1 Samuwele Diumvuija - MUKANDA WA MYIDI MUKULU（TSH96）

Diumvuija— Muambi Samuwele, muena dina dia mukanda ewu ne dia mukanda udi ulonda, udi wa ndekelu wa ku “Balombodi ba ditunga,” bilobu bivua Mvidi Mukulu musunguile bantu bende, bua babasungidile mu bikondu bia ndululu. Matuku avua ditunga kadiyi dianji kupeta bulongolodi buimpe, Samuwele uvua wenza midimu ibidi: wa bulongolodi bua ditunga ne wa bulongolodi bua malu a Mvidi Mukulu (tshit. 1 too ne ku tshit. 7). Bena Izrayele kabavua basanka bua pavua “Balombodi ba ditunga” bakuata mudimu amu mu mpukapuka diba dia bualu kampande. Bavua bajinga mua kupeta mukalenga wa ditunga dijima. Nansha Samuwele kayi muanyishe menemene meji aa, Mvidi Mukulu udi umuamba bua itabe bidi bantu balomba. Ke mudiye uteka Shawule bu mukalenga wa kumpala (tshit. 8 too ne ku tshit. 10). Kadi matuku makese apita, Shawule kutuadija bidi Mvidi Mukulu kayi musue. Nanku Mvidi Mukulu kulekela kumuambuluisha (tshit. 11 too ne ku tshit. 15). Diba adi, Mvidi Mukulu kusungula nsongalume, Davide, uvuile kupingana pashishe Shawule mu bukalenga. Ke Davide kubuela ku mudimu mu lubanza lua Shawule, kuibidijangana ne malu a mu bukalenga. Kadi padi Shawule ukeba kumushipa, Davide kunyema. Mu tshit. 16 too ne ku tshit. 30, badi batuleja mudi Shawule wenda ufuba ku kakese ku kakese, Davide pende wenda upeta bukole bua bungi. Tshitupa tshia ndekelu tshia mukanda (31) tshidi tshitulondela lufu lua Shawule ne lua bana bende mu mvita idibu baluangana ne bena Peleshete.Mukanda ewu udi utuvuluija ne: Mvidi Mukulu nkayende udi mukalenga menemene wa bantu bende. Muntu udi mua kudia bukalenga bua bena Izrayele amu padiye musue kuitaba m uende muonsu bukalenga bua Mvidi Mukulu.