Filipe Diumvuija - MUKANDA WA MYIDI MUKULU（TSH96）

Diumvuija— Tshimenga tshia Filipe ke muaba wa kumpala wa mu Mputu uvua Polu mulongeshe Lumu lua Disanka lua Yezu Kristu. Tshimenga etshi tshivua mu buloba bua Masedoniya buvua kabidi ku bumfumu bua bena Rome. Buvua ku mutu kua ditunga dia bena Ngreke, luseke ludi diba dipatukila. Polu uvua muase Tshisumbu tshia bena ditaba mu tshimenga etshi, pavuaye mu luendu luende luibidi (MM 16.12-40). Bidimu bimane kupita, kukuatabu Polu mu lukanu, kadi ki mbajadike muaba uvuabu bamulamina nansha. Bamue badi bamba ne: mu Efeze; bakuabu ne: mu Kezareya, nansha mu Rome mene (Fil 1.7). Polu muikale mu lukanu nanku, kutuminaye bena Filipe mukanda ewu muwule ne miaku ya dinanga tente. Uvua musue kubela tuasakidila bua bionsu bivuabu bamutumine kudi Epafrodite, diba divuaye mu dikenga. Uvua mujinge kabidi kubakolesha ku muoyi, bua bitabe amu Kristu, kabayi banyisha malongesha a dishima avua atuadija kubuela mu Tshisumbu tshiabu.Mu ntuadijilu wa mukanda (1.1-11), Polu udi uleja disanka didiye nadi, padiye uvuluka bena Kristu ba mu Filipe. Udi ubela kabidi tuasakidila, ubafundila mudiye muladile. Kavua mumanye tshivua bamfumu mua kumuenzela nansha. Kadi udi uleja mudiye kayi utshina bualu nansha bumue, bua padiye mudisange ne Kristu (1.12-26). Udi ulomba bena Filipe bua bananukile mu ditaba, benze tshintu tshimue munkatshi muabu, balejangane muoyi wa bupuekele, bakuatshile bakuabu mudimu, amu muvua Yezu mubaleje njila wa kulonda (1.27—2.18). Polu udi ne dijinga dia kumonangana nabu, kadi Epafrodite, uvua bena Filipe batumine Polu, ne Timote, udi Polu utumina bena Filipe, nebanji kukolesha diumvuangana munkatshi mua Polu ne Tshisumbu tshia bena ditaba tshia mu Filipe (2.19-30).Pashishe Polu udi udimuja bena ditaba abu, bua bepele bantu badi balongesha dilongesha dia dishima. Udi ulomba bena Filipe bua balonde dikasa diende, bakebe tshidi bena Kristu bonsu ne bua kuipatshila: kudienza mufuanangane ne Kristu (tshit. 3). Udi ujikija mukanda wende ne miaku ya dibakolesha mu maboku, ya dibela tuasakidila, ne ya dibasekelela (tshit. 4).Batu binyika mukanda ewu ne: “Mukanda wa disanka,” bualu mukanda mujima udi uleja amu disanka divua Polu nadi. Bantu badi basanka nanku, ke badi bitaba Kristu muabu muonsu. Bivua Kristu muenze, ke bidibu bumvuije mu tshikosu mu musambu udi mu 2.6-11. Wewe, muena Kristu wa lelu, neupete pebe disanka edi munda muebe anyi?