Yudite 13 - MUKANDA WA MYIDI MUKULU（TSH96）

Yudite udi ukosa Oloferne mutu

1Mutantshi mumane kunenga bikole, bena mudimu ba Oloferne kusumpakana bua kuya. Bagoyase kuinjidila Oloferne ne Yudite ntenta a pambelu. Kutangalajaye bantu. Bonsu kuya kulaba bapungile bualu bavua banua maluvu bapitshishe.

2Yudite uvua mushale nkayende mu ntenta. Oloferne uvua muboyoyoke pa bulalu buende, bualu uvua mukuatshike nwinyo bikole.

3Yudite kuambila mukaji muena mudimu wende ne: upatuke mu tshibambalu tshia kulala. Wimana pambelu, ungindile bua mpatuke mu mutanda. Uvua wenza nanku misangu yonsu. Uvua musue kuya kutendelela. Ke musuaye muambile Bagoyase.

4Bantu bonsu kumuka, muntu nansha umue wa kudibu kavua mushale mu tshibambalu tshia kulala nansha. Kushalaku amu Yudite muimane pepi ne bulalu bua Oloferne. Yudite kutendelela Mvidi Mukulu mundamunda ne: “Maweja-Nangila Mvidi Mukulu wa bukole buonsu. Tangila mpindiewu midimu ya ku bianza bianyi indi nkumbaja bua lumu lua Yerushalayime.

5Diba diakumbanyi dia wewe kupandisha bantu bebe, paudi ungambuluisha bua meme kukumbaja bindi muele meji, bua meme kushipa baluishi betu.”

6Kusemenaye ku mutu kua bulalu pamue ne Oloferne. Kupatulaye muele wa Oloferne uvuaku,

7kusemena kabidi ku bulalu, kukuataye Oloferne ku nsuki ya ku mutu wamba ne: “Maweja-Nangila, Mvidi Mukulu wa Izrayele, umpeshe bukole pa diba edi.”

8Kutapaye Oloferne ne bukole buonsu ku nshingu ne muele misangu ibidi, kumututa mutu.

9Pashishe kumushaye tshitalu pa bulalu, kutshiela panshi, kabidi kumushaye tshilamba tshia kudijika tumue ku makunji. Kupatukaye lukasa ne mutu wa Oloferne, kuupesha mukaji muena mudimu wende.

10Awu kuuteka mu tshisaka tshia biakudia. Kupatukabu bonsu babidi amu bu muvuabu ne tshibidilu tshia kuya kutendelela. Bobu bamana kukosolola mu mitanda, kunyungulukilabu lubuwa. Kubandabu mukuna wa tshimenga tshia Betuliye, bua kufikabu ku biibi bia tshimenga.

Yudite udi ubuela mu Betuliye

11Yudite kuelelaye balami ba biibi bia tshimenga diyi dikole pa bule, wamba ne:

— Unzululayi! Unzululayi tshiibi lukasa, Mvidi Mukulu, Mvidi Mukulu wetu udi netu, udi uleja bena Izrayele bukole buende, udi kabidi uleja baluishi betu dikanda diende. Ke tshidiye muenze lelu ewu.

12Bantu ba mu tshimenga pumvubu diyi diende, kuyabu lukasa ku tshiibi. Kubikilabu bakulu ba mu tshimenga.

13Ke bantu kutantshila kuvuaye, bana ne bakole, kabatshivua batekemena bua difika diende to. Ke kunzululabu biibi, kubakidilabu. Kutemeshabu kapia bua kumonanganabu bimpe, ke kubanyungulukilabu.

14Yudite kubambila ne diyi dikole ne:

— Tumbishayi Mvidi Mukulu! Numutumbishe! Tumbishayi Mvidi Mukulu bua padiye kayi mumbushe luse luende kudi bena Izrayele. Mvidi Mukulu uvua mungambuluishe, ndi mushipe baluishi betu butuku ebu.

15Pashishe kupatulaye mutu wa muntu mu tshisaka, kubalejawu, ubambila ne:

— Monayi mutu wa Oloferne, mulombodi wa bena myita udi utangila bakuabu, udi kabidi mfumu wa tshiluilu tshia bena Ashure. Tangilayi tshilamba tshia kudijika tumue tshivuaye udijika pavuaye mukuatshika maluvu bikole.

16Bushuwa, bu mudi Maweja-Nangila ne muoyi, yeye uvua mundame ne mundi mukuate mudimu wanyi, jojayi bivua bienzeka, bulenga bua mpala wanyi buvua bulenduishe Oloferne, bumufikishishe ne ku lufu kayi muenza nanyi bubi nansha bumue, budi mua kumpisha mikiya ne kumfuisha bundu.

17Bantu bonsu kukema bikole. Kuinyikabu mitu panshi banemeka Mvidi Mukulu, bamba bonsu musangu umue ne: “Mvidi Mukulu wetu, tudi tukutumbisha, bualu udi munyangakajile bantu bebe baluishi babu.”

18Oziyase kuambila Yudite ne:

— Muananyi wa bakaji, Mvidi Mukulu Muena Kulu akuele lupemba bipite bakaji ba pa buloba bonsu. Maweja-Nangila udi mufuke diulu ne buloba. Amu yeye ke uvua mukulombole bua wewe kukosa mutu wa mfumu wa baluishi betu.

19Bantu kabena mua kupua muoyi muudi muenze emu to. Nebavuluke mudimu mukole wa Mvidi Mukulu.

20Amu Mvidi Mukulu mene akupe lumu lunene kashidi. Akuvudijile bintu bualu uvua musue kudiela mu njiwu ya lufu, diba divuabu baluishe tshisamba tshietu bundu. Udi mutumbushile dibutuka wewe ne buakane bua Mvidi Mukulu wetu.

Bantu bonsu kuandamuna ne:

— Amene! Mmomu!