Yeshaya 42 - MUKANDA WA MYIDI MUKULU（TSH96）

Muntu wa Maweja-Nangila (musambu wa kumpala)

1Maweja-Nangila udi wamba ne:

Tangila muntu wanyi.

Ndi mumukoleshe.

Ndi mumunange, mumusungule.

Ndi mumuwuje ne Mueyelu wanyi,

bua kumanyishaye bukua bisamba

bilenga bindi mulongoluele bantu.

2Yeye kena wela lubila,

kena ujuula mutoyi.

Diyi diende kabakudiumvua

mu misesu minene.

3Tshituuta tshitshibuke,

kena utshikosa.

Kapia katshifuima,

kena mua kukajima.

Kadi udi utuadila bantu

bilenga bindi mubalongoluele.

4Kakuteketa mu maboku,

kakupungila,

too ne muabuejaye malu malenga

pa buloba bujima.

Bantu ba ku matunga a kule,

badi amu bamuindila,

bua abalongeshe.

Butoke bua bukua matunga

5Maweja-Nangila

udi mufuke diulu ne bionsu bidimu,

udi muteke buloba,

ne bionsu bidi bimuenekamu,

udi mupeshe bantu muoyi,

upesha bonsu badi basapu Mueyelu wende.

Ke yeye udi wambila

muntu uvuaye musungule ne:

6“Meme Maweja-Nangila, mvua mukubikile,

bua ukumbaje meji andi nawu.

Meme ndi nkuambuluisha.

Mvua mukuenze, bua utuadile bantu bupole,

ukumbaje bimvua mulaye bantu,

wikale butoke munkatshi mua matunga.

7Neutabeje bampofu.

Neupatuishe

bena lukanu mu nzubu wa lukanu,

muaba udibu basomba,

bindile mu miidima.”

8Ndi Maweja-Nangila, ke dina dianyi meme.

Tshiena mpesha bakuabu

butumbi budi bunkumbanyine.

Lumu ludi lungakanyine,

tshiena ndupesha mvidie to.

9Malu amvua munumanyishe kumpala,

akadi mamane kuenzeka.

Ndi nnuambila malu mapiamapia mpindiewu.

Ndi nnumanyishawu, kaayi manji kuenzeka.

Maweja-Nangila udi ufika

10Imbilayi Maweja-Nangila

musambu mupiamupia.

Nuenu badi benda mu mayi manene,

nuenu bifukibua bidi biendamu,

ne nuenu bantu badi base kulekule,

numutumbishe too ne ku ndekelu kua buloba.

11Bantu bimbile Mvidi Mukulu misambu,

mu tshipela ne mu bimenga biatshi,

ne mu mitanda idi bena Kedare base.

Bena mu tshimenga tshia Sela,

bele tunkunduluila!

Bele mbila ya disanka,

pa mitu ya mikuna!

12Bantu badi base kule,

batumbishe Maweja-Nangila,

bamusamune ne meyi makole!

13Maweja-Nangila udi wenda usemena kumpala,

bu tshilobu tshia bukitu mu mvita.

Udi udilongolola bua kuluangana.

Udi utua tshisamu tshia mvita,

utshimuna bena lukuna bende.

Meji adi Maweja-Nangila muele

14Maweja-Nangila udi wamba ne:

Ndi mushale mupuwe matuku mavule.

Tshiena muandamune ku dilomba dia bantu banyi.

Mpindiewu nengele mbila,

bu mukaji udi pa lulelu,

upuyakana, weyela ne dikenga.

15Nembutule mikuna minene ne mikese,

nengumishe bisosa ne mitshi bidipu.

Nengumishe misulu, ishale tshipela.

Majiba a mayi neakame.

16Kadi nendudike bantu banyi,

batshivua bashale bampofu,

mu njila udibu katshia kabayi bayile.

Nenkudimune miidima,

yenze munya, bua bantu bende bimpe.

Ndi ndandakaja miaba idi biina.

Ke bindi musue kuenza.

Nembikumbaje, tshiyi ndekela.

17Kadi bonsu badi batekemena kudi mvidie,

badi batekemena mpingu ivuabu basonge,

bayibikila ne: “Nudi mvidie yetu”,

bafue bundu, banyeme lubilu.

Tshisamba tshia bampofu, tshia bena mapapa

18Nuenu bena mapapa, telejayi bimpe.

Nuenu bampofu, tangilayi.

19Nganyi udi mpofu?

Amu nuenu bantu banyi!

Nganyi udi ne mapapa?

Amu nuenu bandi ntuma!

— Eyowa, udi mpofu,

bu muntu udi Mvidi Mukulu utuma, nnganyi?

Udi ne mapapa,

bu muntu wa Maweja-Nangila, nnganyi?

20Nuenu nudi bamone malu a bungi,

kadi kanuena bavuluke bualu nansha bumue to.

Matshi enu adi mimpe,

kadi kanuena numvua bualu nansha bumue to.

21Maweja-Nangila uvua musue kupandisha bantu bende.

Ke pavuaye ubalongesha mikenji yende minene mimpe.

22Kadi mona bantu bende,

bavua babanyenge bintu, babapawule bikuabu.

Bena diende bonsu bakadi bena lukanu.

Bavua bahele mu nzubu wa lukanu,

babatangile bu bintu binyenga mu mvita.

Bavua baye nabu ku bukole,

kakuyi wa kutua nkanana,

kakuyi uvua mua kubulula mukana ne:

“Nubapingaje kutudi.”

23Wa kunudi udi uteleja bualu ebu bimpe nnganyi?

Bualu ebu kabuena bunulongesha anyi?

Kabuena bunuleja tshia kuenza anyi?

24— Uvua mufile bena Izrayele,

tshisamba tshia Yakobe,

kudi bantu bua babapawule,

babanyenge bintu biabu, nnganyi?

Maweja-Nangila ke uvua muenze nanku.

Yeye utuvua badiombole.

Izrayele kavua musue kulonda

njila uvua Mvidi Mukulu mumuleje.

Kavua muteleje diyi diende.

25Ke pavua Maweja-Nangila

muleje bantu bende

bunene bua tshiji tshiende,

mubakengeshe ne mvita.

Mvita kuosha bena Izrayele nseke yonsu.

Kadi nanshabu kujingulula tshintu.

Kapia kubosha, kubashidisha,

kadi nanshabu kubuelela meji.