu tshikondu tshidibu batula tumuma tua nwinyo.

28Ku muntu wa kumpala too ne wa ndekelu wa bantu badi babala mikenji,

muntu nansha umue wa kudibu kena muanji kuyimanya mujikije,

nansha mujandule buneme bonsu bua meji ayi.

29Meji adi ne lungenyi lutampakana lupite lua mayi manene,

mibelu yawu idi miondoke mipite mayi manene.

30Kadi meme ndi tshiina tshidi mayi a musulu abuela,

bu mukidi udi ufila mayi a musulu mu lupangu.

31Meme kuamba ne: “Ndi nya kumiamina mayi mu lupangu luanyi,

ndi nya kuela mayi mu budimi buanyi.”

Kadi tangilayi tshiina tshianyi atshi,

kuandamukatshi musulu wa mayi,

musulu awu kushala mayi manene.

32Ndi musue kunulongesha patoke bindi mulonge,

bua bitokeshe miaba yonsu bu mudi diba dienza.

33Nentangalaje dilongesha bu mudi muambi wa Mvidi Mukulu wenza,

nendifikishe kudi ndelanganyi idi itulonda.

34Manyayi ne: nansha meme mutata,

tshiena mukuate mudimu amu bualu buanyi meme nkayanyi,

kadi ne bua bantu bonsu badi bakeba meji.