2 Bakalenga 17 - MUKANDA WA MYIDI MUKULU（TSH96）

Osheya, mukalenga wa bena Izrayele. Dikuata dia Samariya

1Akaze mumane kulala mu bukalenga bua Yuda bidimu dikumi ne bibidi, Osheya, muana wa Ela, kudia bukalenga bua Izrayele mu Samariya. Kushalaye mu bukalenga bidimu tshitema.

2Osheya kuenza malu adi Maweja-Nangila mubenge. Kadi, kavua wenza bu muvuabu benza kudi bakalenga ba Izrayele bavua bamudianjidile mu bukalenga to.

3Shalmanazere, mukalenga wa bena Ashure, kufika bua kumuluisha. Osheya kudifila kudiye, kumulambula milambu ya ku tshidimu ku tshidimu.

4Pashishe, Osheya kumuelela tshifufu tshibi. Kutumaye bantu kudi mukalenga wa bena Ejipitu ku tshimenga tshia Sayize. Kavua mulambule kabidi mukalenga wa bena Ashure milambu ya ku tshidimu. Mukalenga Shalmanazere umanya bualu abu, kukuatshishaye Osheya, kumuela mu nzubu wa lukanu.

5Pashishe, Shalmanazere, kubuela mu ditunga ne mvita, kunyungulula tshimenga tshia Samariya. Bidimu bisatu bimane kupita,

6Osheya mumane kulala mu bukalenga bidimu tshitema, mukalenga wa bena Ashure kukuata tshimenga tshia Samariya. Kuyabu ne bena Izrayele mu bupika mu Ashure, kubapesha buloba bua Ala, ne bua Ngozane, muaba udi musulu wa Abore, kabidi ne bimenga bia Madayi bua kusombamu.

Bukalenga bua Izrayele buvua bubutuka bua tshinyi?

7Bena Izrayele bavua babuele mu dikenga, bualu bavua batombokela Maweja-Nangila Mvidi Mukulu wabu, uvua mubasungidile mu bianza bia mukalenga wa bena Ejipitu, mubapatule mu ditunga edi. Bualu bena Izrayele bavua batendelela mvidie mikuabu,

8bidikije bilele bia bisamba bikuabu bivua Maweja-Nangila muipate bua kubashila ditunga adi. Bavua balonda kabidi bilele bivuabu babueje mu ditunga kudi bakalenga ba bena Izrayele.

9Bena Izrayele bavua bakula miaku mibi, babenga Maweja-Nangila Mvidi Mukulu wabu. Bavua badiashila miaba ya kutendelela mvidie mu misoku yabu yonsu, nansha mu misoku mikese ivua ku mikalu, too ne mu bimenga bivuabu bibaka ne bimana bikole.

10Bavua bibaka bibumba bia mabue, ne makunji a kutendelela mvidie, ku nsongu ya mikuna, muinshi mua mitshi ivua ne dileji dia bungi.

11Bavua balambula milambu miaba yonsu ya kutendelela mvidie, bu muvua bisamba bikuabu bienza, bivua Maweja-Nangila muipate, bua kushila bena Izrayele ditunga. Bena Izrayele kuenza buenzayi, kufikisha Maweja-Nangila munda.

12Nanku, bena Izrayele kabavua banemeka diyi dia Maweja-Nangila to, bualu bavua anu batendelela mvidie iwaye mubakandike.

13Maweja-Nangila kutuma bambi bashilangane bua bahele bena Izrayele ne bena Yuda, babambila ne:

— Lekelayi buenzayi. Tumikilayi meyi ne mikandu yanyi bidi mu mikenji imvua mupeshe bankambua benu, ne imvua munutumine kudi bambi, bantu banyi.

14Kadi bantu abu, kabena bitabe bivuabu babambila abi to. Bavua batomboka, anu bu muvuabu benza kudi bankambua babu, bavua babenga mua kuitaba Maweja-Nangila Mvidi Mukulu wabu.

15Bavua babenga mikenji ya Mvidi Mukulu, babenga kabidi ne ndondu uvuaye mutue ne bankambua babu, ne mibelu iwaye mubamanyishe. Bavua balamate anu mvidie ya tshianana, batua eku ne eku, bidikija muvuabu benza kudi bisamba bivuabu nabi mutumba, bivua Maweja-Nangila mubakandike bua kababidikiji to.

16Bavua balengulula meyi onsu a Maweja-Nangila Mvidi Mukulu wabu. Bavua badienzela mpingu ibidi ya tuana tua ngombe tua tshiamu tshiengulula, badienzela kabidi makunji a kutendelela. Bavua batendelela bintu bionsu bidi mu tshibuashibuashi, benzela mvidie Baale mudimu.

17Bavua balambula bana babu ba balume ne ba bakaji bu mulambu wa kuosha. Bavua benza majimbu a mishindu yonsu. Nanku, bavua bafikisha Maweja-Nangila munda bualu bavua benza malu adiye mubenge.

18Ke Maweja-Nangila kufikila bena Izrayele munda. Kavua musue kubamona kumpala kuende to. Anu tshisamba tshimue tshia bena Yuda ke tshivua tshishala tshilamate Maweja-Nangila.

19Kadi, bena Yuda kutombokela kabidi Maweja-Nangila, kubenga meyi a Maweja-Nangila Mvidi Mukulu wabu. Kulondabu bilele bivuabu babueje mu bukalenga bua bena Izrayele.

20Nanku, Maweja-Nangila kubenga bena Izrayele bonsu, kubafila mu bianza bia bakengeshanganyi bua kubafuisha bundu. Pashishe kubipataye, kubatuma kule.

21Pavua Maweja-Nangila mumushe buloba bua Izrayele ku bukalenga bua Davide, bena Izrayele bavua badisunguile Yerobowame, muana wa Nebate, bua kuikalaye mukalenga wabu. Yerobowame ke uvua mubafikishe ku dibenga kutumikila Maweja-Nangila, mubafikishe ku dienza bibi bitambe.

22Biangatshile tshikondu atshi, bena Izrayele bavua anu benza buenzayi, bu muvua Yerobowame muenze.

23Pashishe, Maweja-Nangila kavua musue kabidi bena Izrayele kumpala kuende to. Kubipataye, kubatuma ku Ashure. Ke muaba utshidibu too ne mpindiewu. Bionsu ebi bivua bienzeka bua kukumbaja diyi dia Maweja-Nangila divua bambi, bantu bende, bamba.

Kudi bena Samariya bafumine

24Mukalenga wa bena Ashure, kubikidisha bantu ba mu Babilone, Kuta, Ava, Amate ne Sefawayime, bua kubapesha miaba ya kuasa mu ditunga dia Samariya. Kuasabu mu misoku ivua bena Izrayele bashiye, bualu bavua babakuata baye nabu mu bupika. Nanku, bantu aba, kuangata buloba abu, kuasamu misoku yabu.

25Pavua bantu aba batuadija kuasa mu misoku ayi, kabavua batendelela Maweja-Nangila to. Nanku, Maweja-Nangila kubatumina nyama ya ntambue. Nyama ayi kushipa bantu ba bungi ba munkatshi muabu.

26Kumanyishabu mukalenga wa bena Ashure ne: bantu baudi mubikidishe bua kuasabu mu misoku ya mu ditunga dia Samariya, kabena bamanye mua kutendelela mvidie wa bena ditunga adi. Nanku, mvidie awu, mmubatumine nyama ya ntambue bua kubashipa.

27Ke mukalenga wa bena Ashure, kubikidisha mutuangaji mukuabu uvuabu baye nende mu Ashure mu bupika, bua apingane mu ditunga dia Samariya. Mutuangaji awu kusomba mu ditunga dia Samariya bua kulongesha bantu abu mudibu mua kutendelela mvidie awu.

28Ke muvua mutuangaji, uvuabu bakuate, bumuke nende, mupingane mu ditunga dia Samariya, musombe ku Betele, ulongesha bantu mua kutendelela Maweja-Nangila.

29Kadi bantu ba bisamba bikuabu aba, bavua amu badienzela mpingu ya mvidie yabu, bayiteka miaba ya kutendelela, ivuabu bibake kudi bantu bavua base kale mu ditunga dia Samariya. Tshisamba tshionsu tshia bantu abu, tshivua anu ne lupingu lua nanku mu bimenga bionsu bivuabu basombe.

30Bantu bavua bafumine ku Babilone bavua benza lupingu lua mvidie Sukote-Benote, ba ku tshimenga tshia Kuta, bavua benza lupingu lua mvidie Nergale, ba ku tshimenga tshia Amate lupingu lua mvidie Ashima,

31ba ku tshimenga tshia bena Ava lupingu lua mvidie Nibaze ne lua mvidie Tartake, ba ku tshimenga tshia Sefarvayime bavua bosha kabidi ne bana babu bua kulambula mvidie wabu Adrameleke ne Anameleke.

32Kadi bantu bonsu aba, bavua batendelela kabidi Maweja-Nangila. Bavua basungula bantu balume bakuabu ba munkatshi muabu bua bikale batuangaji mu nzubu ya mvidie yabu, balombola ditendelela.

33Nanku, bantu abu, bavua luseke batendelela Maweja-Nangila, luseke lukuabu batendelela mvidie yabu, bilondeshile bilele bia ku matunga abu kuvuabu bafumine.

34Ndelanganyi ya bantu ba bisamba bikuabu abu, itshidi ilonda bilele ebi bia kale too ne mpindiewu. Kabena batendelela Maweja-Nangila menemene to. Nanku, kabena batumikila menemene nansha mikenji ne bilele bia bankambua babu, nansha mikenji ivua Maweja-Nangila muambile ndelanganyi ya Yakobe. — Yakobe awu ke uvua Maweja-Nangila muinyike dina dia Izrayele.

35Eku Maweja-Nangila uvua mumane kutua ndondu ne ndelanganyi ya Yakobe, muyipeshe mikenji eyi ne: “Kanutendeledi mvidie. Kanuyituidi mpala mpanshi. Kanuyenzedi mudimu, kabidi kanuyilambudi milambu.

36Nuntendelele anu meme Maweja-Nangila nkayanyi. Meme ke uvua munupatule mu Ejipitu ku bukole buanyi, budibu kabayi mua kutuila nkanana. Nanku, nuntuile anu meme mpala panshi, kabidi nundambule milambu.

37Matuku onsu, nutumikile meyi anyi, mikandu yanyi, ne mikenji yanyi yonsu imvua munufundile nuenu nkayenu, nangananga kanuena mua kutendelela mvidie mikuabu to.

38Kanuena mua kupua muoyi bua ndondu umvua mutue nenu. Ndi ngambulula ne: kanutendeledi mvidie mikuabu to.

39Anu meme Maweja-Nangila Mvidi Mukulu wenu ke unudi mua kutendelela. Bualu anu meme nkayanyi ke udi mua kunusungidila mu bianza bia baluishi benu bonsu.”

40Kadi, bantu ba bisamba bikuabu abu, kubenga mua kuitaba bionsu abi. Kutungunukabu amu ne bilele biabu bia kale.

41Nanku, bavua luseke batendelela Maweja-Nangila, luseke lukuabu batendelela mpingu. Pashishe, bana babu ne ndelanganyi yabu yonsu bavua benza anu nanku too ne mpindiewu.