Musambu muimpe Mutambe 1 - MUKANDA WA MYIDI MUKULU（TSH96）

1Ku misambu yonsu idi Shelomu mufunde, ewu udi muimpe mupite mikuabu.

Mukaji ne mulume.

Diyuki dia badi banangangana

(Mukaji)

2Ungupukile,

ungele mu tshitupa!

Dinanga diebe didi dinsankisha

dipite mvinyo,

3dipite mafuta ebe a mupuya muimpe.

Wewe udi ulobesha bakaji,

bu manananshi adi anunka dipembu dimpe.

Ke mudi nsongakaji yonsu ikunangila!

4Unkuate ku tshianza, tuye nebe lukasa.

Mukalenga wanyi,

umbueje mu tshibambalu tshiebe,

tusanke bubidi buetu.

Tusangale, bualu dinnanga diebe

ndisheme dipite maluvu.

Ke padi nsongakaji yonsu ikunanga.

5Nsongakaji ya mu Yerushalayime,

meme ndi mufiike,

kadi ndi muimpe,

mudi nzubu ya ntenta

ya bantu badi mu tshipela,

mudi bilamba bilembeleja

mu nzubu wa mukalenga Shelomu.

6Kanukemi bua bufiike buanyi,

bualu munya mmumfiikishe nenku.

Bana betu ba balume

mbangumvuile lukinu,

mbanteke bua kubalamina madimi a mvinyo.

Kadi buanyi budimi bua mvinyo,

tshivua ne mushindu wa kubulama nansha.

7Wewe undi munange, ungambile

muaba uudi udishila mikoku yebe,

uudi uyiteka bua kuikishayi munda munya,

bua tshipambuku,

tshikukebi muaba udi balunda bebe

badishila mikoku yabu.

(Balami ba mikoku)

8Wewe Ntamba bakaji,

pawikala kuyi mumanye muaba udiye,

tangila miaba ivua mikoku yende

ipitshila, uyilonde.

Shiya mbuji yebe

pabuipi ne nzubu ya balami ba mikoku.

(Mulume)

9Munanga wanyi,

ndi nkufuanyikija ne

nyama muimpe wa kabalu mukaji,

udi ukoka ditempu dia lumu

dia mukalenga wa bena Ejipitu.

10Tukanu mudi muele ku matshi

ntulengeje matama ebe.

Mabue a busanga

mmalengeje nshingu webe.

(Balami ba mikoku)

11Netukuenzele tukanu tua ku matshi

tua tshiamu tshia mpawungi,

tulamakaja ne tulengejilu

tua tshiamu tshitoke tshia mushinga mukole. 1

(Mukaji)

12Patshidi mukalenga wanyi

ulala pabuipi nanyi pa bulalu,

manananshi anyi adi atuma dipembu diawu.

13Munanga wanyi udi bu kabuki ka manananshi,

kateka mu mabele anyi.

14Udi bu tshisumbu tshia bilongu

mu madimi a mvinyo a ku mpokolu wa Ene-Ngedi.(Mutume)

15Mulunda wanyi munanga,

udi muimpe mutambe,

udi mulengele be.

Mesu ebe adi aleja dinanga,

bu dia nyunyi wa nkudimba.

(Mukaji)

16Munanga wanyi, wewe kabidi

udi muimpe be, muimpe wa dikema!

Bulalu buetu mbua mashinde mabishi.

17Makunji a nzubu wetu

ke mitshi ya sedre;

mikamba ya ku tshimana,

ke mitshi ya siprese.