Sira 41 - MUKANDA WA MYIDI MUKULU（TSH96）

Lufu

1Wewe lufu, muntu udi ukuvuluka udi umvua dikenga,

padiye musombe talalaa, usanka ne bidiye nabi, kayi ne lutatu,

upeta dikasa dimpe mu midimu yende, mutshikale ne bukole bua kusanka!

2Wewe lufu, mukenji webe badi mua kuwanyisha kudi muntu udi mu dikenga,

katshiyi ne bukole, mumane kulala panu matuku mavule,

udiabakena diba dionsu, mubinduluke, katshiyi ne lutulu!

3Kadi wewe, kutshinyi padi lufu lukukuata.

Vuluka badi bamane kufu kumpala kuebe ne badi bakulonda.

4Maweja-Nangila mmufundile bifukibua bionsu lufu,

udi ubenga tshidi Mvidi Mukulu Muena Kulu musue bua tshinyi?

Nansha wewe mulale bidimu dikumi, lukama nansha tshinunu,

wewe mumane kufika ku bafue, kakuena muntu udi ukuasa tshilumbu tshia bidimu abi to.

Dinyoka dia bantu babi(Tun. 5-7: 23.24-25)

5Bana ba benji ba bibi, nebikale bana babi,

badi baya diba dionsu ku nzubu ya bantu babi.

6Bintu bidi bana ba benji ba bibi bapiana, nebibutuke,

nebadiwule ndelanganyi yabu kashidi.

7Tatu udi wenza malu mabi nebamudiwule kudi bana bende,

bualu udi ubakebela diakabi.

8Nuenu badi babenga Mvidi Mukulu Muena Kulu ne mikenji yende,

nudi bena diakabi!

9Mbanulele anu bua diakabi,

kabidi panudi nufua nudi nupeta amu diakabi.

10Tshionsu tshidi tshifuma munda mua buloba netshipingane anu munda muabu.

Ke mudi bantu babi badi babenga Mvidi Mukulu,

mbamane kubatshipa, nebabutuke.

Bena lumu luimpe(Nsum 10.7; Mb 7.1; Sir 44.14)

11Mubidi wa muntu kawena ne mushinga to,

kadi lumu lua muntu udi ulamata Mvidi Mukulu badi amu baluvuluka.

12Sumpakana bua lumu luebe, bualu nelushale musangu mule,

kupita mabulu a mpawungi tshinunu.

13Matuku adi muntu usanka panu, adi makese,

kadi lumu luimpe lua muntu ludi lushala kashidi.

Bundu buimpe ne bundu bubi(41.16—42.1; 4.20-21)

14Bana banyi, kumbajayi bindi nnulongesha, nenusombe talalaa.

Muntu udi usokoka bantu ende meji, nansha udi usokoka tshiuma tshia mushinga mukole,

bia nanku bidi biambuluisha ku tshinyi?

Bubidi buabi budi tshianana.

15Muntu udi usokoka bupote buende,

udi ne mushinga mupite wa muntu udi usokoka meji ende.

16Ndi musue kukuambila malu audi mua kumvua bundu ku mesu kua banga bantu.

Kuena ne bua kumvua bundu bua malu onsu to,

kabidi bundu kabuena mushindu umue nansha.

17Ikala ne bundu bua kuikala ne buenzayi kumpala kua tatu ne kua mamu,

kabidi ne kumpala kua bamfumu betu, utshina mua kubashima.

18Umvua bundu kumpala kua bakoshi ba nsambu, kuenji tshilema.

Umvua bundu kumpala kua bena tshipangu tshia balamatshi ba Mvidi Mukulu,

ulonde mikenji ya Muena Kulu.

Umvua bundu kumpala kua mulunda webe ne muena mulongu nebe,

diba diuvua mubenzele bibi.

19Umvua bundu bua kuiba ku mesu kua bena mutumba nebe;

umvua bundu bua kuvila bulelela bua Mvidi Mukulu nansha bua kuupula ndondu uudi mutue nende.

Umvua bundu bua kudia mutue nkengibua pa mesa.

Umvua bundu bua kupala bantu tshintu tshidibu bakulomba.

20Umvua bundu bua kushala mupuwe padi bantu bakuela muoyi,

nansha bua kulengamina mukaji muena tshiendenda.

21Umvua bundu bua kuipata mukuenu,

nansha kunyenga tshintu tshiende.

Umvua bundu bua kutangila mukaji wa bende.

22Kuena mua kuibidijangana ne mukaji muena mudimu webe to,

kusemenyi ku bulalu buende nansha.

Umvua bundu bua kupenda balunda bebe.

Nansha bua kubapepeja bua biuvua mubapeshe.