Tobite 1 - MUKANDA WA MYIDI MUKULU（TSH96）

1Telejayi malu a Tobite, muana wa Tobiyele, kabidi ne muikulu wa Ananiyele. Yeye ewu uvua wa Aduyele, kabidi muikulu wa Ngabayele. Bonsu mba mu tshiota tshia Asiyele, mu tshisamba tshia Naftali.

2Tobite uvua musombe mu ditunga dia Naftali, mu Ngalileya wa ku mutu, mu tshimenga tshia Tisbe, pankatshi pa Kadeshe, luseke lua ku mutu kua ditunga, pabuipi ne Asore luseke ludi diba dibuelela pamue ne Fogore kuinshi kua ditunga. Ke muaba uvuabu bakuatshile Tobite mu bupika baye nende mu Ashure, mu matuku avua Shalmanasare muikale mukalenga wa ditunga adi.Tobite udi uvuluka mikenji ya Mvidi Mukulu

3Meme Tobite, mvua munange njila wa buakane. Mvua nkuata midimu miakane ne muoyi wanyi mujima. Mvua muambuluishe bena tshisamba tshianyi ne makuta, kabidi ne bonsu bavuabu bakuata mu bupika pamue nanyi, batuma mu tshimenga tshia Ninive mu ditunga dia Ashure.

4Pantshivua muana muetu mu Izrayele, nkambua wanyi pamue ne tshisamba tshijima tshia Naftali, bavua bamane kupula ndondu ne bena diku dia bukalenga bua Davide kabidi ne bena Yerushalayime. Kadi tshimenga atshi ke tshivua Mvidi Mukulu nkayende musungule mu Izrayele, bua bisamba bionsu bilambuilamu milambu. Ke muaba uvuabu basa nzubu wa Mvidi Mukulu, bamujidila, bua bonsu balonda panyima bikale batendelelamu.

5Pa mikuna yonsu ya mu ditunga dia Ngalileya, bena diku dianyi, kabidi ne bena tshisamba tshijima tshia Naftali, pamue ne nkambua wanyi, bavua balambula kana ka ngombe ka mpawungi milambu, kavua Yerobowame, mukalenga wa bena Izrayele muenze mu tshimenga tshia Dane.

6Misangu mivule m vua nya nkayanyi ku Yerushalayime mu matuku a bibilu, bilondeshile mikenji ivua Moshe mumane kuelela bena Izrayele bonsu bua kashidi. Mvua nya ku Yerushalayime muambule bianyi bia tshianyi, bia pa madimi ne muoyi wanyi mujima, bana batekete ba bimuna bianyi, tshia dikumi tshia ngombe yanyi ne miosa ya kumpala imvua mukose mikoku yanyi.

7Mvua mbipesha batuangaji, ba ndelanganyi ya Arone, bua kubilambulabu Mvidi Mukulu. Mvua mfila tshia dikumi tshia ntete ya kuenza bukula, tshia maluvu a nwinyo, tshia mafuta a olive, tshia bimuma bia ngrenade ne bia mfiku ne tshia bimuma bikuabu, bua babipeshe bena Levi bavua bakuata mudimu mu Yerushalayime. Mvua ngumusha ku bintu bianyi tshia dikumi tshibidi bidimu bisambombu ku muanda mutekete, bua kutshifila, batshitule ku Yerushalayime ku tshidimu ku tshidimu.

8Pashishe tshia dikumi tshianyi tshisatu, mvua mutshipeshe bana ba nshiya, bakaji bakamba ne benyi bavua bitabe dilongesha dia bena Izrayele. Kunyima kua bidimu bisatu, mvua mbatuadila tshia dikumi tshisatu atshi, bua kudiila pamue, bilondeshile muvua Moshe mutuelele mukenji, kabidi ne muvua Debora, kaku wanyi mukaji muledi wa tatu wanyi mundongeshe. Buala tatu wanyi Ananiyele, uvua mumane kufua meme mushala muana nshiya.

9Meme kukola, kusela mukaji wa tshisamba tshietu. Tuetu kulela nende muana wa balume. Meme kumuinyika dina ne: Tobiyase.

10Matuku mavule mamane kupita, musangu uvuabu bankuate mu bupika baye nanyi mu Ashure, mvua mulue bua kusomba mu Ninive. Mu tshimenga etshi, bana betu ne bena kuetu batuvua nabu, bavua badia biakudia bivua bantu ba bisamba bikuabu bonsu badia.

11Kadi meme tshivua mbidia to.

12Mvua amu mulamate Mvidi Mukulu wanyi ne muoyi wanyi mujima,

13ke pavua Muena Kulu munganyishisha kudi mukalenga Salmanasare, mukalenga ewu, kumpesha mudimu wa meme kumusumbila bionsu bivuaye nabi bualu.

14Too ne mudiye mufike ku lufu, mvua amu nya ku ditunga dia Madayi bua kumusumbila bivuaye ukengela. Mu ditunga edi, dituku dikuabu, mvua muteke bibuta kua Ngabayele, muanabu ne Ngabri, munda muabi muvua kilo ya tshiamu tshitoke tshia mushinga mukole nkama isatu.

15Padi Salmanasare ufua, muanende Senakeribe udi umupingana mu bumfumu. Kadi njila ya ku Madayi kayivua mu ditalala, nanku tshivua mupepeja kabidi mua kuya ku ditunga adi.

16Mu matuku avua Salmanasare mu bumfumu, mvua mpesha bena kuetu bintu bia luse bivule.

17Bantu bavua ne nzala mvua mbapa tshiakudia. Bantu bavua butaka mvua mbapa bia kuvuala. Pamvua mmona tshitalu tshia muena kuetu tshimansha dinsambu dia bimana bia tshimenga tshia Ninive, mvua ntshijika mu lukita.

18Mvua mujike kabidi bantu bonsu bavua Senakeribe mushipe tshikondu tshivuaye utumina ku ditunga dia Yudeya, divuabu bamane kumutshimuna. Kupendaye Maweja-Nangila, bualu Mvidi Mukulu uvua mumunyoke mumumuangesha lukasa mu ditunga edi. Nenku diba divua Senakeribe ufumina ku Ninive, uvua mufike munda bikole, kushipaye bena Izrayele bavule. Ke pamvua ngangata bitalu biabu mu musokoku bua kubijika. Nenku, mukalenga uvua ubikebakeba, kavua ubimona kabidi to.

19Muena Ninive kampanda, kumanyisha mukalenga mumvua meme njika bitalu abi, ke meme kuanji kusokoma. Kadi pamvua mujingulule ne: mukalenga mmujadike bimvua ngenza, kabidi bantu badi bankeba amu kunkeba bua kunshipa, buowa kunkuata, meme kunyema.

20Kunyengabu biuma bianyi, kubipesha mukalenga. Mvua mushale amu ne mukajanyi Ana ne muananyi Tobiyase.

21Matuku kaayi makumbane makumi anayi, kushipabu mukalenga kudi bana bende ba balume babidi. Bana abu, kunyemenabu ku mikuna ya Ararate. Muanende wa balume mukuabu Asaradone kupingana mu bukalenga. Muana ewu kuteka Akikare muana wa muanetu Ananiyele bua alombole midimu yonsu ya mu bukalenga buende kabidi atangile malu a biuma.

22Musangu ewu, Akikare kundombela, meme kupingana tshiakabidi mu tshimenga tshia Ninive. Mu matuku avua Senakeribe muikale mu bukalenga bua Ashure, ke avua Akikare mutangidi munene wa bantu bavua belela mukalenga maluvu ku mesa, kabidi uvua mulami wa tshitampi tshia malu a bukalenga. Uvua kabidi mfumu uvua ulombola midimu ya ditunga ne malu a biuma mu Ashure. Amu Asaradone ke uvua mumujadike mu midimu yende. Kabidi Akikare uvua muena diku dianyi, uvua muana wa muanetu menemene.